Download

Skango jikse ong·anio neng·nikanirang, be·gimin ku·rachakanirang, aro dedrangrangni jajaanio ong·anirangan – jikse galgrikani dukrang ong·a. Nang·ni nokdangna indakgipa obostao ong·na on·nabe! Nang·ni nokdang rakgipa somoirangko ba bia ka·e donganio kusi ong·aniko man·oba – ba na·a bia ka·e dongani gimin chanchiengode – Sastro nang·ni nokdangna baigipa sakki gnanggipa dakchakaniko on∙a. Ia ku·pattiani Isoloni ong·a, jean bia ka·aniko ong·ataha aro songaha! Na·a pilak gitan jotton ka·ahaode, maina Una cholko on·e nija?

Kusi ong·gipa nokdangna rokomchisni chabirang: 

1. Na·a an·tangni noktangko dakbo.

“Iani gimin mande an·tangni paako aro ma·ako wate jiktang baksa dongrimgen, aro uamang be·ensan ong·gen” (Aba. 2:24).

Talatani: Isolni niamde indake ong·a je bia ka·gipa jora ma·a paani nokoni jitna nanga aro an·tangni nokko rikna nanga, tangka paisarango neng·nikani ong·oba, kuturi ge·sakode rikbo. Segipa aro jikgipa iani gimin damsan chanchianiko dakna nanga, aro saobarang jegaloba chanchianio kimkim ong·na nanga. Bang·a bia ka·gipa nokdangrang iako simsake ja·rikgenchimode namdapaniko dakna man·gen.

2. Na·simangni nangrimaniko dakangkubo.

“Pilakna skang na·simango ka·sagrikbea ong·bo; maina ka·sara bang·a paprangko pindapa” (! Pitor 4:8). “Uni segipaba uko indine de·mitela” (Toe Skiani 31:28). “Indiba kimgipa me·chik…ua maikai segipako namnikatna man·gen” (1 Kor. 7:34). “Jongadarangna kasaao kasagrikgiparang ongbo…” (Romrangna 12:10).

Talatani:  Na·a nang·ni janggi tanganio na·simangni jikse ong·e nangrimanio dongkamangkubo ba tangchaatbo. Chu·sokgipa bia ka·ani an·tangari ong·gakaija; uarangko rikna nanga. Saksa sakgipinko nisenge dongainabe ba ong·jaode gisiko nanggija dakanichi nang·ni nokdangko nosto ka·na man·gen. Na·simang·ni ka·saaniko saksa sakgipin baksa parakgrike dal·rorona on·bo; ong·jaode, ka·saaniara rongdimelangnaba donga aro nang·ko ekgrikatnaba man·gen.

3. Isolsa nang∙ko bia ka∙anio damsan ong∙ataha ine gisik ra∙bo.

“Iani gimin mande ma∙ako aro paako wate, an∙tang jikgipamung ma∙gapgen; aro uamang sakgni be∙ensan ong∙gen. Uni gimin Isol jeko nangrimataha, uko mande ekgrikatjachina” (Mati 19:5,6).

Agandapani: Ka∙saaniara nang∙ni nokoni gimaangengahama? Daibol dakmajoanichi nang∙ni bia ka∙aniko watgalchina nangnikenga, indiba Isol An∙tangan bia ka∙anio nang∙ko damsan ong∙ataha ine gisik ra∙bo, aro Ua nang∙ko damsan aro kusi ong∙e dongchina nangnikenga. Na∙a Uni ge∙etanirangna bamode aro maniode Ua nang∙na kusi ong∙aniko aro ka∙saaniko ra∙bagen. “Isolna  pilakan amani ong∙a” (Mati 19:26). Na∙a ka∙donggija ong∙nabe. Na∙a Uo bi∙ode aro Uko re∙bana onode Isolni Gisik nang∙ni ka∙tongko aro nang∙ni jikgipani ka∙tongko dingtangatna man∙a.

4. Nangni chanchianirangko Nitimbo.

“Maina gisiktango uni chanchia gitan ua onga” (Toe Skiani 23:7). “Naa nangni songsulni jikgipana mikboknabe” (Reongkata 20:17). “Nang·ni pilak rakkianirangna bate ka·tongtangko rakkibo; maina uanonin janggini ong·katanirang ong·a” (Toe Skiani. 4:23). “Jerang bebe ong·a, jerangan mikchikima, jerang kakket, jerangan rongtala, jerangan namnikani, jerang nama inani… iarangko chanchibo” (Philippirangna 4: 8).

