Lesson 27

      Download

Jensalo skydiver, aircraft do·gani ku·mangona re·bae uoni bilonangahaon, re·bapilani dongjawa ine ua ma·siaha. Ua namen chel·bee re·angaha, aro ua an·tangni parachuteko badalatna gualode, mamungba uko jokatna man·jawaha aro ua nemen kenbegnigipa signiona ta·raken ga·akgnok. Aiao namen dukni! Indiba iana bate maiba namgijani mandena ong·na man·kua. Chong·motan an·chingni Isol baksa nangrimanio re·bapilani dongijaona sokanganian namen namjabata. Indiomangba millionrang ia ariona sokangtokengaha aro uamang uko ma·sija! Na·aba uamangoni saksa ong·panaba gnang? Uandakgipaona dilanggipa namjabegipa papara maia? Maina Isol uko kema ka·na man·ja? Rongtalgipa aro jajaani gri aganchakanina – jean ka·donganian gapgipaba ong·achim – namen gisiko nangatbegipa ia Study Guide baksa dikdiksa somoiko re·atbo.

1.Isolni kema ka·na man·gijagipa papara maia?

“Manderangni pilak paprang aro kal·stapanirangko watgen, indiba Gisikko kal·stapaniko watjawa” (Mati 12:31).

 

Aganchakani: Isolni kema ka·na man·gijagipa papde “Gisikko kal·stapanian” ong·a. Indiba maiko “Gisikko kal·stapani” ine minga? Ia papni bidingo manderangni bang·a dingtang dingtang bebera·anirang donga. Mitamrang ian mande so·otani; mitama, Gisik Rongtalgipako sao on·ani; mitama, an·tangko so·ote siani; mitama, atchikugijagipa bi·sako so·otani; mitama, Kristoko jegalani; mitama, namen namjabegipa denggu dakani; aro sakgipinranga, ong·gijagipa isolko olakkiani; ine bebera·toka. Minggipin re·baenggipa sing·anio, ia namen nangchongmotgipani bidingo adita dakchakgipa seng·aniko ra·bagen.

2. Pap aro kal·stapani gimin Sastro maiko agana?

“Manderangni pilak paprang aro kal·stapanirangko watgen” (Mati 12:31).

 

Aganchakani: Pilak paprang aro kal·stapanirangkon watgen ine Sastro agana. Uni gimin skanggipa sing·anio janapgipa pilak paprangan Isolni kema ka·na man·gijagipa ong·ja. Pilak paprangoni mingsaba kema ka·na man·gijagipa dongja. Ian knanio jajagipa ong·ani ong·naba donga, indiba ka·mao janapgipa kattarang minggnian ong·a:

1. Jedakgipa aro pilak paprangko aro kalstapanirangkon kema watgen.
2. Gisik Rongtalgipani kosako kalstapgipa ba papko kema watjawa.

 

Ia Minggni Kattarangkon Jisu Agana

Jisu ia minggni kattarangkon Mati 12:31 o agana, uni gimin iano mamung ong·gijani dongja. Ia kattarangko namedake ma·sinade, an·ching Gisik Rongtalgipani kamko ma·sichengna nanggen.

Namen misilbee mande so·otaniara, Isolni kema ka·na man·gijagipa pap ong·ja.  

3. Gisik Rongtalgipani kamara maia?

“Ua [Gisik Rongtalgipa] pap aro torom aro bichalni gimin a·gilsakna namgijako u·iatgen…. Ua na·simangko pilak bebeona dilgen” (Johan 16:8, 13).

Aganchakani: Gisik Rongtalgipani kamara an·chingna papni gimin u·iatani aro an·chingko pilak bebeona dilanian ong·a. Gisik Rongtalgipara bimang dingtang ong·atchina Isolni watatgipa ong·a. Gisik Rongtalgipa gride, darangba papna duk man·ja, ba darangba bimang dingtang ong·ja.

4. Jensalo Gisik Rongtalgipa an·chingna papko u·iatahaon, an·chingara kema watako man·na maiko dakna nanga?

“An·ching an·tangtang paprangko ku·rachakode, an·chingni paprangko watna, aro pilak toromi ong·gijanirangoniko an·chingko rongtalatna Ua bebegipa aro toromigipa ong·a” (1 Johan 1:9).

Aganchakani: Jensalo papko Gisik Rongtalgipachi u·iatahaon, kema watako man·na gita an·ching an·chingni paprangko ku·rachakna nanga. Jensalo an·ching uarangko ku·rachakon, Isol kema ka·mangmangaiasan ong·aija indiba Ua an·chingko pilak toromi ong·gijaonirangko rongtalataba rongtalata.  Isol nang·ni dakgipa jedakgipa aro minganti papna nang·ko kema ka·na senge aro tarie dongenga (Gitrang 86:5), indiba na·a uko ku·rachakosan aro watgalosan mangmang uan ong·gen.

