Abel rui thu Ravguangh rui salou mei kumna khaeng the tiki Cain rui thu heikum mak sini nude tuna kakhan na lat liam khuan the. Lauziu khaeng lana subam mei hei katuak katit e, ai rui ni atuang puat kat phung guang na kalum e thei luai the Ravguangh samei kahak taanh mak sini nu thi da tuna ning khuan e. Hei kumna kalou puk khou rui taanc patmei puatkat phung guang khuan the ... Khou tei kakai nac tuang khaeng mei tei mai keina teic mei tei kalung puam na ntian mei lungning pat na zauc khuan e kalam thu katuang puat kat tei thu kahilou mak tina e. Khoutei Poubauhmei rui nzian na Cain ta nanglung niam kei na lat piu o tiki Cain rui lungning taanc na nu mak khuan e. Abel rui ni kachaibung ta nzangna sa khuan e, tiki Cain hei kalung puam thou the. Kamei kalung puam mei chung kei dat mei tangc tho, Abel pumc zeic rui padik na kaphai daeng khou punlou bam khuan the. Khou tei Ravguangh rui Cain ta siang lou the. Kum ti khou Cain rui ritlang e sa tin a, Poubauhmei rui kata meic nunc rui khum laac mak khang karu khou madanc mei ti lou the.

Kumna Ndauhloumei buk khou ni nkhammei gan khou khristian mei nunc kak khou takum kalum khang khatni tabui neic kalum khang tupui zaengrui adow puni. Asaan makna meic guay na hei Ravguangh tuang seal hamh e thei khouring tuang madanc tei laa puni.

KATHAIMEI

Baibal text guay palana kakak khou hysuk gut tho.

1. khammei ntamh mei chanei (plagues) khou rui thouta gaeklou puni bo?

Ndauhloumei 7:3 Aniu Racguangc tuang bangc nunc ta kaniw ___ khou ___ namlou mak saanv, kandih, duipuihamh e thei thingbang guai tei sw kasih rio

THAILOU KHANG: Thou puni Rvguangh tuang seal kasanpiang khou namlou mei guay ta gaek loupuni mi ntamhmei bunkei mei gaan khou. (Kalumlu 91:7-11)

2. Ravchaptatmei nunc sanpiang khou namlou mei ‘seal” hei tabui cho?

Isaiah 8:16 Ravguangh rui tii loumei lat guay hei karak tiph tiplouna rylou o, khatni Aziap nunc khou ___ hei seal sulou o.

THAILOU KIHANG: Ravguangh tuang seal hei thu katuang latdanv khou nai e. Seal hei rui document ti hei official ti sw lou e – kumna khou tei kalang kathum nai e; Kazanv, (Name) kataanv (Office) khatni kamei sin bam (Territory). Ti nchinlou khang hei “Cyrus, Persia mei guangc” Ezra1:1

3. Kariak latdanv ruh pang khou seal tuang kazau mei tabui latdanv khou cho?

Tatpatmei 20:11 Ai ___ rui zaeng charuk lungc khou kandih, tingpuk, duipui khatni mi ___ khou naimei kapum hei ___ chaneimei nungc nthaekc the.

THAILOU KHANG: Riakdanv padei mei khou na de seal khou nai mei kaguay naic mei. (1) “RINGHPOUC” ‒ KAZANV (2) “Kasiamhmei” ‒ katuang office ‒ dampou /kasiamhmeipu (3) Tingpuk kandih, duipui khatni mi lungc khou naimei guay ‒ kamei rui sinbammei (His Territory)

4. Ravguang tuang kapumtan hei tabui rui madanvmei suna kakhangc na ti lou bo?

Ezekial 20:12 RINGHPOUC ai rui kaniw ta sw nthanlou the tumei kaniw ___ bam khang, kaniw lev latdyng swloumei tuang ningtoumei swna Sabbath ngaek khang kaniw khou airui tiilou the

Ezekial 20:20 Sabbathneic hei___ nthaekmei tingmiok sw nina e, kumna hei tei rui swloumei latdyng tei ___ RINGHPOUC ai hei nangniw Racguangc e twmei amu mak khang e.