Talatani: Ong·gija dake chanchianirang bia ka·e nokdang rikaniko namgija ong·atna man·a. “An·chingni bia ka·anide gualbeani ong·aha” “Ua (me·chik) angko ma·sichakja, “angade iana batede chakchikna man·jawa” “Chinga nanggenchimode kal·grikna man·a,” “Anga nokchi re·ange ma·gipana agangen,” ba “Ua ua me·chikna ka·dingsmitgen” indake diabolde nang·ko tol·napagen. Indakgipa chanchianiara kenanio ong·ronga maina nang·ni chanchianirang bon·chotaode nang·ni kamrangko sason ka·skagen. Iandakgipa nikanirang, aganani, poraiani, ba knaanirangko – ba bebegijagipa mande baksa bakrimaniko gelbo. Sason ka·na man·gijagipa chanchianirangara gariko a·silang dakgipa a·brio rakrika donggija dake watata gita ong·a; uni bitede namjabegipa gimaaniona sokatna man·a.

5. Saksa sakgipinko ka·o nanggrike palangona tusina re·angnabe.

“Na·simangni ka·gapmitingo sal napjachina” (Eph. 4:26). “Uni gimin saksa sakgipinna parangko kurachakgrikbo” (Jakob 5:16). “Ja·manchi donggiparangko gisik ra·gija” (Phil.3:13). “Na·simang batesa rinok rinok dakgrikbo, ka·saningbo, aro Kristoo Isaol maikai na·simangko wataha, na·simangba uandake watgrikbo” (Eph. 4:32).

Talatani: Dal·a ba chona neng·nikanirangni aro saknaanirangni kosako ka·o nangkame donganiara namen kenbeani ong·a. somoi gita namatna manjaode, chonbegipa neng·nikaniba indaken ong·chongmota ine chanchiani nang·ni gisiko dongkamgen aro nang·ni janggi tanganiko namgijao ong·atna man·a. Uni giminsa Isol nang·ni ka·o nanganiko palango tusina skang namatbo ine aganaha. Kema ka·bo, “anga gualaha” ine aganningna bakbakbo. Maina, darangba chu·sokgipa ong·na man·ja, aro na·simang sakgnian apsan dolo ong·a, uni gimin ka·sachakbo, aro na·a gualaniko dakahaode una ku·rachakani dakbo. Unbaksana, ong·ronggija bilrang baksa namgrikaniko dakaniara namen namgipa ong·a, jean bia ka·gipa jorako sepangbate damsan ong·atna dakchaka. Isol iako dakchina ku·pattian! Ian kam ka·a!

6. Nang·ni nokdango Kristoko Mongsonggipa ong·e donbo.

“Jihova nokko rikjaode, uko rikgiparang kam ka·gramaia” (Git. 127:1). “Nang·ni pilak re·anio uko ku·rachakbo, aro ua nang·ni ramarangko srongatgen” (Toe Skiani. 3:6). “Unon pilak u·iana batgipa Isolni tom·toma Kristo Jisuo na·simangni ka·tongrang aro chanchianirangko rakkigen” (Phil. 4:7).

Talatani:  Ian chong·motde dal·batgipa niam ong·a, maina iachisan pilak gipinrangkoba chu·sokatna man·a. Nokdango kusi ong·na nangchongmotanide neng·nikanirangni kosako gisik seng·e dakachi aro kam ka·achi ong·ja, indiba Kristo baksa bakrimanichisa ong·a. Kristoni ka·saani baksa ka·tongrango gapatako man·ahaon ru·uta somoina dingtanganiko ong·atja.  Nokdango Kristo dongon, bia ka·aniara dal·bate chu·sokna man·a. Ka·onangani aro ka·donggija ong·aniko Jisu su·srange ka·saani aro kusi ong·aniko ong·atskana man·a.

7. Damsan Bi·rimbo.

“Na·simang dakmajoao napjana gita mikrakbo, aro bi·bo. Gisikde ska, indiba be·en bil gri” (Mati 26: 41). “Saksa sakgipinna bi·grikbo” (Jakob 5:16). “Indiba na·simangoni saniba u·iani sokjaode, ua pilakna on·ninggipa aro manenggija Isoloniko bi·china” (Jakob 1:5).

Talatani: Saksa sakgipinna bigrikbo! Ian namgipa kam onga jean nangni bia kae donganiko nangni niksamsoani nalsaonaba chusokna dakchakgen. Isolni mikkang ja·sku dipanbo aro saksa sakgipinna chong·motgipa ka·sagrikna, kema ka·grikna, bilko man·na, gisik gnanganiko Uoniko am·bo – jean neng·nikanirangko namatna man·gen. Isolan aganchakgen. Na·a pilak dakgualsretaoniko namatna amja indiba Isol nang·ni ka·tongko aro kamrangko dingtangatna bilake napbana man·gen.

