Download

Nang·ni namnikbatgipa jila ba songjinmao sorok ting·kolokani, gari gorarangni wil·watani, moila ong·atani, ba jedakgipa dosi dakanirang mamungba dongsrangja ine chanchichipate nibo! Ian ong·na amgipa ong·ama? Sastro, sorokko sonachi angipa songjinma damsani gimin agana! Aro uni changrogipa pakmarangko gamchatbegipa ro·ong, grikgipa jasperchi tariachim, saksa mandemangba uano gusuani, atchingani, ba sordi man·anian dongjawaha. Sakantian an·sengbaljokanio chu·soksranggiparang ong·gen aro saksa sakgipin baksa namrim meligrike katchagen. Ia songjinmaona na·a re·e nina skama? Na·a re·ange ninasan mangmang ong·aija, indiba uano na·a songdongna man·gen! Maikai man·gen uko ma·sina gita poraiangkubo….

1. Ia bebera·na ampilgijagipa, aiao inmangipa songjinmani architect aro uko rikgipara sawa?

“Isol uamangna, chong·motan, uamangni Isol ine mingako man·na kratcha·ja; maina Ua uamangna songjinmako daksoaha (Ibrirangna 11:16).

Aganchakani: Isol An·tangni manderangna namen aiao inmangnigipa aro dal·gipa songjinmako riksoenga – aro uan a·gilsakni gipin songjinmarang gitan chong·motgipa ong·a!

2. Ia namen aiao inmanpilgipa songjinmara banosa?

“Aro anga rongtalgipa songjinma, Jerusalem gitalko, Isoloni salgioni ong·onako nikaha” (Parape·a 21:2). “O angni Isol Jihova….Nang·ni dongram salgio Na·a knachakbo (1 Rajarang 8:28, 30).

Aganchakani: Ia somoio, ia rongtalgipa songjinmako salgio rikenga.

3. Ia namen aiao inmanpilgipa songjinmako Sastro maikai talataniko daka?

Aganchakani:

A. Bimung

Ia songjinmako “Gital Jerusalem” bimungchi mingaha (Parape·a 21:2).

B.Bimangni Dal·a

“Aro ua songjinma kitik brichim, uni gro badita gipengba indita, aro ua ua ongjinmako tiluchi stadia hajalchi·gni toaha, uni gro aro gipeng aro chua apsan” (Parape·a 21:16). Ia songjinma chu·soksranggipa square ong·a. Uni rikingni ro·aniko toaniara stadia 12,000 ong·a – jean 1,500 milerang baksa apsanachim. Uan paksamprako 375 milerang ong·e ro·achim!

B. Guarerang

“Aro ua uni guareko mik ritchasa sotbri bri toaha, mandeni, chong·motan sa·greni toa gita. Aro uni guareko rikani jasper ong·achim” (Parape·a 21:17, 18). Guare mik 144 ong·e rikdoako man·aha – uan feet 216 chu·gipa ong·a! – jean songjinmako duulachim. Ua guarerang talatna amsokpilgijagipa teng·suani aro nitoani baksa grikgipa jasperchi rikgiminrang ong·achim. Iani gimin chanchiate nibo: gadang 20 ong·nasipile chua aro grikgipa jasperchi rikgimin ong·a!

C. Cholguarang

“Uni dal·gipa aro chugipa guare gnangchim; uo cholguga damchi·gni gnangchim; …. salamchi cholguga damgittam, aro salgrochi cholguga damgittam, aro salgipengchi cholguga damgittam, aro saliramchi cholguga damgittam…. Aro ua cholguga damchi·gni mukta dotchi·gni; cholgugaprak mukta dotprak ong·a” (Parape·a 21:12, 13, 21).

 D. Pangchakanirang

“Aro ua songjinmani guareni pangchakanirang ge·chi·gni…. Aro ua songjinmani guareni pangchakanirangko pilak gamchatgipa ro·ongchi nitoataha. Skanggipa pangchakani jasper ong·achim; gnigipa, sapphire; gittamgipa, kalkedony; brigipa, emerald; bongagipa, sardonyx; dokgipa sardius; snigipa krysolite; chetgipa beryl; skugipa, topaz; chikkunggipa, krysoprase; chi·sagipa jasinth; chi·gnigipa, amethyst” (Parape·a 21:14, 19, 20). Ua songjinma chu·gimikgipa 12 chu·soksrangipa pangchakanirang gnangchim – ge·prakan gamchatgipa ro·ongchi rikgimin ong·a. Sundareni rong mingantikon donachim, uni gimin chel·aonin ua songjinmako sundareo neng·takenga gita nikatachim.

 E.Ramarang

“Aro songjinmani rama, grikgipa janera gita, rongtalgipa sona” (Parape·a 21:21).