Tatpatmei 31:13 Sabbath, atuang zaengthaek tingmik tei ngaek nina e. Kalam thu ai hei nangniw ta nthanmei tiswloumei RINGHPOU kiu e twmei nangniw thay bam diu khang rui mi hei rui nangniw lev akak khou guang nimei kin guay khou ___ tuang sw puni the twna Israel meinunc khou sa o

THAILOU KHANG: Ravguangc rui nthan thiakna katuang Sabbath zaeng thaek hei kapwmtan rui damclou e khatni swthan lou e tumei thay khang madanhmei e. Mi hei katuang seal hamh e thei kangam tuang madanhmei e. Seal, madanhmei, giakloumei hei kummei hei Baibal khou sinsw e. (Kida zau o Thaureymei 17:11 lev Rommei 4:11 khatni Ndauhloumei 7:3 lev Ezekial 9:4)

5. Ndauhloumei 13 tuang kaneimei khouringc tei rui meic guay na ta tabui lacmak numakge tuna nam puni bo?

Ndauhloumei 13:16 Meicdaihmei, nthyammei, lungcsimei, lungcgaymei, bangh khatni nyngswmei - meic katana ta kabaanzat khou hamh e thei ___ khou ___ the.

6. Khouringh tuang madanhmei kiu tabui tei cho?

THAILOU KHANG: Ndauhloumei 13 tuang reimei khouringc kiu thu para 19 khou tei thai the. Katuang kapumtan kangam tuang madanhmei kiu thuc tabui tha? Mi tuang madanvmei thai kho tu e thei papacy kho thanvmei rui gayliangmei the. Catholic tuang Catechism khou hei kumna hylou bam e.

Q. Sabbathneic kiu tabui neic cho?

A. Tingkuneic (Saturday) hei Sabbathneic e.

Q. Kume thei tabui suna tingkuneic (Saturday) khou nthaek makna Neihneic (Sunday) khou nthaek tuang?

A. Tingkuhnei (Saturday) khou hamh makna Neihneic (Sunday) khou nthaek bammei thu Catholic phuamling rui Tingkuhneic khou rui Neihneic khou nthaek khang ti kalaic lou tuang de.

Q. Khum ngaic khatni latdanv hei phuamling rui tikai tuang de tumei kiu nang takum na ti nchinc ngam nina?

A. Kamei rui kangam mak khuan e thei takumna ntauc kan ravningmei nunc nuna bam tuang - kamei Neihneic kanitdak tuang reyliang mei tingmik ngaek khang ti kalai lakni tuang de - Sabbath tingmik kaniitdak tuang chanei mei tiingmik khou rui kalam thu nthanmei latrik khou kalai khang ngamv ti lou zat makge.

Kumna papacy rui sabammei heicthe. katuang pumtan, kangam kiuthu Neihneic (Sunday) ta sw nthan lou mei hei the - kandihmei guay rui ti kalai lou mei ta lai laa ngam the. (Zauclou o tithai Nbuc loumei “ Protestant mei nunc ta tabui nthukmei lat than thanv bo?

7. Khouringh tuang madanvmei hamh e thei Raguangh tuang seal hei hou puni dai?

Ibrimei 10:16 Poubauahmei rui sa e, Ai rui atuang latdanv guay kaniw ___ khou lou puni, kaniw ___ khou hylou puni.

Ningtingdync 9:10 Nangrui ___ taanv tei thu ranvna taanc tho.

Tatpatmei 13:9 Mi hei rui nang baanv khou ___su khang e khatni nang mik kanei kak khou ti ___ sw bam khang e. Kum pukhou Poubauhmei tuang latdanv tei nang muang khou naibam puni e.

Isaiah 59:6, 7 Kaniw taanv tei simei rana de, kaniw ___ thu sicmei ravnac, nangniw tatlou bamv kathuic khou sw kasic karoucna ganclou the.