8. Jikse galgrikaniara aganchakani ong·ja ine ma·sigrikbo.

“Uni gimin Isol jeko nangrimataha, uko mande ekgrikatjachina” (Mati 19:6). “Til·ekana agre jiktangko gale sakgipinko kimgipa; aro galgimin me·chikko kimgipaba til·eka” (Mati 19:9). “Maina me·chik tangenggipa segipana niamchi kaa gnang” (Rom. 7:2).

Talatani: Sastro agana je bia ka·e nangrimataniko pe·e galna man·ja ine miksonga. Til·ekanionsanmangmang jikse galgrikaniko dakna on·a.  Indakoba, iako dabija. Kakkegijani dongoba, kema ka·grikanian jikse galgrikana batede nambatkua.

Jensalo Isol skanggipa biani kaaniko changna Eden barrio songchengahaon, iako Ua janggi tanga gimikna dakaha. Uni giminsa, bia ka·anio saksa sakgipinna ku·mikchetgrikaniara rongtalgipa kaani ong·a. Indiba gisik ra·bo, bia ka·e donganiko Isolni miksonganiara an·chingni janggi tanganiko de·dona aro pilak gitan an·chingni nanganiko man·na miksongani ong·a. Jikse galgrikaniko gisiko donkamaniara nang·ni bia ka·aniko gimaatna miksonganisan ong·aigen. Jikse galgrikaniara pangnan gimaatani kamsan ong·a aro neng·nikanina mamungba namatani ong·ja; uni palo, batesa neng·nikanirangko bang·batata – tangka paisao neng·nikanirang, dedrangrangko duk ong·ata, aro gipinrang.

9. Nokdangko namedake rakkibo.

“Na·a til·eknabe” (Reo. 20:14). “Uni segipani ka·tong uo ka·donga; aro segipao man·dapani gri ong·jawa” (Toe Skiani. 31:11,12). “Maina nang·ni aro nang·ni panteni jikni gisepo, uan nang·ni ripeng aro nang·ni ku·monggrikani niamchi jikgipa ong·oba, na·a una nampinike dakaha ine Jihova saki on·gipa ong·aha” (Malaki 2:14). “Uni nitoana nang·ni ka·tongo mikboknabe, aro mikilrangchi an·tangko rim·na on·nabe. Mande an·tangni ka·bako wa·al gatenba uni ba·ra kamgija ong·genma? Sakgipinni jikgipaona napgipa uandaken ong·a; uko dangtapgipa pilakan dokako man·ani gri ong·jawa” (Toe Skiani. 6:25,27,29).

Talatani:  Nokdangni neng·nikanirangko mamungsaloba nang·ni nokni a·palchi sakgipinrangna sualnabe ba nang·ni ma·a paarangnaba sualnabe. Je mandean bia ka·gipa nokdangni nalsaoni ong·a aro neng·nikanirangko knara ba ka·sachakaniko daka diabolchi jakkalako man·e segipa aro jikgipani ka·tongrangko chel·atgen.Nang·ni nokdangni neng·nikanirangko an·tangarin namatbo.  Pamong ba bia ka·anina agankupatigipana agrede,  darangkoba bakko ra·na on·nabe. Pangnan saksa sakgipinna kakket ong·bo, aro mamungkoba sriksrik donunabe. Nang·ni jikgipani chanchina man·ana batpile agan ba·leke ronabe aro bilaken saksa sakgipinko chelchakgrikbo. Til·ekaniara pangnan nang·ko aro nangni nokdangni sakantikon sa·dikatgen. Isol, jean an·chingni gisik, be·en, aro chanchianirangko ma·sigipa ong·a indine agana, “Na·a tileknabe”(Reo. 20:14). Mikchagrikaniko a·bachengahaode, bakbakan watgrikbo – ong·jaode jagring nang·ni janggi tangani kosako pindapgen jekon altuede ra·galna man·jawa.

10. Isol ka·saaniko talataniko daka; uko salantio nang·ni miksongani dakbo.

“Ka·sara chakchika, rinok rinok daka; ka·sara miknengja, gaorade·ja, gangbingja, nitogija dakja, an·tangnirangko amja, ka·onangja, namgijako chancha; torom ong·gijanio katchaja, indiba bebeo katchaa; pilakkon chaka, pilakkon bebera·a, pilakkon ka·donga, pilakkon chakchika” (1 Kor. 13:4-7).