 F. Nikani

“Rongtalgipa Songjinma, Jerusalem gitalko, Isoloni salgioni ong·onako nikaha; ua setangna tarisogimin namchik gita tarisoa….uni seng·a gamchatbatgipa ro∙ong gita, krystal gita grikgipa, jasper ro·ong….aro ua songjinma kitik brichim, …. uni gro aro gipeng aro chua apsan” (Parape·a 21:2, 11, 16). Ua songjinma, pilak uni gamchatgipa ro·ongrang, sonarang, aro nitoe teng·suanirang Isolni rasong baksa teng·sugen. Uni rang·spemanpilgipa mikkim rasong aro rongtalaniko “setangna tarisogimin namchik gita” toaha.

4. Pilak songdonggiparangna pangnajol dambe ong·aniko aro an·sengbaljokaniko ia mikkim rasongan gapgipa songjinmara ia bebera·ana man·pilgijani ong·gipako maidake ku·rachaka?

“Aro ua chibimani iachi uachi boljanggi, ua bite changchi·gni nanga, japrako an·tangni biteko on·a. Aro ua bolni bijakrang jatrangko an·sengatani ong·a” (Parape·a 22:2). “Boljanggini bitekoba ake cha·e jringjrot tangnaba donga” (Abachenga 3:22).

Aganchakani: Ua boljanggi rokkom 12 biterangko nanggipa, songjinmani jatchi ong·a (Parape·a 2:7), aro uni biteko cha·gipa sakantiknan bon·changijagipa janggiko aro dambe ong·aniko ra·baa. Uni bijakrang mangmangoba aiao inmangipa bon·changijagipa namgipa gun gnang. Ia bol japrakprakon gitalgipa biterangko nanggen.

5. Ia aiao inmanpilgipa songjinma ia a·gilsakona ra·onbaako man·gen, ian kakket ong·bebeama?

“Aro anga rongtalgipa songjinma, Jerusalem gitalko, Isoloni salgioni ong·onako nikaha; ua setangna tarisogimin namchik gita tarisoa.” (Parape·a 21:2). “Sontolgiparang an·senga; maina uamang a∙ako manrikgen” (Mati 5:5). “Nibo, kakketgipa a·gilsakon on·pilskaako man·gen” (Toe Skianirang 11:31).

Aganchakani: Oe! Ia rasong mikkiman gapgipa rongtalgipa songjinma gital a·gilsak dataigipao skotonggipa ong·na gita ia a·gilsakonan ra·onbaako man·gen. Pilak jokgiminrang ia sonjinmaon songdong a·chagen.

  1. Papirangna aro jokgijagiparangna mai ong·gen?

“Aro pilak gaorade·gipa, aro pilak denggu dakgipa, megap gita ong·gen; …. Re·bagnigipa sal uamangko kamgen” (Malaki 4:1). “Dakgiminrang kame jronggen, aro a·a aro uano donggipa kamrangko kamgen” (2 Pitor 3:10). “Aro na·simang denggugiparangko ga·bekgen; maina Angni donsogimin salo uamang na·simangni ja·pani ning·o tappra ong·gen” (Malaki 4:3). “Indiba Uni ku·rachaka gita, an·ching gital salgirang aro gital a·ako nichaksoenga, jeo torom dongkama.” (2 Pitor 3:13).

Aganchakani: Isol ia a·gilsakko paponiko rongtalatgen; Ua, duk ong·bean baksa, papo dongkamgipa manderangoniko ia a·gilsakko rongtalatgen. Unikoa Isol chu·soksranggipa gital a·gilsakko dakgen. Ua rongtalgipa songjinmaan ia a·gilsakni skotonggipa ong·gen. Uano jokgiminrang katchae, tom·tome, aro rongtale jringjrotna songdonggen. Pap uano dongtaijawaha ine Isol ku·rachaka. Nahum 1:9ko nibo. (Norokni gimin bang·bate ma·sie ra·na gita Study Guide 11ko nibo.)

7. Uni gital songnoko napegipa manderangna Isol maidakgipa namen ka·srokbegipa ku·rachakaniko daka?

Aganchakani:

  1. Jihova, Antang bimango, uamang baksa dongrimgen (Parape·a 21:3).
  2. Uamang pangnaba aratjawa. Uano jringnan katchaani onggen (Gitrang 16:11).

 3. Uano siani, saknaani, grapani, duk, saani, hospitalrango dongani, operation ka∙anirang, signigipa aselrang, ka·donga gri ong·ani, neng·nikani, okriani, ba gitok ran·ani dongjawaha (Parape·a 21:4; Isaia 33:24; Isaia 65:23; Parape·a 7:16).

