Nkham khou Raguangh rui paapc rui padikmei khatni kaniu phuammei taanv taanc bammei kaidai ti hei sumaan khang ning the tiki Lot khatni kakai kaikhunc meita kanlou khang baanchara kaneic ta ndiu guang the.

Sodom khou gut mak khou banchara neic teirui maansei gin guangmei kumna kanei gut khuan the. Hougai kanmei gin neic tei raengcmun khou tat gut rap khoutei rui Lot kaneita hou the kumna mi kaidai khou gin nei rui chaeng khou zingkei pukhou bammei heigaini tuang hamh the kalam thu mi kaidai khou bammei nunc hei mei gai mak ge, Kumthina Lot rui kakai khou gin bang khang kaw lou the. Kume tiki meicsimei nunc tei rui zauc na bamme kumna tingzin kei pukhou Lot kaikhou guanglana gin neita tipat ro kaniu ningmei taanc puni tuna sa khuan the. Khoutei Lot rui heikummei na tho swlou riu tuna huai khuan e, tiki mei nunc rui nuh lou makge. Kata phau sukasi ni pui zaeng rui kainung khou zaigut louna kaniw mik tii tiatlou ngam the baanchara tei rui.

Tinggan pat pukhou baanchara nei tei rui Lot kaikhunmei ti hei “chingbut thangc pak tattho, thei ziangri laa riu theih la me tuna sa lou the.” Thaureymei 19:17. “ Kumna poubauhmei rui maic Sodom khatni Gomorah khou tingpuk thangc rui riukei the.” Thaureymei 19:24. Lot khatni kanav mivmakmei lu pui nei nadi the duak mei tiki kanou thu Sodom ta zauhan dat na teitiang guan bam du kanthe. Kumna Raguang rui sa e nkham mei tingmik guang pukhou mi kandi ni Sodom lev Gomorah tei kum puni khatni dandi ni hei tei le cham puni!

KATHAIMEI

Baibal text guai palana kakak khou hisuk gut tho.

1. Meigai makmei nunc ta sumut nimei hei tabui kaidai neic rui su nchinclou bo?

2 Pitor 2:6 Ravguangc latzan ___ khatni ___ ruc khou keilouna mi kaidai kanei tei mai rui swmaan kan the, kumna mi hei Rav ta thaimak mei nunc khang sw nchinlou pui tuang sw bam e.

THAILOU KHANG: Ravguangh rui mi kaidai nei tei tingsaengzaeng mai rui sumaan kan kum meic gaimak mei guay tei ni maikuam khou swmaan lou puni.

2. Tabui gankhou meic gai makmei nunc ta tei maikuam khou swmaan puni bo?

Pitor 2:9 Poubauhmei thu ravningmei nunc ta … meicsimei nunc ta ___ tingmik tangmak saanv dandi tii khang daeklou na bam e.

Jahon 12:48 ___ ___ ai rui sa pat kanmei lat guay tei rui latzan sw puni

Metthiu 13:40-42 Hei tei kum puni ___ hei ___ pukhou. Meic Nac Mpouh rui katuang baanchara nunc ta thouc pat puni … kumna riakdanv tuanliam bammei nunc ta khuam kaduai puni, kumna maikuam khou phai lou puni.

THAILOU KHANG: Karu khou mei Baibal text hei rui than thiakna dinclou e. meicsimei nunc tei nkham mei latzan kandi luai pui nungc rui maikuam khou phaiclou puni, theic rap khou hamh e. Mi rui samei thu meic gankhat na sini mai kuam khou ntauh tei bam makge. Latzan luai maksaan meic gankhatna ta sini dandi ti nituang hamh e tumei thanc na thai lou kho. Meic nunc suan phangc nimei nic dandi phangc nimei nic Jisu kanei suna guang pukhou rui khang de mi hu khou hamh e. (Ndauhloumei 22:12)

3. Meicsimei nunc theic kanmei maikuam khou bam mak he tu e thei kaniu tabui thangc bam lana?

Jahon 5:28, 29 Kagan hei guang puthe thou puni ___ khou ___ guay rui kakhwan chuna ringc thau puni … simei taancloumei guay rui Latzan khang ringcthau puni.