THAILOU KHANG: Khouringh tuang madanvmei bam puni Ravguangh tuang seal bam puni meic gaanv khat na rui sini paeng khou hou nituang hamh e. Sanpiang samei rui lungning ta satuang e khatni baanv samei rui taanv ta sa tuang e. “Baanv khou” khatni “mik kanei kak khou” samei hei nthanmei latrik khou meic akhat tuang lungning khatni kataanv ta sa tuang e. (Tatpatmei 13:16; Riakdanv Kaluaimei 6:8; 11:18). Meic gankhat rui khouringh tuang madanvmei hei kasanpiang khou lou puni samei hei Baibal khou nchummei ta thai bam sini Neihneic hei nthanmei tingmik suna laa bamc mei tei e. Kumna kabaanc khou lounicmei thu Sabbathneic taanv taanc bammei hamh e thei katanc khang rui hamh e thei kakai kaikhun khang ppaeng khou Neihneic nthaek bammei tei e. Nguay madanvmei hei thu meic mik rui how ni tuang hamh e. Ravguangh rui thu thou thou tabui madanc phung bo tumei thai puni. (2 Timothi 2:19) Kalingvna sa pukhou karana rui mi tuang hiak kiu phung kan puni. Ai ruina Raguangh tuang Nthanmei Sabbath ti hei kungna sw e thei kana suna kamei rui kaolou puni. Hamhna ai rui khouringh tuang nkhuay mei Sabbath ti hei machaungbam ti thei, kamei rui katuang the tuna madanc lou puni.

8. Aniu hei katuang e tumei Jisu rui takumna chaak bo?

Rommei 6:16 Nangniw ta gaanv khat khou bangh swna tiilou pwkhou, nangniw hei kalat ___ bammei nangniw kaipouc bangc tei the twmei nangniw thay e.

Jahon 14:15 Nang ata nzian e thei alatdanv guay ___ puni.

9. Ntau khouringh tuang madanvmei phangcmei nai tha?

Ndauhloumei 13:17 Mi khouringh zanc tei hamh e thei mi zanc tuang sing tei madanclou makmei meic gaanv khat na sini ramh ___ nuh makge, ___ ni liu nuh makge.

THAILOU KHANG: Meic gaanv khatna sini ntau madanc lou mak he. Mi hei lamak nuh makge khatni laac makmei nunc ta ramh zuan khang nuh makge, liuni liu nuh makge twna sw pukhou rui madanc lou puni. Mi ganv khou Sabbathneic ngaek bammei nunc ringhpan khou rianra mei ariu puni. (Ndauhloumei 13:15), khatni Raguangh tuang nthanmei tingmik ta swphuam khang kappa kan pu khou khatni maansei tuang latdanv rui Raguangh tuang latdanv ruc khou lou khang baanv ti pu e thei, kata Khrista nuhmuc mei liang liang mei tuna madanc lou puni. Thoupuni Jisu lat piuna katuang nthanmei tingmik ta laalou mei nunc tei Jisu tuang hym gancmei tuang seal latou puni kumna ting saeng katuang swpuni. Kum e tiki kakak khou dingbam mei nunc tei Jisu ta houmucmei biak liangmei tuna chaklou puni. (Metthiu 12:30)

10. Jisu ta houmucmei ngamrui tabui kaneicta kalai khang karamc puni cho?

Daniel 7:25 Kamei rui ___ khatni ___ kalaikhang kakhan puni.

THAILOU KHANG: Daniel 7 rui latdyng guangc khou Khrista ta houmucmei tuang ngam ndauhlou e. Thanthiakna huthuina sa lou e, khouringh rui Ravguangc tuang latdanv khatni kagaanv kalai khang swpuni. Papacy hei rui Ravguangh tuang latdanv kalai khang karam khuan e.; (1) Ramh maengc kalum nuh makge tumei tei laa ganc kan e. Raguangh tuang latdanv kanei mei tei. (2) Latdanv padei meita ti dui lou e. lat kaeng 94 ta tachat na khang swlou e, khatni Sabbathneic hei tabui tingmik cho tumei ta ni laaganc lou e (3) kumna latdanv ruh mei tatei kanei khang ti bak lou e. Papacy rui Ravguangh tuang kagaan ti kalai khang sw e; (1) Sabbathneic khin kanit dak tuang thaureymei tingmik ti hei ngaek khang meic nunc ta cham lou e, khatni (2) ravningcmakmei nunc rui zipchung khou tingmik kalaimei, neihkei khou hamh na Rommei tuang riak ta sinsw e. Ravguangc rui kaganc ti lou mei thu kachaekneic (Friday) neikei khou rui thaucna Tingkuhneic (Saturday) neihkei mei ngan hei Sabbathneic khuane. (Levithau 23:32). Theickan nimei maansei rui Ravguangh tuang nthanmei latdanv khatni kagaan ta akumna swmaan ngam nina cho. (Metthiu 5:18)