4. Uamang nengjawaha (Isaia 40:31).

5. Sakantian pilakni gitan chusoksranggipa ong·gnok. Nagokrang knagnok, kanarang nikgnok, aro an·ma goka ong·giparang katrorona man·gnok (Isaia 35:5, 6; Phillipirangna 3:21).

6. Mikbu miknengani, kenani, nidikani, tolpnapani, mikbokani, rongtalgijani, sakgipino ka·dongchakgijani, setagijani, jajrengani, aro pilak namgijanian Isolni songnoko dongjawaha (Parape·a 21: 8, 27; 22:15). Manderang jajrenganirangchi aro simsakanio uamangni gisikko bringbrangatani aro saknaanirangchi pangnaba neng·skimjawaha. Uano jajrenga sinteani dongjawaha. Somoi jringnan bon·changjawaha, aro da·oni a·gilsakni sinjetanirang aro sianirang pangnajolnan dongjawaha.

8. Ua gital a·gilsakara maikai ia an·chingni a·gilsakoni dingtanggipa ong·gen?

Aganchakani:

  1. Daalo an·chingni ma·sigipa apalbegipa sagalrang gimagnok (Parape·a 21:1). Ia somoio, sagalrang 70 percentmangni gita ia a·gilsako donga. Isolni gital a·gilsako indake apsan ong·jawaha. A·gimikan pilakna bate nitobatsranggipa, chibol, chibima, aro abrirang gnanggipa damsa dal·begipa bari ong·gnok (Parape·a 22:1; Watatarang 3:20, 21).
  2. Agisirangni pal barirang ong·skagnok (Isaia 35:1, 2).
  3. Pilak matburungrangan kenbegnigipa ong·jawaha. Ong·atgiminrangoni – perurang, singhorang, mapilrang, undakgiparang – gipin matburangrangko chike cha·jawaha, aro chonchongipa bi·sarang uamangko rodilgen (Isaia 11:6-9; Isaia 65:25).
  4. Uano soa dongjawaha (Parapea 22:3). Papni sao, jekon Abachenga 3:17-19 o janapachim, uano dongjawaha.
  5. Uano pilak dakgipa asel ong·anirang dongjawaha (Isaia 60:18). Ian niam pe·ani, mikka balwa rakanirang, chi bana re·anirang, banggrianirang, balminduri ong·anirang, saknaanirang, aro undakgiparang, donggijaniko man·chapa.
  6. Mamung marang nangatanikon nikjawaha (Parapea 21:27). Churing chupekani, chu ringram biap, chuni dolrangrang, an·tangko namgija dakani, namgijaniko niani, ba gipin rongtalgijanirang ua gital songnoko dongjawaha.

9. Isolni songnoko chonchongipa bi·sarangba donggenma? Donggenchim ong·ode, uamangara dal·rorogenma?

“Aro songjinmani ramarango kal·grikenggipa me·a bi·sarang aro me·chik bi·sarang uni ramadilmarango gapgen” (Zekaria 8:5). “Na·simang ong·kate, noloni matchu bi·sarang gita, bilchrokgen” (Malaki 4:2).

Aganchakani: Ua rongtalgipa songjinmao chonchongipa bi·sarang bang·en donggen (Isaia 11:6-9) aro ia dambe bi·sarang dal·rorogen. Mandeni ga·akaonian, an·chingara changroanio, u·ianio, aro tangbanganio namen komibegiparang ong·aha – indiba ia pilakan nampilataiako man·gen! (Watatarang 3:20, 21).

10. Jensalo ka·sagrikgiparang salgio damsan ong·ahaon, uamangara saksa sakgipinko ma·sigrikgenma?

“Indiba unon angko u∙iaha gita anga u∙igen” (1 Korinthirangna 13:12).

Aganchakani: Jokgiminrang jemangan siahachim tangchapiltaie, tangenggipa jokgiminrang baksa bakrimgen, aro Isolni gital songnoko damsan napegen ine Sastro rongtalen skia (Isaia 26:19; Jeremia 31:15-17; 1 Korinthirangna 15:51-55; 1 Thessalonikarangna 4:13-18). Isolni gital songnoko ka·sagrikgiparangba saksa sakgipinko ma·sigrikgen ineba ua skia, jedake manderang saksa sakgipinko da·o ma·sigrikachim.