Job 21:30, 32 Meicsimei guay ta dandi tii khang daeklou bam e ... katuang bam thangc puantat puni khatni ___ ta gaek lou bam puni.

THAILOU KHANG: Baibal khou hilou e, meicsimei theic kanmei nunc tei kandi luai pukhou ringcthau dat puni kaniw tuang tarou khou rui. Kaniw Jisu khuan chulana kaniw tarou khou pat puni maikuam khourui hamh me.

4. Paapc tuang taanphi thu tabui tha?

Rommei 6:23 Paap tuang taanvphi thu ___ e, tiki Raguangh tuang kipat thu Poubauhmei Jisu Khrista khou rui ringcsuangmei panti laa puni.

THAILOU KHANG: Paapc tuang taanvphi hei maikuam khou tingsaengzaeng tei bam ni tuang hamh e tiki theic puni. Meicguay na neikhat thu theic nimeisin de (Ibrimei 9:27) tiki meicsimei nunc ramtheih thu maikuam khou theic puni, hei tei theicliang kaneic mei tuna kauh e. (Ndauhloumei 21:8) Theic reymei khou rui thu meic guay na ringcthau dat punide dandi phang khang ni suan phang khang ni, tiki theic liang kanei mei khou rui thu ringcthau dat zat khang hamh the. Mi hei luai mei dithe, hei tei hamhna maikuam khou theic dat mak na rou bam e thei Jisu paapc khang i theic lou mak e.

5. Meic guay narui kappa khang chaeng kanei na de, hei kiu tabui tha?

Jahon 3:16 Thou puni lummei guay rui ___ khang hamh the tiki ___ laa puni.

THAILOU KHANG: Purgatory hamh e thei (Limbo) theicmei bumaengh bamc bamv — Taruairam nai e tuna dinc bamc mei hei nthanmei Latrik khou rui hamh e. Baibal khou thu chaeng kanei nade kappa khang—ringc suangmei panti hamhe thei tingsaengzaeng theihmei. (Riakdanv Kaluaimei 30:15)

6. Meicsimei nunc ta maikuam khou takum puni bo?

Kalumlu 37:10, 20 Kagan katit na khang de, meicsimei nunc tei naidat nituang hamh the ... Kumme tiki meicsimei nunc ___ puni …. maikhou kumc puni.

Malakai 4:1, 3 Meicsi meicroucmei tatei napgou raw kumc raw nimei ganv guang puthe. Mi nungc kiu kaniw ta ___ ___ kanpuni the. Kaniw ta tei mbut ta kumc nangniw rui nibin bam puni the.

THAILOU KHANG: Meicsimeinunc ta maikuam khou raw mutsut na maikhou suna maan kan nithe. Mbut na khang dithe naibam nimei.

7. Maikuam kiu tabui tun naibam puni bo?

Ndauhloumei 20:9 Kaniw ___ kapwm khou patna, nthanmei nunc kaidai ta ding haeng the. Tiki tingkauh thangc rui mai ti keyna kaniw ta raw mutsut the.

2 Pitor 3:10 tingpuk khou naimei guay hei chaeng maan kan puni, khatni ___ lev khou tei taanc lou bammei taanc guay tei raw mutsut kan puni.

THAILOU KHANG: Maikuam hei mi kandic khou puni kalam thu mi kandic ta de mairaw nimei.

8. Maikuam hei Diabol banc khou dai?

Ndauhloumei 20:10 Khoutei kaniw ta guatmei ravsi ta tei maipu rui chuang bammei maizeic khou ___ ___.

THAILOU KHANG: Hamh! e Maikuam hei kabanvkhou hamh e, ravsi, kata tei maizeic khou phailou puni. Nkham khou kamei hei mi “kandi khou mbut supuni,” khatni Raguangh rui Seitan laam khou kum sa e “Tingsaengzaeng khang kamei naidat ni tuang hamh the.” Ezekiel 28:18, 19

9. Maikuam mai hei mit puni dai?

Isaia 47:14 Khou tei ___ ___ ti lumdat khang nai ni tuang hamh the. Mai nggaan khang ni nai dat lak khe.