5. Jensalo Gisik Rongtalgipachi u·iato an·ching an·chingni paprangko ku·rachakjaora mai ong·gen?

“An·tangni niam pe·aniko pindapgipa silrorojawa, indiba ku·rachake uarangko wagalgipasa ka·sachakaniko man·gen” (Toe Skianirang 28:13).

Aganchakani: An·ching an·chingni paprangko ku·rachakjaode, Jisu an·chingni paprangko kema ka·na man·ja. Uni gimin, jedakgipa papba an·ching ku·rachakjaode aro uarangko ku·rachakkujana kingking kema watna man·gipa ong·ja, maina kema ka·anira pangnan ku·rachaknikosa ja·rika. Ua pangnaba una skang re·baja.

Gisik Rongtalgipako Jegalanio Namjabegipa Kenbegnirang

Gisik Rongtalgipako jegalania namjabegipa kenbegnigipa ong·a maina ua Gisik Rongtalgipako chu·gimik jegalsrangaona altuen dilanga, je papkon Isol pangnaba kema watna man·ja. Uan re·bapilani donggijagipa ariko batangman·gimin ong·aha. An·chingna u·iataniko ra·bagipara Gisik Rongtalgipasan ong·ani gimin, an·ching Uko pangnajolnan jegalsrangahaode, an·chingni obostara ka·donga grigipani nalsaosa ong·aijok. Iani bidingo namen u·ie ra·na nangchongmotani ong·a jekon Isol dingtang dingtang cholrangchi Sastroo mesoka aro talata. Nang·ni ia Study Guideko poraiengon dingtang dingtang talatanirangko niroroangbo.

6. Jensalo Gisik Rongtalgipa an·chingna papko u·iataon ba an·chingko gital bebeona dilon, an·chingara dakna nanga?

Aganchakani: Sastro indake agana:

1. “Nangni ge·etanirangko manina anga bakbakaha, aro ru·utjaha” (Gitrang 119:60).
2. “Nibo, da·o ra·chakani sal, nibo, da·o jokatanini sal” (2 Korinthirangna 6:2).
3. “Da·o na·a maina ru·uta? Chakate Uni bimungo bi·e, baptize ka·ako man·bo, aro nang·ni paprangko su·srangbo” (Watatarang 22:16).

Jensalo an·ching pap dakako u·iahaon, an·ching ua somoion uko ku·rachakna nanga ine Sastro chang changni agana. Aro jensalo an·ching gital bebeko ma·sion, an·ching uko ru·utatgijan ra·chakna nanga.

7. An·tangni Gisik Rongtalgipani mol·molani bidingo maiko Isol gisiko nangbee mikrakataniko on·a?

“Angni Gisik mande baksa jringjrotna jegrikjawa” (Abachenga 6:3).

Aganchakani: Gisik Rongtalgipa mande baksa paponi an·pilchina aro Isolna bamchina jringna mol·molchaaniko dakchajawa ine Isol gisiko nangbee mikrakataniko on·a.

8. Gisik Rongtalgipa mande baksa mol·molaniko maidakjoko dongtonga?

“Uni gimin Anga uamangna toe agana, maina uamanga …. knaeba knaja” (Mati 13:13).

Aganchakani: Jensalo mande Uni ku·rangna nagokgipa ong·a unon Gisik Rongtalgipa unbaksa agangrikaniko dontonga. Ukon Sastro knaeba knaja ine talata. Gorini alarmko nagokgipa mandeni kuturio donanio mamung namgni dongja.  Ua uko knajawa. Uandaken, mande gorini alarmko changni chang off ka·taitaie chakatgijanichi an·tangko uni gam·aniko knaatjana gita man·a. Bon·kamaode alarmni gam·gijani aro uni uko knagijani sal re·baa.

Gisik Rongtalgipako Pil·angatnabe

Unadaken Gisik Rongtalgipa baksaba apsan ong·a. An·ching Uko jegalsimsimode, Ua agangenchimoba salsaode an·ching Uko knajawa. Jensalo indakgipa sal sokahaon, Gisik Rongtalgipa duk ong·bee an·chingoni pil·anga maina an·ching Uni mol·molanirangna nagokgiparang ong·aha. An·ching re·bapilani donggijagipa ariko batangaha.

9. Isol, Gisik Rongtalgipachi, sakantinan seng·aniko ra·baa (Johan 1:9) aro papko u·iata (Johan 16:8). Jensalo an·ching ia seng·aniko Gisik Rongtalgipaoniko man·ahaon maiko dakna nanggen?

“Kakketgiparang rama sal briaona kingking, bate bate teng·suroroanggipa seng·a gita ong·a. Denggugiparangni rama andala gita ong·a” (Toe Skianirang 4:18, 19). “Andala na·simangko man·jana gita, seng·ako man·mitingon re·rurabo” (Johan 12:35).