Talatani: Sastroni kattarangan dal·batgipa Isolni ka·saako talatgipa kattarangoni mingsa ong·a. Uko poraitaitaibo. Na·a ia kattarangko nang·ni nokdango janggi tanganio bak ong·atahama? Chong·motgipa ka·saanide gisiko nabaramram ka·saani ong·ja, indiba ian rongtalgipa niam ong·a jean nang·ni pilak bia ka·e janggi tanganio bakrimani donga. Chong·motgipa ka·saani baksa, nang·ni bia ka·e nokdang rikaniara chu·sokgipa ong·gen; ia gride, bia ka·aniara bakbakan chu·sokgijanio ong·egen.

11. Matnanggrikani aro kajia ka·e roanirang ka·saaniko gimaatgen ine gisik ra·bo.

“Segiparang, jiktangtangna ka·sabo, aro uamangna ku·sia ong·nabe” (Kolosirangna 3:19). “Jegrikgipa aro dipet dipet ingipa me·chik baksa dongana bate, a·gisio dongan nambata” (Toe Skiani. 21:19). “Mikka wabemitingo tingtotchagipa, aro gisegipa me·chik apsan” (Toe Skiani. 27:15). “Aro nang jongadani mikrono donggipa bisemsemko maina nia, indiba mikrono donggipa bilbangko chanchija” (Mati 7:3). “Ka·sara chakchika, rinok rinok daka; ka·sara miknengja, gaorade·ja, gangbingja” (1 Kor. 13:4).

Talatani: Nang·ni ripengtangoniko dosiko am·rikite, matnange, kajia ka·aniko dontongbo. Nang·ni jikgipa ma·sianio kominaba donga, indiba dosiko am·e matnanganiao dakchakani man·jawa. Chu·sokgipa ong·na ka·donganiara nang·na aro nang·ni jikgipana batesa meligrikgijaniko ra·bagen. Gualanirangchipakko niatnabe batesa namanirangko am·bo. Nang·ni ripengtangko gital daktaiatna, sasono donna ba drae maniatna jotton ka·nabe ong·jaode na·a ka·saaniko nosto ka·gen. Isolsanmangmang manderangko dingtangatna mana. Ka·dingsmitani, kusi ong·gipa ka·tong, ka·saani kamrang, chakchikani, aro ka·saanichi  bang·a nang·ni nokdangni neng·nikanirangko gimaatna man·gen. namako dakana bate nang·ni jikgipako kusi ong·atbo, aro namaniara an·tangko simsakaigen. Nokdangko rikanio chu·sokagipa ong·anide kragipa ripeng man·anio ong·ja, indiba kekketgipa ripeng ong·aniosa pangchaka.

12.Jekoba duga daknabe: krae dakbo.

“Susagrikgipa sakanti pilakni gimin an·tangko rakkia” (1 Kor. 9:25). “Ka·sara…an·tangnirangko am·ja” (1Kor. 13:4,5). “Uni gimin nasimang chaoba, ringoba, jekoba dakoba, pilakkon Isolni rasongna dakbo” (1 Kor. 10:31). “Indiba anga antangni beenko doka, aro uko nokol gita bamata” (1 Kor. 9:27). “Saoba gamna sikjaode, ua cha·aba cha·jachina: (2 Thess. 3:10). “Kima pilakon mandera·ani aro turimani marang gri ong·china” (Ibrirangna 13:4).“Uni gimin be·enni skarangko manina, na·simangni signi be·eno pamong ong·na on·nabe aro otoromni silchidare ine papna na·simangni be·enni bakrangko on·nabe” (Romrangna 6:12,13).

Talatani: Dugaa kam ka·ani nang·ni nokdangko rusigen. Uni gimin krae dakbo. Isol baksa somoiko ra·bo, kam kabo, ka·sabo, neng·takbo, be·enko ranta ka·bo, kal·grikbo, cha·aniko cha·bo, aro nokdangko rikanio manderang baksa melie nangrime dongbo. Dugaapile kam ka·ani, aro neng·takna man·gijani, namedake cha·gijani, aro be·enko ranta ka·na man·gijani, chakchikna man·gijani, aro ong·gija dake chanchianirangan mandeko neng·nikaniona dilanggen. Sastroo jikse ong·anio krae nangrimanikoba dakchina ku·pattianiko daka (1Kor. 7:3-6) maina cholono ong·siani aro an·tangko rakkina man·gija dake nangrimanirang saksa sakgipinna ka·sagrikani aro mandera·grikaniko nosto ka·na man·a. Mandeska baksa nangrime donganiara nangchongmotani ong·a; chong·motgipa kusi ong·aniko a·te dake donganio nikna man·jawa. An·ching ka·dingna, aro nama somoirango katchana skie ra·na nanga. Pilak somoion jrimgipa gisiko chanchianiara kenaniko ong·atna man·a. Dugaa ba chu·onggija dake kam ka·aniara gisikko, be·enko, chanchiako, aro saksa sakgipinna ka·sagrikaniko aro mandera·grikaniko bilgriata. An·tangko rakkina man·gijanichi nang·ni nokdangko nosto ka·na on·nabe.