THAILOU KHANG: Paapc le paaphung mei nunc khatni mi kandi namruc khou nai mei guay kaw mutsut kan pukhou mai tei karana mit kan nituang de. Mit dat makna chuang bam ni tuang hamhe. Mit dat makna tingsaengzaeng chuang bam e thei thu akumna paapc tei sumaan ngam nina! Raguangh tuang raengc thu paap tei sumaan gan khang de Ndauhloumei 21:5 khou sa e, “Zauhlo Ai ram guay tii kathan dat ngam the”

10. Meic pumc khatni bumaengh hei maikuam khou sumaan ngam puni dai?

Metthiu 10:28 Meipumc ta suluai ngam sini bumaengh ta thu swluai ngam makmei nunc ta tei ping riu; tiki ___ tani ____ tani maikuam khou swmaan ngam meipu ta ping o.

THAILOU KHANG: Meic mpeinac rui bumaengh hei thu theic zat makge tuna lumbam e, tiki Raguangh rui thu luan neic sa e, “Paapc taanc mei bumaengh thu theic puni.” Ezekiel 18:4, 20. Hei kumna Nthanmei Latrik thei laina, meicsimei ta thu pumh khatni bumaengh tei maikuam khou sumaan puni.

11. Thou khang cho maikuam tii chuang nimei?

Metthiu 25:41 “Sianglou mei nunc, akhou rui tat pat kan o. ___ lev katuang banchara nunc khang chamdannv loumei tingsaeng mai thangc tat kan o”

THAILOU KHANG: Maikuam hei thu Seitan, katuang gaimak mei baanchara nunc khatni paapc ta sumaan khang e. Paapc tuang ravpian khou rui ai duakpat mak ethei, ai ni khou tei theic kazau puni kalam thu paapc tei sumaan gan me thei paapc rui tingpuk kandih ti hei suphuam dat kan puni.

12. Meicsimei nunc ta sumaan mei tatei Baibal rui tabui e tuna sabo?

Isaiah 28:21 Poubauhmei rui … kalung puam puni kamei rui katuang meic thay makmei taanv tei taanc suaklou puni. Kamei taanc nimei taanv tei ___ ___ baam nuh e.

THAILOU KHANG: Raguangh rui kamei nzianmei nunc ta sumaan khang ninglou ngam makge. “Poubauhmei thu … meic gankhat na sinih maan meita laa nimak ge, tiki meiguay na lungclai guang meita laa ni e.” 2 Pitor 3:9 Kamei rui taekmak na sa bam e kaniuta. “Nangtaanc simei khou rui hanh guang o, nang takumna theic nicho?” Ezekiel 33:11. Maansei ta suluai mei hei Ravguangh chunmei ramme. Kumna mi tanv hei kadat datmei taanv de. Raguang rui thu maansei ta kaanlou khang rui taanc tang mak tuang makkhe. Kumna meicsimei guay rui theih makpui hu khou Raguangh nang thu nthui ding e tuna sa puni e. (Rommei 14:11)

13. Baibal khou “sumut dat ngam makmei mai” tumei hei tingsaengzaeng mitdat nituang hamh the tutuang ham mak dai?

Metthiu 3:12 Kagung guay tei laudy bam khou rui hun ganc puni. Katak guay tei saamh khou phungc guang puni; kagung guay tei amit dat makmei mai khou ___ puni.

THAILOU KHANG: Hamh e! Amit dat makmei mai tei sumit dat ngam nituang hamh the. Kum khuan sini, ram kaguay nata tei mut kan ethei, karana amit kan ni de. Sunchinloumei Jeremiah 17:27 khou Raguangh mei rui lat piu mak e thei kamei rui Jerusalem khou mai chuan lou puni kumna mi mai tei gankhat na rui sini “sumit ngam mak puni.” Kumna Nthanmei Latrik khou kum sa lou mei tei pat kan e. “Kaniu rui Ravkai tei mai tei kanthe” raengh guay tei subou ngam the, kumna guangh kai nunc tei mai rou ngam the, Jeremiah muang khou rui Raguangh rui sa kan kum na 2 Kinchak 36:19, 21. Ram kaguayna tei mut maksan mai tei sumit dat ngam mak ge tiki tei mut ngam mei tangc mai tei kanrana mit kande. Mi mai tei asei chuangc bam mak khe.