Aganchakani: Sastroni niamde, jensalo Gisik Rongtalgipa gitalgipa seng·niko an·chingona ra·baa ba papko u·iata, an·ching bikan kamko dakna nanga – ru·utatgijan katta manina nanga. An·ching uko man·ani somoion katta manie seng·ao re·ruraode, Isol an·chingna seng·aniko on·roroanggen. An·ching jegalgenchimode, an·chingo donggipa seng·animangba an·chingoni re·anggen, aro an·ching andalao watangako man·gen. Daktaitaigipa kamoni aro bon·kame seng·aniko ja·rikna jegalaoni re·bagipa andalanian Gisikko jegalani bite ong·a, aro uan an·chingko ka·donga grigipa ong·ata.

10. Gisik Rongtalgipani kosako papko dakgipa maiba pap gnangma?

Aganchakani: Oe. An·ching papko ku·rachakna aro watgalna kimkime jegalahaon, an·ching ka·sine ka·sine Gisik Rongtalgipani mol·molanirangna nagokgiparang ong·a aro uan re·bapilani donggijaniona batangani ong·a. Ka·mao Sastroni dakmesokanirang donga:

1. Judasni kema watna mangijagipa papara mikbokrakanian ong·a (Johan 12:6). Maidake? Uara Isolni kema watna man·jaani giminma? Ong·ja! Gisik Rongtalgipako knatimna aro an·tangni mikbokrakgipa papko watgalna Judasni jechakahanichi mangmang uan kema watna man·gijagipa pap ong·aha. Ka·sine ka· sine ua Gisikni ku·rangna nagokgipa ong·aha.
2. Luciferni kema watna mangijagipa paprangara gaorade·ani aro an·tangko chuatanian ong·achim (Isaia 14:12-14). Isolni ia paprangko kema ka·na man·engon, Gisikni ku·rangko knajahaona kingking Lucifer knatimna jechakaha.
3. Pharisirangni watna mangijagipa papara uamangni Jisuko Messia ine ra·chakgijanian ong·a (Mark 3:22-30). Jisuan Messia – Tanggipa Isolni Depante ong·a ine uamang changni chang ka·tongko moatgipa u·iatanichi u·iataniko man·ahachim. Indioba uamang an·tangtangni ka·tongrangko rakataha aro dingtangatna sikgijagipa gisikchi Uko Jokatgipa aro Gitel ine ra·chakna jechakaha. Bon·kamao uamang Gisikni ku·rangna nagokgiparang ong·aha. Unikoa salsao, Jisuni aiao inmanbee aiao inmangipa kamko dakani ja·mano, Jisu An·tangni bilko diaboloniko man·aha ine Pharisirang mande jinmana aganaha. Uni aiao inmangipa kamrangko diaboloni ine chananian uamangni re·bapilani dongijagipako batangani aro Gisik Rongtalgipako kal·stapani ong·aha ine salsao Kristo uamangna aganaha. Isol uamangko kusi ong·en kema wataigenchim. Indiba uamang Gisik Rongtalgipana nagok ong·aona kingking jegalaha aro mamungdakeba pil·bana man·jaha.

An·ching A·selni Biteko Basena Man·ja

Jensalo Gisik an·chingko mol·molon, an·ching uko ra·chakna ba jegalna man·a, indiba an·ching uni biterangkode basena man·ja. Uarang dongiminrangsa ong·a. An·ching ra·chakjringode, an·ching Jisu gita ong·gen. Isolni dedrang ine Gisik Rongtalgipa an·chingni mikkingo mohor su·gen, ba chinko dongen (Parape·a 7:2, 3), aro unikoa Isolni salgini songnoko biapko man·na an·ching ka·dongna man·gnok. Indioba, an·ching uko ra·chakna jechaksimsimode, an·ching Gisik Rongtalgipako duk ong·atgiparang ong·gen – aro Ua an·chingni ku·turiko chipe, an·chingko pangnajolna watanggen.

11. Daud Raja misilbegipa tel·akani aro mande so·otani, minggni paprangko dakani ja·mano, maidakgipa ka·oksie bi·aniko ua Isolo bi·aha?

“Nang·ni Rongtalgipa Gisikko ang·oniko ra·angnabe” (Gitrang 51:11).  

Aganchakani: Uoniko Gisik Rongtalgipako ra·angjachina Isolo ua mol·molbeaha. Maina? Maina Gisik Rongtalgipa uko watangahaode, ua somoion ua sigenchim ine Daud ma·siachim. Gisik Rongtalgipa mangmangsan uko pap ku·rachakaona aro gital daktaianiona dilangna man·gen ine ua ma·siachim, aro ua Uni ku·rangna nagok ong·aniko chanchiate namen kenbeaha. Minggipino Sastro an·chingna agana je Isol, Ephraimko saksan watangaha maina ua an·tangni mite dakanirang baksa ma·gapachim (Hosea 4:17) aro ua Gisikko knajawachim. Ua gisikni gita nachil knagijagipa ong·aha. Mandena nambatgipa a·sel ong·na man·anide Isolni an·pilangani aro uko saksan watanganian ong·a. An·tangna indake ong·na on·nabe!