13. Saksa sakgipinni dakna man·ani bilrangko aro paltangni nanganirangko mande ra·bo.

“Ka·sara chakchika, rinok rinok daka…ka·sara miknengja…ka·sara gangbingja, an·tangnirangko am·ja… torom ong·gijanio katchaja…pilakon bebera·a, pilakon chakchika” (1 Kor. 13:4-7). “Jongadarangna ka·sao ka·sagrikgiparang ong·bo; rasong chaatao saksa sakgipinna skange” (Romrangna 12:10).

Talatani: Segipa aro jikgipa sakantion Isolni on·gimin paltangni dakna man·ani donugimin bilrang donga. Saksa sakgipinni tangka chipgipa bagko, aro paltangni emailko kal·ake ronabe, aro hukumko man·jaskalde sakgipinni bosturangko kal·aknabe. Mande ra·grikosa paltangni bilko an·tangni nanganina jakkalna man·a. Nang∙ni segipa ba jikgipa basakoba somoiode ong·gija dakanio ong·ena man·a.  Bia ka·gimin jorarang mamungkoba an·tangtangna kange ra·nabe aro an·tangtangko dingtang ong·ataniona ra·bana dranabe. Isolsan indakgipa dingtangatanikode ra·bana man·a.  Kusi ong·nade saksa sakgipino ka·dongchakna aro bebera·gipa ong·na nanga, uni gimin pangnande saksa sakgipinni kosako sandianiko daknabe. Nang·ni segipa ba jikgipani gimin mesoke on·naniko dakna bang·gija somoiko ra·bo aro bang·bate saksa sakgipinko namnikatnasa somoiko ra·batbo. Ian aiao inmanpile kam ka·na man·a.

14. Rongtalbo, gaoradaknabe, tiktak dakbo, aro kamtangko kakket ka· bo.

“Uandake me·chikrang kratchanika aro gisik naman baksa, nito gana chinanichi an·tangtangko nitoatchina” (1Timothy 2:9). “Ua an·tangni jakrangchi namnike kam ka·a… ua walengpition chakate, noktangni manderangna cha·aniko aro an·tangni nokol me·chikrangna daka nanga kamko on·a…ua an·tangni nokni manderangni ong·anirangko namedake niroka; aro aratani cha·aniko cha·ja: (Toe Skiani. 31:13,15,27). “An·tangtangko rongtalatbo” (Isaia 52:11). “Indiba pilakan krae aro namedake ong·china” (1 Kor. 14:40). “Indiba saoba an·tangnirangna, mongsongde an·tang nokni manderangna, chanchisojaode, ua bebera·ako jechakaha, aro bebera·gijagipana bate namjabata” (1 Timothyna 5:8). “Maikai na·simang ka·singiparang ong·jawa” (Ibrirangna 6:12).

Talatani: Aratatanichi aro bildingbildang ong·atanichi diabol nang·ni saksa sakgipinna mandera·aniko aro ka·saaniko nosto ka·a aro indake nang·ni nokdangna saknaaniko ong·ata. Kragipa ganani chinani aro rongtalani, be·en bimangtangko namedake rakkianian segipa aro jikgipana nangchongmotani ong·a. Sakgnian nokdango tom·tomaniko ong·atna simsakna nanga, maina iasa tom·tomaniko ra·bagen.Aratgipa segipa ba jikgipa jean nokdangna mamungkoba dakja nokdangna namgijako ra·bagen aro Isolko ka·onangata. Saksa sakgipinna pilakkon dakaniara simsakani aro mandera·anibaksa dakna nanga. Chonbea kamrango simsakgija dakanichi chansokgija nokdangrangko bak dakaniona ong·ataha.

15. Rinok rinok dake ka·sae aganna miksongbo.

“Rinokgipa aganchakani ka·onanganiko pil·angata; indiba ga·nanggijagipa kata ka·onangako batata” (Toe Skiani. 15:1). “Nang·ni ka·sagipa jikgipa baksa katchae dongbo” (Aganpraka 9:9). “Anga mande ong·ahaoa anga bi·sanirangko wataha” (1 Kor. 13:11).