14. “Tingsaeng mai” samei hei “Ngandat mak ke” tutuang dai?

Judah 7 Sodom lev Gomorrah … meic guay khang sw-nchinmei tuang suna ___ ___ ryanra khaengv the.

THAILOU KHANG: Baibal rui karana rui kalam ta samei su diu. Mituang Baibal bamv khou rui sa e, Sodom lev Gomorrah ti hei sw-nchinmei suna (Maikuam) tingsaeng mai tei rui kaw mutsut kan the, tiki mai tei ntao thu chuang bam makkhe. Kaidai nunc tei mbut nguan kanthe. (2 Pitor 2:6) mi hei tingsaeng mai e tiki mit kan the. Mi mai rui raw mut kan meitei thu tingsaeng khang the nai dat ni tuang hamh the

15. Ndauhloumei 20:10 khou meicsimei guay ta “tingsaeng mai” khou rynra khaeng bam puni tu e, mikiu kagan taek dat makna khatni ngandat tuang makna raw bamv puni tu tuang hamh mak na cho?

Jonah 2:6 Karaengc kaikham laanlou ___ zat makmei (forever) kandi thangc key the.

THAILOU KHANG: HAMH E! Jonah rui khav bunglung khou kalaanv kathum khatni zingbang kathum na de bamc mei (Jonah 1:17) kumme tiki “tingsaeng” tuna sa e. Suaimakge kakhang tei “tingsaeng” kum kan the. Ndauhlooumei 20:10 khou tei “tingsaeng” tuna hanlou mei tei Grik mei lat khou thu “aion” tu e. khoutei rui ‘eon’ tumei lat kaeng hei pat tuang e. Mi lat kaeng khou rui kagan hei san tuna dinglou makmei kagan hei zuh ramethei kagan asan puni cho salou makmei khou mi lat kaeng tei sinsu e. Baibal khou “tingsaeng”(forever) tumei hei 56 nai e tiki hei guay tei nganlou ngam kan the. Tingsaeng (forever) tumei hei latpiu mei bangpu ringcbam san ta ni e (Tatpatmei 21:6), khatni kabam baimei khou dat rui ‘tingsaeng’ (forever) hei kiinc ru tuang e (Riakdan Kaluaimei 23:3). Kumna maansei sumei khou thu ‘tingsaeng’ (forever) hei ‘ringcbam san’ tuna ni siinsu e. (I Samuel 1:22, 28).

16. Paapc khatni paapc mei ta sumaan mei tangc Jisu rui kamei nun khang tabui taanclou puni bo?

2 Pitor 3:13 Aniu thu Ravguangc rui aniu khang nrianhloumei, ravchaptatmei bamv, tingkauh kathanc khatni ___ ___ ta nkhwan bam.

Ndauhloumei 21:4 Ravguangc rui kaniw mikdui roulou puni. Theihmei, zaengsimei kapmei, ___ naidat lak khe. Reynungc tuang guay tei maan ngam kan the.

THAILOU KHANG: Su nthanloumei kandic mbut ruc khou Ravguang rui tingpuk kathanc khatni kandi kathan damclou puni. Tingsaengzaeng, sangam makmei neihla nchu nzaeng mei rui duan suna lungh khang kamei rui latryn sulou e

17. Paapc hei nai dat puni dai?

Nahum 1:9 Ryanra ryanru mei ___ kaluai dat ni tuang hamh the.

THAILOU KHANG: Hamh e! Latryan hei nthan thiak de. Paapc tumei nai dat ni tuang hamh the.