12. Thessalonika mondolnina maia nemen nangchongmotgipa ge·etaniko watata Paul on·aha?

“Gisikko kimitnabe” (1 Thessalonikarangna 5:19).

Aganchakani: Gisik Rongtalgipani mol·molanide mandeni gisik aro ka·tongo wa·al gita kam·anian ong·a. Wa·alko jedake chi kimita, uandaken papara Gisik Rongtalgipani kosako daka. Gisik Rongtalgipako jensalo an·ching namrengengon aro papo dongangkuon, an·ching Gisik Rongtalgipani wa·al gita kamenganiko chi rudapenga. Paulni Thessalonikani manderangna namen nangchongmotbegipa kattarangara ia salni an·chingnaba ong·kugenga. Gisikni ku·rangko changni chang jegalanichi Gisikni Rongtalgipani wa·alko kimitnabe. Wa·al kimitako man·ahaode, an·chingara re·bapilani donggijagipako batanggiparang ong·gnok!

Jedakgipa Papba Wa·alko Kimitna Man·a

Jedakgipa ku·rakchagijagipa ba watgalgijagipa pap bon·kamao Gisik Rongtalgipani wa·alko kimitna man·a. Uan Isolni snigipa sal Neng·takani Sal ong·na man·a. Uan churing chupekani ong·na man·a. Uan saoba nangko to·gigipa ba nang·ko saknaatgipako kema ka·na man·gijani ong·na man·a. Uan rongtal an·talgijagipa kam ong·na man·a. Uan bak chikkungni bakko ra·rikani ong·na man·a. Gisik Rongtalgipani ku·rangna katta manina jedakeba jechakon Gisik Rongtalgipani wa·alo chi rudapenga. Wa·alko kimitnabe. Iaba bate namung namjabata ong·na man·ja.

13. Maidakgipa minggipin aiao inmanpilgipa kattarangko Paul, Thessalonikani bebera·giparangna aganaha?

“Pilak otoromi ong·gipani tol·napao gimaenggiparangna Satanni kaa gita Uni re·baa ong·a; maina uamang jokna gita bebena ka·saako ra·chakjachim. Aro iani gimin uamang tol·ako bebera·china, Isol uamangna branganiko chu·sokatgipako watata; maikai bebeo bebera·gija otoromi ong·gipako namnikgiparang pilakan bichal ka·ako man·gen” (2 Thessalonikarangna 2:10-12).

Aganchakani: Mairongpile bil gnanggipa, aiao inmanpilgipa kattarang! Jemangan Gisik Rongtalgipachi ra·bagipa bebeko aro papko u·iataniko ra·chakna jechaka – Gisik uamangoni re·angahaon – tol·aniko bebe ong·a ine bebera·na namen brangbegiparang ong·gen. Ian namen chanchina nanggipa ong·a.

14. Jemangan ia namen brangbeaniko man·ahachim bichalni salo uamang maidakgipa chagronganiko chagronggen?

“Un salo bang∙en Angna ingen, O Gitel, Gitel, chinga Nang·ni bimungchi katchinike aganjachimma? Aro Nang·ni bimungchi korerangko a·rikjachimma? Aro Nang·ni bimungchi bangˑen bilakani kamrangko kajachimma? Unsalo Anga uamangko agangen, Na·simangko Anga pangnaba u·ikuja; Ang mikkangoni na·simang re·angbo, namgija dakgiparang” (Mati 7:22, 23).

Aganchakani: Jemangan “O Gitel, Gitel” ine grapgiparang uamangko a·rikatani gimin namen aiao inmanbegen. Uamang jokatako man·gen ine namen ka·dongbegenchim. Unikoa Jisu uamangna jajagijagipa gisik ra·ataniko dakgen je uamangni janggi tanganio Gisik Rongtalgipaan gital bebe aro papko u·iataniko dakahachim. Uan kakketgipa ong·bebeachim ine uan namen rongtalbeaha. Uamangni baseanio dakgrikengon uan uamangko walni somoio mikrakatachim. Mairongpile uamangni ka·tongrango ning·o wa·al kambeachim! Bon·kame, uamang “Nangja” ine aganaha! Gisik Rongtalgipako knatimangkuna uamang jechakaha. Unikoa uamangni gimaengon jokmanaha ine bebera·atna namen brangatgipa re·baaha. Iana bate namjabatani gnangma?

15. Jensalo an∙ching gimaengon an∙ching jokmanaha ine bebera∙oniko gelna dakchakna gita maidakgipa dingtangmanchagipa kattarangchi Jisu an∙chingko mikrakata?

“Angko Gitel, Gitel, ingipa pilakan salgini songnoko napna man·gen, ia ong·ja; indiba salgio donggipa angni Paani namnikako dakgipasa” (Mati 7:21).