11. Ravguangh rui reydow katuang amuc nunc hamh e thei pastor nunc ta akum giat kan bo?

Malakai 2:8, 9 Nangniw rui meic mpeyna ta ___ khou ti phausuy the … Nangniw achwn piu mak khe, khatni nangniw ___ khou gusuh gasuh the.

Hosea 4:6 Amei nunc hei mut the kalam thu kaniw ata thaylou mak khe. Nangniw rui thay zih the kumna amuh khou rui lagaanc pat lou the. Nangniw rui ___ ta ___ pui zaeng rui nang nah nunc ta ni amu kan ni the.

THAILOU KHANG: Ravguangh ta peina ti kabiu bamme katuang latdanv tachat, chakuc ta gusuv gasuv lana meic mpeyna ta Sabbath Nthan na ngaek nimei ta ti phaysuy bammei pastor nunc ta. Phuamling guay rui thu Neihneic (Sunday) ngaek khang Baibal khou thu hylou mak ding e tuna hylou bamgei de. Protestant mei nunc nic Catholic mei nunc ni Baibal tuang Sabbath tihei laa ganv pui zaeng rui Ravguangh tuang latzan bam paeng hu khou nkhuayna dingc puni. Ravguangh rui Sabbath tiloumei tho, madanv mei suna, katuang kapumtanc rui damclou e khatni suthanlou khang kangam nai e khatni gulou khang ni (Tatpatmei 31:17; Ezekiel 20:12). Thou cho daihkanmei ta ramvsakc makna kahu khou ding ngam nimei maansei kiu?

12. Reydow Ravguang tuang kapi swmei nunc rui daihkanmei latdanv ti hei takum sukan bu cho?

Hosea 8:12 Kaniw ta nchamlou khang kasing thay makmei alatdyn ai rui hylou the, tiki kaniw rui mi guay tei ___ mak khe.

THAILOU KHANG: Kagaanv hei kalai makge. Ravguangh rui Sabbath tilou bam e. Katuang daikancmei madancmei katuang riakdanv guay tuang kachung khou kahou rap khou “ningtowna bammo.” tiki mei mpeyna rui aseic katuang chanei mei tingmik Sabbathneic ti hei laa zih bam e.

13. Ravchap tuang kapi sumei nunc ta Ravguangh rui katuang nthanmei Sabbath tuang laam kho kaniu ta tabui tun mphut kan bo?

Ezekiel 22:8 Nthanmei bamv guay ta nangniw ___ sw mak khe, Sabbath ni ngaek mak khe.

Ezekial 2:26 Amuh nunc rui atuang ladanv swbak the khatni nthanmei puat ta chakhwang sw mak khe. Nthanmei nthan mak mei ni ___ tuang maek khe. Khatni kaniw rui Sabbath ta ___ mak khe. hei zaeng rui Israel mei ata chakhuang sw mak khe.

THAILOU KHANG: Ravguangh rui rachap tuang kapi nunc ta Sabbath hei thu kage mak khe tulana “RINGHPOUC rui sa e” tuna nchum makmei ta sabam mei nunc ta mphut the.

14. Tabui paapc ta gaanc pat ro tuna ravchap tuang kapi sumei nunc ta Raguangh rui sa bo?

Isaiah 58:1, 13, 14 Nang khwan kauc ranvna kauc o! Amei Israel mei nunc khou kaniw tuang ___ guay tei dinclou tio! nangniw rui Sabbath neic ti hei nthanmei swna sw e thei kumna mi nungc tei nang khang ___ karam makge thei; khatni Sabbathneic ta ___ sw laana atuang nthanmei tingmik ti hei champouh na sw e thei, Asiamruai swmei khou naimei neihla kiu nangniw laatow puni.