Isaiah 65:17 Zauhlo! ai rui tingpuk kathan khatni kandi kathan damclou the. Kumna karan ta ningtou dat nituang hamh the, ram e thei lungning khou ni guang dat ni tuang hamh the.

18. Job rui tabui lat thanc than kan bo?

Job 4:17 Maansei rui Ravguangc suangc ___ tat ngamna cho?

THAILOU KHANG: Nang nah rui meidow e thei, kata dandi ti khang nang ning dai? Ngaui kum puni de, Tiki kata ringh mai raw na zaaeng neikhat na sini rianra khaengv diu khang tho? Hei tei thu nu niituang hamh e. Nangrui heitei zau ngam ni tuang hamh e. Kumna nzianmei Poubauhmei rui ni kana nunc ta hei kumna rairu bam meita zauh ngam ni tuang hamh e. Heitei thu Rih khou sukasi bammei khang suang sinih si hian kanpuni e. Ravguangh kiu hei tei kummei dai? Hamh e! Tingsaeng maikuam khou ngan dat tuang makna raw na bammei tei nzianthaimei Ravguangc rui tabui nungc sini zau ngam ni tuang hamh e khatni hei tei thu nthui mei zianthaimei Racguangc tuang kheiliak ram the.

NANG LAT DAUH

Ramguay na khang suang, Jisu rui thu katuang himdaimei guangdic khou nangta tii lungc ni e. Kamei rui chandaanvlouomei kai khou tihei nang guang bam diu khang kamei tari na bam e. Kamei rui tau nang khang ti bammei kaipat ta laa lou nitha?

MUNDAUH: ___________

TITHAI NBUH LOU MEI

Kathai nbu khang tithai kasuan lou mei.

LUNGGAI MEIPU LEV LAZARUS

Meic gei thu lungggai meipu lev Lazarus kanei tuang latgiam khou rui maansei theic rap tingkauh ram e thei maikuam tat the tuna mi latgiam khou dingna sa bam khuan e. Jisu rui samei thu heitei ram e mi latgiam khou. Jisu rui “maikuam” tuna samei hei Grikmei lat khou “Hades” tu e, Grik mei tuang mythology khou rairu bam tu tuang e. Jihudimei nunc kingbammei guay thu Jisu sa bam mei hei kaniu rui thaina bammei kaniu ta bapta diu khang satuang e tumei thai e. aniu rui Luk 16:19-31 khou zauc diang gut e thei, Jisu sa bammei hei mi latgiam hei kachang kaling suna laa khang hamh e tumei thai e.

• Su nchinlou khang, Guloumei guay kiu Abraham nngeng khou bam chan puni dai? Hamh e.
• Tingkauh thangc bammei nunc lev maikuam khou bammei nunc khat khat ta kachu bam puni dai? Hamh e.
• Mai zeic khou raw bammei tatei dui zoukei guat nacmei rui ti chuc ngam puni dai? Hamh e.
• Abraham rui thau ta gulou khang ram e thei thau ta kanlou mak khang kaning dai? Hamh e.

Heitei kumna, mi tuang latgiam rui thu meic theic rap, tingkauh ram ethei maikuam tat makge kaniu ta kandi luai pui nungc latzan su mak hu khou hei tei nu mak ge. Jahon 12:48 khou kum sa e, “Ai rui sa lou kanmei lat tei rui nkham pui nungc latzan supuni. Kume thei mi latgiam kabac thu tabui dai?

Lunggaimeipui hei thu Jihudi mei zat, nthanmei latrik khou nggai na bammei tei satuang e. Kumna neitu neizang na kaimun khou bammei tei thu Gentilmei Raguangh tuang lat tu tou makna bammei tei sa tuang e. Jisu rui mi latgiam hei luai kei pukhou kum sa e. “Mousi khatni Muzung nunc lat tei laa lou me thei, theih mei rui ringc thau dat na guang sabam ti sinic laalou nituang hamh e.” Luk 16:31. Kachang e, katangc thangc, Jisu rui Lazarus tihei theihmei khou rui tii ringc thau loudat re tiki Jihudi mei kapi sumei nunc geitho lum makge. (Jahon 12:9-11)