Aganchakani: Gisiko ka∙dongani donggipa sakantiande Uni songnoko napejawa, indiba uni palo, Uni namnikako dakgiparang mangmangsan napegen ine Jisu gisik nange mikrakata. An∙ching sakantian jokataniko man∙na ka∙dongsoani gnang – aro Isolba an∙chingko jokatana gita ska! Indioba, ia chasongo jean manderangna uamangni papo janggi tangangkuengon aro uamangni janggi tanganio mamung dingtanganiko mesokjaegon janggi jokataniko ku∙rachakgipa, kakket ong∙gijagipa ka∙dongatanichi satpakgipa Kristianrang gnang.

Jisu Satpakenggipa Balwako Jitpakata

Kakketgipa ka∙donganide Uni Pagipani namnikako dakgiparangnasa ine Jisu aganaha. Jensalo an∙ching Jisuko an∙chingni Gitel aro an∙chingni janggi tanganiko Sason Ka∙gipa ine ra∙chakahaon, an∙chingni janggi tangani bewalrang dingtangatako man∙gen. An∙ching chu∙gimik gital daktaigiminrang ong∙gnok (2 Korinthirangna 5:17). An∙ching katchae Uni ge∙etanirangko rakkitokgen (Johan 14:15), Uni skako dakgen aro Ua jechi dila kusi ong∙en ja∙rikgen (1 Pitor 2:21). Uni chu∙soksranggipa cha∙katpilani bil (Philippirangna 3:10) an∙chingko Uni bimangona dingtangatgen (2 Korinthirangna 3:18). An∙chingni janggi tanganio Uni rasongarigipa tom∙tomanian gapaignok (Johan 14:27). Uni Gisikchi Jisu an∙chingo dongkamon (Ephesusrangna 3:16, 17), an∙ching “pilakkon dakna” amgnok (Philippirangna 4:13) aro “amgijani mamungba dongjawa” (Mati 17:21).

Aiao Inmanpile Kakketgipa Ka∙dongani aro Tol∙mikgipa Ka∙dongani (Dingtanggrikani)

An∙ching Jokgipani jeona dilaniko ja∙rikode, Uni jakoniko darangba an∙chingko ra∙sekna man∙jawa (Johan 10:28) aro uko dakanina janggini mukut an∙chingna sengsoenga (Parape∙a 2:10) ine Ua ku∙rachaka. Mairaongpile aiao inmangipa, rasongarigipa, kakketgipa ku∙rachakaniko Jisu An∙tangko ja∙rikgiparangna on∙a! Iani a∙palo ka∙donganiko ku∙rachakanirang pilakan tol∙mikgiparang ong∙a. Ua manderangko salgini bichal ka∙ramona, uamangni gimaengon, jokmanaha ine ka∙dongate dilanggen (Toe Skianirang 16:25).

16. An∙tangtangni janggi tanganio Uan Gitel ong∙a ine changipa An∙tangni kakketgipa ja∙rikgiparangna Isol maia pattian gapgipa ku∙rachakaniko on∙a?

“Na·simango nama kamko a·bachenggipa Jisu Kristoni salona kingking uko chusokatgen…. Maina An·tang namnikani gimin sikchina aro chusokatchina na·simango chu·sokatgipa Isolan ong·a” (Philippirangna 1:6; 2:13).

 

Aganchakani: Isolna rasong! Jemangan Jisuko Gitel aro uamangni janggi tanganio Sason Ka∙gipa ine changiparangna Jisuni aiao inmangipa kamrangko ku∙rachakaha jean uamangko Uni jringjrotni songnokona naljokate dilanggen. Iana bate mamung nambata dongja!

17. Iana agre maia rasongarigipa ku∙rachakaniko Jisu an∙ching pilakna on∙a?

“Nibo, Anga do·gacholo chadenge doktika; saoba Angni ku·rangko knae do·ga oode, Anga uona napanggen, aro Anga unbaksa, aro uaba Ang baksa cha·gen” (Parape·a 3:20).

Aganchakani: Jisu, an∙ching Una do∙gako ogenchimode an∙chingni janggi tanganiona napana ku∙rachaka. An∙chingni ka∙tongko Uni Gisik Rongtalgipachi doktikgipara Jisusa ong∙a. Ua – rajarangni Raja aro a∙gilsakni Jokatgipa – ka∙saa gnang aro ripeng gita, simsaka gnang dilna aro ku∙pattina nang∙ona salantian re∙baa. Namgipa, ka∙san gapgipa, jringjrongni ripeng ong∙aniko Jisu baksa man∙anio inditan jakchakgija ong∙na ba gisiko nangjana an∙chinga baditan gokagiparang ong∙a. Jisuni melibegipa ripengrangde bichalni salo jegalaniko man∙na mamung kenani dongjawa. Jisu An∙tangan uamangko An∙tangni songnokona rimchaksogen (Mati 25:34).

 

18. Nang∙ni ka∙tongko Jisuni doktikengon pangnan do∙gako ona na∙ara da∙alo basegenma aro Ua jeona dila uko ja∙rikna na∙ara skengama?