Talatani: Nang·ni segipa ba jikgipana, jejgrikani somoioba, pangnan rinok rinok dake aro ka·sae aganjringbo. Ka·o nangani, neng·gokani, ba ka·beani somoio chanchianiko dakaniara ka·dongchakgijaniko ong·ata, uni gimin agangrikna skang jrip dong·anian aro ka·onanganiko ka·sinatanian nambatgipa ong·a. Aro na·a jensalo agananiko dakon, ka·saani baksa ka·sae aganani ong·china. Rakgipa, ka·onangani kattarang nang·ni jikgipa ba segipani nang·ko namnikatna skaniko nosto ong·ata.

16. Tangka Paisarangko Simsake Jakkalbo.

“Ka·sara miknengja, gaorade·ja, gangbingja…an·tangnirangko amja” (1 Kor. 13:4,5). “Maina Isol ka·sroke on·gipana ka·sara” (2 Kor. 9:7).

Talatani: Nokdano tangka paisa man·aniko jikgipana suale on·na nanga jedakode nokdangna nangnikani gita aro nangani kri koros ka·na man·gen. Dingtang Bank Accountko kulianiara ning·tue ka·dongchakgrikna man·ani cholko chel·ata, jean an·senggipa nokdangko rikna nangchongmotani ong·a. Tangka paisa jakkalanide dolsan ku·monge kam ka·ani ong·a. Sakgnian bak ra·na nanga, indiba saksade dingtangmancha dake daitoko ra·na nanga. Tangka paisa jakkalanide mandeni dakna man·ani bilrango pangchaka.

17. Pilakkon parakgrike saksa sakgipin baksa agangrikbo.

“Ka·sara chakchika; miknengja; gaorade·ja, gangbingja” (1 Kor. 13:4).“Manengako jechakgipa janggitangkon chonnika” (Toe Skiani. 15:32). “An·tangni nikanio gisik gnanggipa ine na·a mandeko nikama Uona bate, gisik seng·gijagipao ka·dongbatani gnang” (Toe Skiani. 26:12).

Talatani: Adita dakna nanganirang nang·ni nokdangna mongsonggipa chanchianiko parake dakana batede bilakdabatgen. Kam kaaniko dingtangatani,  dam rakbegipa maiba bostuko breani aro janggi tanganio chanchie dakna nanganio segipa aro jikgipa sakgnian bakko rana nanga – aro chanchianirango dingtanggrikanikoba mande ra·na nanga. Damsan ku·monge chanchianirangko dakaniara bang·a gualanirangko chel·atna dakchakgen jean nokdangko ta·raken bilgriatna man·a. Chanchianirangko dakani ja·mano aro gisiko nange bi·ani ja·manoba, agananirang dingtangrikkuode, jikgipa segipani chanchianina bame on·na nanga, jean segipani jikgipana ning·tugipa ka·saanichi aro an·tangni jikgipana namgniko dakanichi gisik nangatna man·gen. Ephesusrangna 5:22-25 ko nibo.

18. Na·a nang·ni nokdangko Isolni An·tangna chanchigijaniko, on·kanganiko, aro nang·na ka·saaniko teng·suchakatna skama?

Nang·ni Aganchakani:___________________________________________________________________________________________________________

_________________________________________________________________________________________________________________________________________

Nang·ni Sing·anirangna Aganchakmanaha

  1. Bia ka·gipa badia jora jegrikaniko dakani ja·mano tom·tomataniko skanggipa dakchengna nanga?

Aganchakani: Jean kakket ong·anio ong·a.

  1. An·chingni nokdangni chanchianirangko dakanio obite niotangrangna peng·panganiko dakna niam uano dongama?

Aganchakani: Oe donga! Na·simangni depante ba demechikni nokdangko jiksesaan ku·pattianirangko am·ja skalde peng·pengna nangja. (1Thess. 4:11 ko nibo). Bang·a nokdrangrangan jean a·gilsako chongipa salgi ong·genchim o·bite niotangchi nosto ong·atako man·rongaha. O·bite niotangni dakna nanganide pilak chanchianirangko gitalgipa nokdang rikenggipani chanchianio donna nanga.

  1. Angni segipa ba jikgipade torom gri janggi tanggipasa, aro angade Kristian ong·na jotton ka·enga. Uni kamde namen namja. Angara uko galboma?

Aganchakani: Ong·ja! 1 Kor. 7:12-14 aro 1 Pitor 3:1,2 ko poraibo. Isol dingtangmancha dake aganchakaniko daka.

  1. Angni jikgipade sakgipin mande baksa seke katangjok. Daode ua gisik pile, nokona rebana skenga. Angni pamongde uko ra·pilna nanga ine angna aganaha, indiba Isolde iako dakchajachina beng·a, Uara beng·bebeama?