THAILOU KHANG: Bumaeng tuang kapi swmei nunc ta Raguangh rui Sabbath sw bakmei hei nthanna ngaek o tuna sa e. Reynung ziab nunc tei kumna sa e maansei lat piu mei khang suang Ravguangh lat piu kan ni de. (Latdiumei 5:29)

15. Nangrui Jisu ta laalou na kathei lay ni the tu pukhou, tabui pat kan bo?

Metthiu 11:29 Atuang puat hei nangniw laa thauna phungc o, kumna akhou rui ncham o. Kalam thu ai hei lung nzaenghmei e khatni lung niamhmei e. kumna nangniw ___ laatow puni.

THAILOU KHANG: Nang lungh lai rap pukhou hymgaan mei nchu nzaengmei khatni zaengthaekc mei nang lungh khou gut puni. Sabbath, mikiu thu “zaeng nthaekmei,” mi hei puanthanmei khou rui guangcmei chuzaengmei khatni zaeng nthaekcmei tuang maengc e. (Ibrimei 4:1-10). Thou puni kachang changcna puanthanmei nunc rui Sabbath zaengthaekc ngaek puni, hei kiu thu guigaimei zaeng thaekmei tuang madancmei e. (zaulou o verses 4, 9, 10). Lunghlai guangmei akhat rui Ravguangh tuang nthanmei Sabbath zaengthaek nthaekcmei ramh neihla kummei baihmei laa tow makge.

NANGLAT DAUC

Khouringh Tuang madanmei ta laa lakge sa makmei hu khou Raguangh tuang seal hei laa rey nina de. Jisu rui kaikham laanlou diu nang lunghning kaikham khou nkhuan na bam e. Nang rui na kata tihei nangta damcloumeipu khatni nangta guloumeipu swna laalou the tumei ti hou khang katuang hym gaanmei Sabbath chuangcphey bangc khou gut nitha?

MUNDAU: ______

TITHAI NBU LOUMEI

Kathai nbuc khang tithai kasuan loumei:

Protestant nunc ta Papacy rui tabui nthukcmei lat than than bo?

Protestant nunc rui kaluai dat dat na Papacy ta than e,” Nang thou cho Raguangh tuang latdanv ti kalai bam khang?” Kum e tiki Catholic phuamling rui protestant nunc ta lat than thanmei rui gut thuk ranv e. Hei khou hei kum nai e: “Nangniw rui Sabbathneic hei thu Jihudi mei nunc tuang de, tiki Khristian mei nunc tuang Sabbathneic hei thu Neihneic (Sunday) khou kalai lou the. Kalai lou the! Thou rui? Ngampari mei Ravguangc tuang latdanv ta thou khou ti kalai khang ngam nai nacho?

Ravguangh rui salou e, chaneic mei tingmik tihei nthancna ngaek o, kiu hamh e tuna thou rui sa buh na cho, chaneicmei tingmik khou tansu tanruaic na nang ningc mei taanc nuh de tuna; tiki thaureymei tingmik khou nthan na ngaek lin o? Mi hei thukliang mei lat than e nangniw takum sa dau ni cho ai thai mak khe. Nang niw hei protestant nunc the, Baibal theina laitat ni na samei nunc the; Kumsini hei di nthukmei chaneic khou neikhat nthancna zaeng thaek khang saloumei, Baibal khou thanthiakna hylou bam thiki hei tei nuhmuc na, Baibal rui samei tingmik khou hamh na tingmik baihmei khou ngaek bam mei hei takum pui tuang cho? Zaeng chaneic pui neic nthanna zaeng thaek khang tilou mei latdanv hei kariak latdanv ruh pangkhou akhat re; nangniw rui chakiu thu lumna sinbam dihe; kum thei padei mei latdanv tei thu thou rui nangniwkho sumaan gaanv khang ngam ti puna cho? Nangniw rui samei kum na, Baibal latna khang de piu khang tu e thei nang niw latdyng kathan mei khou rui tabui bam khou ti kai lou tha latdanv padeimei ti hei tumei bam chinc pui thou e!”

Ramundinc Phaeng Hou Thanranmei, Lesson 20 ©2022 Amazing Facts International All Rights Reserved