 

Nang∙ni Aganchakani: ________________

 

Aganchotani

Ian chingni tarigimin ming 27 Study Guideoni bon∙kamgipa ong∙a. Chingni ka∙sabegipa skanide nang∙ko Jisuona dilna aro Unbaksa chu∙soksranggipa gital ripeng ong∙aniko chagrongchina ine ong∙a. Chinga ka∙donga je na∙a Skigipaona salantian sepangbate janggi tanggen aro Uni mikkangpa∙an salo Uni songnokona re∙gipa dolo ru∙utgijan bakrimpagen. An∙ching ia a∙gilsako gronggrikjaode, hai an∙ching dal∙begipa salo aramrango gronggrikna!

Nang∙ni salgiona darianio nang∙ko dakchakaniko chingoniko nangnikuengode ka∙sapae chingna phone ka∙atpabo ba ong∙jaode chitti seatpabo.

---

Nang·ni Sing·anirangna Aganchakmanaha:

---

1. Isol, Pharaoni ka∙tongko rakataha ine Sastro agana (Re∙ongkata 9:12). Iakode ong∙ean nikja. Iani miksongania maia?

Aganchakani: Salni sakantini kosako aro pilakchinan teng∙sua gita, Gisik Rongtalgipa pilak manderang baksan mol∙molaniko daka (Johan 1:9).  Ua apsan salan a∙kakiko rakata aro waxkoba jrongata. Uni mol∙molanirangna an∙chingni aganchaka ba jegalanio pangchake Gisik Rongtalgipa an∙chingni ka∙tongrango dingtang dingtang kamrangko ka∙a. An∙ching ra∙chakode, an∙chingni ka∙tongrang rinokatako man∙a aro an∙ching chu∙gimik dingtangataniko man∙gen (1 Samuel 10:6). Indiba an∙ching jegaljringode, an∙ching ka∙tongrang rakatako man∙gen (Zekaria 7:12).

 

Pharaoni Aganchakani:

Chong∙motde, Pharao an∙tangan an∙tangni ka∙tongko Gisik Rongtalgipako jegalkamjringe rakataha (Re∙ongkata 8:15, 32; 9:34). Indiba uni ka∙tongko Isolni rakataniko Sastro agana maina Gisik Rongtalgipa, Pharao baksa mol∙molengachim. Pharaoni jegaljringahani gimin, salni a∙kakiko ra∙kataha gita uni ka∙tong rakaha. Pharao knatimgenchimode, salni waxko rinokataha gita uni ka∙tongba rinokgnokchim.

 

Judas aro Pitor

Kristoni sninggiparang, Judas aro Pitor ia apsankon dakmesoka. Uamang sakgnian ka∙oksipile grapna nanggipa papko dakaha. Saksara Jisuko cha∙bokaha aro sakgipinra jechakaha. Badia namjabata? Sawa agana man∙gen? Apsan Gisik Rongtalgipaan uamang sakgni baksa mol∙molahachim. Judas an∙tangko rakataha, aro uni ka∙tong ro∙ong gita ong∙aha. Sakgipin, jean Pitor, Gisikko ra∙chakaha aro uni ka∙tong jrongaha. Ua kakket ong∙e gisik pil·aha aro ja∙mano skangni mondolio saksa dal∙gipa skiprakgipa ong∙aha. Zekaria 7:12, 13 ko, Uni Gisikni mol∙molanirangko knachakani aro katta maniani kosako an∙chingni ka∙tongrangko rakatani gimin Isolni gisiko nange mikrakataniko poraibo.

 

2. Katta manina skang Isoloniko “chinrangko” bi∙nara namgipa ong∙ama?

 

Aganchakani: Niam Gitalo, Jisu chingrangko bi∙ani kosako indake agana, “Namgijagipa aro til∙ekgipa chasong chinko am∙a” (Mati 12:39). Ua Niam Gitchamko bilakdapate unoni skiengachim, jean ua somoio donggipa Sastro ong∙achim. Ua maiko aganengachim, uarang pilakkon uamang namedaken ma∙sitokachim. Uni aiao inmangipa kamrangkoba uamang nikachim, indimangba uamang Uko jegalaha. Ja∙mano Ua indake aganaha, “Mose aro katchinikgiparangko knachakjaode, indide sigimrangoni saksa tangchapiloba uamang skiako ra∙chakjawa” (Luk 16:31). Sastro an∙chingna pilakkon Sastrochi porika ka∙e nichina agana (Isaia 8:19, 20). An∙ching Jisuni skaniko dakna aro Ua jeona dila unona ja∙rikna ku∙rachakode, ong∙gijarangoniko bebeko u∙iana an∙chingna Ua dakchakgen ine Ua ku∙rachaka (Johan 7:17).

 

3. Isolo bi∙anio dakchakaniko man∙gijani somoiba dongama?

Aganchakani: Oe donga. Mande ma∙sitelen Isolna bamjaode (Gitrang 66:18) aro uko dingtangatna miksongani grian ua Isolo pattianiko bi∙ode, ua mandeni Isolo bi∙aniara gamchatani grigipasan ong∙aija, indiba Isolde uko mitchiani ine agana (Toe Skianirang 28:9).