Aganchakani: Ong·ja, ong·ja, beben! Isol til·ekani giminsa galchina on·aha, oe, indiba Ua uko dakchina ge·etjaha. Kema ka·anian pangnan nambatgipa ong·a aro ukosa am·rongbata. (Mati 6:14,15 ko nibo).  Jikse galgrikanide nang·ni janggi aro nang·ni dedrangni janggirangko namen nosto ka·gen. Una cholko on·taibo!  Mati 7:12 o man·gipa niamko iano jakkalna man·a. Na·a aro nang·ni jikgipa, na·simangni janggirangko Kristoona an·pilode, na·simangni nokdangkusi ong·batgipa ong·gen. Ian ja·manchakkuja.

  1. Anga maiko dakna man·gen? Manderang pangnan angona re·baenga.

Aganchakani: Ia chasongo me·chik ong·nade altua ong·ja maina mitam manderang an·tangtangni gisikni bilrangko sasono donna man·rongja. Jeba ong·bo, aditarangko dakna man·gen jechin na·a antangko chel·atna dakchakgen iarangara, name krae ganbo chinbo, ripeng dake golpo ka·e rona agananiko ba gisiko nangatgipa kam ka·rimanirangko gelbo. Uano dingtangmanchagipa Kristian mandeni an·tangko rakkiani aro rasongko man·ani donga jean mande uni biapo donako man·gen. Kristo indine aganaha, “Uandake manderangni mikkango na·simangni seng·a teng·suchina, maikai uamang na·simangni nama kamko nike na·simangni salgio donggipa Paako rasong chaatna man·gen” (Mati 5:16).

  1. Maiko ga·akgimin mandena Isol gisik pil·china ku·pattiahachim angna rongtale aganna man·genma?

Aganchakani: Ru·uta bilsi re·angaha Kristo til·ekao rim·a man·gipa me·chikna ka·dimeatani aro ka·dongatani aganchakaniko on·aha. “Jisu… una inaha, O mechik, uamang bao? Nang·ko pilakba matnangjahama? Ua aganaha, Pilakba gri, Gitel. Unon Jisu aganaha, Angaba nang·ko matnangja: re·angbo, da·o intaltal papko ka·tainabe” (Johan 8:10,11). Uni kema ka·ani aro ku·pattianiko da·alonaba man·kuenga.

  1. “Dos dakgijagipa dol” ba basakobade on·tisade dosi dongpaiama?

Aganchakani: Ong·bebea.  Basakobarangde “dosi dakgijagipa dolba” ka·saani komiani, gisiko nanggijani, an·tangko rongtalnikani, ka·sae dakjani, an·tangni gimin chanchiani, kajia ka·e ba ka·lake roanichi namgija chanchianirangko aro kamrangko uni segipa ba jikgipani kosako ra·bana ba ong·atna man·a. Basakobarangde “dosi dakgijagipa dolba” Isolni mikkango “dosi dakgipa” gitan dosi ong·para. Isol batanggimin an·chingni kamrangko nike, an·chingni chanchianirangni kosako nie donga. “Maina mande mandeni nika gita Jihova nikja; maina mande a·palni nikaniko nia, indiba Jihova ka·tongko nia” (1 Samuel 16: 7).

  1. Isolara angko be·entangko kragija dake jakkalsretgipa segipa ba jikgipa baksa donganiko nangnikama?

Aganchakani: Be·entangko kragija jakkalsretaniara janggi tanga gimikna kenani ong·atna mana aro namjabegipa neng·nikanio ong·ata jean bakbak dakna gisiko nangataniko ong·ata. Segipa ba jikgipa aro nokdangni memborrang jerangan beenni gita saknaaniko man·enga naljoke janggi tangna kragipa biapko am·na nanga. Segipa aro jkgipa sakgnian kragipa Kristian nokdangna ku·patgipa mandeko sandina nanga jedakode egrikataniko namatna amgen.

 See Rakkianirang:  ____________________________________________________________________________________________________________

Nipiltaianiko Dakani

  1. Bia ka·aniara (i)

_____ Me·a aro me·chikko janggi tanga gimikna Isolchi nangrimatani ong·a.

_____ Mande sakgniko kraama kraja uko dikdiksana kamchi dake niani ong·a.

_____ Iako dakna nanganiba ong·ja. Me·a aro me·chikrang bia ka·gijaba damsan jakgitele

   dongna man·aia.