 

4. Anga Gisik Rongtalgipako jegalanirang dongnaba dongaha aro angko kema watjawahakon ine ango jajrengani donga. Na∙simang angna dakchakaniko on∙na man∙genma?

 

Aganchakani: Na∙a Gisik Rongtalgipako jegalsrangkujaenga. Na∙a iako ma∙sina man∙gen maina na∙a papna jajrengengkua ba uko ma∙siengkua. Papna jajrenganiko ba uko u∙ianiko nang∙ona ra∙bagipara Gisik Rongtalgipasan mangmang ong∙a (Johan 16:8-13). Gisik Rongtalgipa nang∙ko watgalahaode, nang∙ni ka∙tongo papna jajrengani ba papko ma∙sina dongjawaha. Katchabo aro Isolna rasongko on∙bo! Nang∙ni janggi tanganiko Una da∙alon on∙kangbo! Aro re∙baenggipa salrango bi∙a gnang Uko ja∙rikbo aro katta manibo. Ua nang∙na cheaniko on∙gen (1 Korinthinrangna 15:57), nang∙ko mangrakatgen (Philippirangna 2:13), aro Uni re∙bapilkujana kingking nang∙ko rakkigen (Philippirangna 1:6).

 

5. Bitchil sataniko toe skianio (Luk 8:5-15), ramasamo ga∙akgipa aro do∙orangchi cha∙ako man∙gipa bitchrirangni miksongania maia?

 

Aganchakani: Sastro indake agana, “Ua bitchri Isolni katta. Aro rama rikamo donggiparang uan knagiparang, unon uamang bebera∙e jokjana gita, diabol re∙bae, uamangni gisikoniko kattako ra∙anga” (Luk 8:12). Jisu iako mesokenga je jensalo an∙ching Sastroni gital bebeni bidingo Gisik Rongtalgipani an∙chingko dakchina agananirangko ma∙siengon, an∙ching uko dakna nanga. Ong∙jaode, an∙chingni gisikoniko bebeko ra∙galna gita diabol cholko man∙gen.

 

6. Mati 7:21-23 o Uni agananirango, maikai Gitelara “Na∙simangko Anga pangnaba u∙ikuja” ine manderangna agana? Isol sakantikon aro pilakkon u∙ia inesa angade ma∙siachim!

 

Aganchakani: Iano Isol dingtangmancha ripengtang gita sakoba u∙ianikosa aganenga.  A∙gilsakni ripengskarangna gita jensalo an∙ching bi∙anio aro Sastroko skie ra∙anio ba poraianio, Uko ja∙rikanio, aro an∙chingni sukrang aro dukrangko Unbaksa parake sualrimanio salantian Unbaksa agangrikanirango an∙ching Uko ripengtang gita ma∙sina man∙a. “Na∙simangna Angni ge∙etanirangko na∙simang dakode, na∙simang Angni ripengrang ong∙a” (Johan 15:14) ine Jisu aganmanaha. Je manderangkon Mati odai 7 o aganachim, uamang Uni Gisik Rongtalgipako jegalgiparang ong∙a. Uamang “papo donge jokataniko” ba “an∙tangni kamtangchi jokataniko” man∙na rim∙kingkinggiparang ong∙a – je uarangoni minggnian Jisuko nangjachim. Uamanga paltangni Jokatgipako ma∙sie ra∙na Jokatgipa baksa somoiko re∙atgijagipa, an∙tangtang dakdraaigipa manderang ong∙a. Uni giminsa, Ua uamang baksa An∙tangni ripengtang gita ma∙sigrikna somoiko ra∙na man∙jaha, ba uamangko u∙ija ine Ua talataniko daka.

 

7. Na∙simang Ephesusrangna 4:30 ko talatna man∙genma?

 

Aganchakani: Ua podo indake sea, “Isolni je Gisik Rongtalgipachi piokani salona na∙simangko mohor su∙aha, Uko jajrengatnabe” [duk ong∙atnabe]. Iano Paul, Gisik Rongtalgipako bimang gnanggipa janggi ine talatenga, maina bimang gnanggipasa jajrengna ba duk ong∙na man∙a. Iana bate nangchongmotbagipara, Uni ka∙sabee mol∙molaniko jegalanichi Kristoni Gisik Rongtalgipako duk ong∙ate re∙ekatangna man∙a ine Paul kimkime aganenga. Jedake bia ka∙e donganio saksa sakgipinni kosako jegaltaitaiani dongode jringjrotna ekgrikatna man∙a, uandaken an∙chingni Gisik Rongtalgipa baksa nangrimanioba Uni ka∙sabee mol∙molanirangko an∙chingni jechakkam∙jringanichi pangnajolna ekgrikatna ama.

---

Nipiltaianiko Dakani

---

1. Jedakgipa papba Isolni kema watna man∙gijagipa ong∙na amaia. (1)

_____ Ong∙a.

_____ Ong∙ja.

 

2. Gisik Rongtalgipani kosako papko dakaniara ___________ ong·a. (1)

_____ Mande so∙otani.

_____ Isolko sao on∙ani.

_____ Gisik Rongtalgipako jegalani.

 

3. Gisik Rongtalgipako basakobade duk ong∙bee papioniko ekatna nanga maina (1)

_____ Gisik Rongtalgipao minggipin dakgni kamrang gnanga.

_____ Papini namgijagipa bewalni gimin Gisik Rongtalgipao kakketgipa ka∙onangani donga.

_____ Isol Uko minggipinko dakchina agana.

_____ Uni mandera∙bee mol∙molanirangna papi nagokgipa ong∙aha.

 

4. Jensalo an∙ching ma∙sibatengon papko dakangkuanichi Gisik Rongtalgipako “kimitna” man∙a. (1)

_____ Ong∙a.

_____ Ong∙ja.

 

5. Jedakgipa pap ba kal∙stapanikoba anga iako dakgenchimode kema watna man∙aia (1)

_____ Uani gimin anga chu∙onga gita Isolo bi∙genchimode.

_____ Kakkete Jisuna uko ku∙rachakode.

_____ Adita salrangna okumu chakode.

_____ Kakkete sakkiko on∙ode.

 

6. Gisik Rongtalgipa gride, darangba papko u∙ina man∙ja, ba darangba dingtangna man∙ja.

_____ Ong∙a.

_____ Ong∙ja.

 

7. Basakobade janggi jokatanina ka∙donganiara tol∙mikgipa ong∙na man∙a. Mitam manderang jemangan an∙tangtangko jokmanaha ine bebera∙achim, chong∙motde gimaengasa. (1)

_____ Ong∙a.

_____ Ong∙ja.

 

8. Johan 16:8, 13 o pangchake, Gisik Rongtalgipani kamrangko basebo. (2)

_____ Angko git ring∙na skia.

_____ Katchinikani gisikko angna on∙a.

_____ Angko kusi ong∙e rakkia.

_____ Angna papko u∙iata.

_____ Bebeona angko dila.

 

9. Jensalo Gisik Rongtalgipa angni janggi tanganio gital bebeko ba papko u∙iatahaon, anga (1)

_____ Iani bidingo pamongo sing∙sandina nanga.

_____ Montol dakgipako re∙ange am∙na nanga.

_____ Isolo chinko bi∙na nanga.

_____ Chakchikgija Gisikni dilaniko ja∙rikna nanga.

_____ Tangka bisilko godoe nina nanga.

 

10. Maina Daudara uoniko Gisik Rongtalgipako ra∙angjachina Isolo mol∙molbeaha? (1)

_____ Maina Gisik Rongtalgipa uni knalko kal∙na gita uko dakchakachim.

_____ Maina Gisik Rongtalgipa uni janggiko ra∙angnaba donga ine ua kenaha.

_____ Maina Gisik Rongtalgipa uoni re∙anggenchimode ua gimagipa mande ong∙aignok ine _____ ua ma∙siachim.

 

11. Mati 7:21-23 ni gita, Jisuni bimungo aiao inamngipa kamrangko dakanichi, korerangko a∙rikanichi, katchinikanichi aro Uko Gitel ine a∙kanganichi bichalni salo mande chu∙ongipa ong∙jawa ine ong∙a. Maia namen nangchongmotgipako Jisu iano agana? (1)

_____ Bang∙e sakkirangko on∙china.

_____ Manderangni nikrangaro Isolo bi∙china.

_____ Okumu chakjringchina.

_____ Gilja re∙jringchina.

_____ Salgio donggipa Paani namnikako dakchina.

 

12. Gnigipa Thessalonikarangna 2:10-12ni gita, bebeko ra∙chakna jechakgipa manderangna mai ong∙gen? (1)

_____ Indiomangba uamang jokatako man∙aigen.

_____ Uamangni chanchianirangko dingtangatchina Isol agantaigen.

_____ Isol uamangna namen brangbeaniko watatgen, aro uamang tol∙napanikon bebe ong∙a ine bebera∙gen.

 

13. Jensalo Isol bichalni somoio, “Na∙simangko Anga pangnaba u∙ija” ine agangen, Uni miksonganiara (1)

_____ Ua manderang sawachim Ua uko ma∙sija ine ong∙a.

_____ Uamangni mikkangrangkode ma∙siengachim, indiba Ua bimungrangko gualaha ine ong∙a.

_____ Uamang pangnaba paltangni ripengtang gita Uko ma∙sie ra∙na somoiko jakkalja ine ong∙a.

 

14. Jisu, Niam Gitalo, chinrangna bi∙anirangko jegale skia. (1)

_____ Ong∙a.

_____ Ong∙ja.

 

15. Uni Gisik Rongtalgipachi Jisuni nang∙na aganengon na∙ara pangnan uko knatimna aro ra∙chakna da∙alo miksonggenma?

_____ Oe, miksongenga.

      _____ Miksongja.