  1. Isol jikse galaniko mingsani giminsan ra·chaka. Ian (1)

_____ Cholono apsan ong·gijani gimin ong·a.

_____ Man·dikatgipa jikgipa ba segipani gimin ong·a

_____ Til·ekani gimin ong·a

_____ Bia ka·gipa jora torom gri ong·ani gimin ong·a.

  1. Ka·sagrikanio ka·sae dakani kamrangara (1)

_____ Janggi tanga gimikon dongangkuna nanga

_____ Bia ka·ani ja·mano bikan watgalna nanga

    _____ Gokani Kamsa aro dakna nanganian dongja.

  1. Bia ka·anio chu·sokani nambatgipa sakkide (1)

    _____ Kristoko ka·tongo aro noktango donanian ong·a.

    _____ Segipani jikgipako ritingona re·bana draani.

    _____ Jikgipani gale katna jikse galgrikaniko kenjagokatanichi.

  1. Melgrikgijanirango naljokgijaniko manna, iarangko dakbo: (3)

    _____ Saksa sakgipinna rinok rinok dake ka·sae aganbo.

    _____ Nang·ni jikgipa ba segipako gualaniko ku·rachakatbo.

󠄅_____ Namgrikaniko dakna nang·ni noksulrangko okambo.

_____ Nang`ni segipa ba jikgipako jrip dongchina drabo.

_____ Adita salrangna nokoni re·ongkate chel·tang dongbo.

_____ Damsan birimbo.

_____ Tusina skangan nang·ni ka·o nanganiko namatbo.

  1. Nang·ni bia ka·anio chu·sokgipa ong·na pangchakanirangko basebo: (2)

_____ Nang·ni nokdangko pilak gittamgipa dolrangni re·baaniko chipchangbo.

_____ Nang·ni ma·a paani noko dongbo.

_____ Kaonangon magipani nokona katangbo.

 _____ Nang·ni jikgipa ba segipani gualanirangko sepangbatgipa ripengrangna agane on·bo.

_____ Na·a an·tangni noktangko dakbo.

_____ Nang·ni gitcham me·asa ripengna ku·pattianiko ra·na chitti seatbo.

_____ Studapani ja·manoba skanggipa changnade mamungsaloba ku·rachaknabe.

  1. Nang·ni bia ka·gipa ripengko namdapatna nambatsranggipa cholde (2)

_____ Nang·ni cholko man·janakingkingde wate katna kenatbo.

_____ Kajia ka·e aro matnange robo.

_____ Nang·ni nangrimaniko Jisu Kristo baksa namdapatbo

_____ Nang·ni jora ripengko dingtang tuatbo.

_____ Ka·sabo, mitelbo, aro kema ka·bo.

_____ Nang·ni jora ripengko dingtang ong·china drabo.

  1. Nang·ni bi·a ka·anina kengnirangko ka·mao on·sogominrangoniko basebo: (6)

_____ Matnangan

_____ Alaksi segipa

_____ Tangka koros ka·rakgipa jikgipa

_____ Aratani

_____ Kristian nokdang

_____ Damsan bi·rimani

_____ Bildingbildang ong·ani aro mitchi mitchok dakani

_____ Kema ka·ani gisik

_____ Mikbuagrikani

  1. Nangchongmotgipa chanchiako dakanio chu·sokna. (2)

_____ Segipa aro jikgipani gisepo nanganirangko jakgitele agangrikna nanga.

_____ Na·a nang·ni skako nang·ni segipa ba jikgipani kosako drana nanga.

_____ Damsan bi·rime Isolko am·na nanga.

_____ Nang·ni namnikako daknasan jotking dakna nanga.

  1. Obite niotangna namgipa niamde. (1)

_____ Bia ka·daldal jorako wate donanian ong·a.

_____ Bia ka·daldal jorako uamang baksa dongchina draatna nanga.

 _____ Bia ka·daldal jorana uamang namnikoba namnikjaoba ku·pattianiko on·na miksongbo.

  1. Nang·ni segipa ba jikgipa kakket ong·jaode, nambatgipade: (1)

      _____ Rang·san wate donangbo aro mamungsaloba re·bapilnabejok.

      _____ Nang·ni jora ripengo baditan “chu·sokgijani donga” uni gimin sakantinan bakbak        

         agane onbo.

      _____ Mana dipet kema ka·grikna aro nang·ni nokdangko ripingna sikbo.

  1. Gisiko chanchianirangko namedake nitimbo maina (2)

_____ Rongtalgija chanchianirang rongtalgija kamrangona dilanggen.

_____ Nang·ni jikgipa ba segipa nang·ni chanchianirangko poraina man·a.

_____ Ong·gija dake chanchiani nang·ni nokdangko namen saknaatgen.

  1. Anga angni nokdangko Isolni An·tangna chanchigijani, on·kangani, aro angna ka·saaniko

      teng·suchakna nangnika.

 _____ Ong·a.

 ____ Ong·ja.