11. Salgio manderangara be·en aro greng gnang ong·genma?

“Jisu An·tangan uamangni jatchio chadenge uamangna inaha. Na·simangna tom·tom ong·china. Indiba uamang namen kenbee me·mangko nikenga ine chanchiachim. Unon Ua uamangna inaha, Na·simang maina jajrenga? Aro maini gimin na·simangni gisiko chanchia ong·kata? Angni jakrangko aro Angni ja·arangko nibo, Anga An·tangan ong·a; Angko rimdape nibo; maina Ango dongako na·simangni nika gita me∙mangni be∙en aro grengrang dongja….. Aro uamang katchaani gimin bebera·kujamiting, aro aiao inmanpilmitingon ua uamangna aganaha, Iano na·simangni maiba cha∙ani gnangma? Unon uamang na·tok so∙a tong·sako Una on∙aha. Aro Ua uko ra∙e uamangni mikkangon cha∙aha….Aro Ua uamangko Bethanyona kingking rimongkatange jaktangko de∙e uamangko pattiaha. Aro Uni uamangko pattimitingon, Ua uamangoni dingtangaha, aro Ua salgichina rimangako man·aha” (Luk 24:36-39, 41-43, 50, 51). “Ia Jisuan, jeko na·simangoniko salgiona rimdoangaha, jekai na·simang uko salgiona re·angako nikaha, uandaken re·bagen” (Watatarang 1:11). “Gitel Jisu Kristo….an·chingni on·ani be·enko Rasongtangni be·en gita bimang dingtang dakgen” (Philippirangna 3:20, 21).

Aganchakani: Uni chakpilani ja·mano, uamangna An·tangko dangtapna on·anichi aro cha·aniko cha·anichi Uo be·en aro greng donga ine Jisu An·tang sininggiparangna sakkiko on·aha. Uni Pagipaona re·anggipa apsan Jisuan a·gilsakona re·bapilgen. Kristoni be·en bimang gitan jokgiminrangnaba be·en bimangrangko on·gen aro, be·en aro greng gnanggipa bimang ong·e jringjrotnan tanggen. Dingtanggrikanide salginigipa bimangrang ong·siaona aro siaona sokjawaha. Jokgiminrangni bimang gri gisikrang mangmang ong·e aramrango balboe mamungkoba dakgija indiba knalrangko moe donganiko skianide Sastro pangchakani mamungba gri. Uni ka·saaniko ra·chake Uni ramako ja·rikgiparangna ia indakgipa orto grigipako on·na inede Jisu chisolo sijaha. Bang·bata manderangan indake indakgipa donganio gisiko nangja aro, uni giminan, Isolni salgini songnoko napena gitaba sikja – basakobade norokna kenani giminsan mangmang uamang an·tangtangko taritoka. Isolni rongtalgipa songjinma aro gital a·gilsakni bebeko sakantian namedake ma·sie ra·na man·genchimode, bang·bata million manderangan Uni ka·saaniko ma·sina a·bachengtokgenchim, aro uamang Uona an·piltokgenchim aro Uni uamangna cha·tote nikchina daksogimin tom·tomanio, katchaanio, aro miksonganio ka·srokgenchim.

12. Ua gital songnokora maikai manderang uamangni somoiko re·attokgen?

“Aro uamang nokrangko rike uarango dongkamgen; aro uamang draka barirangko ge·e uarangni biteko cha·gen. Uamangni rikanio sakgipin uno dongkamjawa; uamangni ge·ako sakgipin cha·jawa; …. Aro Angni mikchagiminrang an·tangtang jakni kamko jaroe jakkalgen” (Isaia 65:21, 22).

Aganchakani: Gital a·gilsako jokgiminrang an·tangtangna nokrangko rikgen. (Sakantian Kristoni rikgimin songjinmani nokba donggen – Johan 14:1-3 ko nibo.) Uamang draka barirangko dakgen aro uarangni biterangko cha·gen. Sastro iani bidingo rongtalen talata: Mande chong·motrang salgio chong·motgipa kamrangko ka·gen, aro uamang iarang pilakon katcha ka·sroktokgen.

13. Ia salgini songnoko jokgiminrang aroba maimairangko dakgen?

Aganchakani:

  1. Gitrangko ringgen aro sika moanirangko dakgen (Isaia 35:10; 51:11; Gitrang 87:7; Parape·a 14:2, 3).
  2. Anti antian Isolni songhason mikkango olakkigen (Isaia 66:22, 23).
  3. Pul bibalrangni aro bolrangni pangnaba sikrepgijanio katchagen (Ezekiel 47:12; Isaia 35:1, 2).
  4. Kasagiminrang, pagitchamrang, Sastroni manderang, aro undakgiparang baksa rorimgen (Mati 8:11; Parape·a 7:9-17).
  5. Matburungrangni janggi tanganiko skie ragen (Isaia 11:6-9; 65:25).
  6. Jajrenga gri songre songabatgen (Isaia 40:31).
  7. Isolni git ringaniko knatimgen (Zephania 3:17).
  8. Uamangni ningtubatsranggipa kusiniko ba namgipa gisiko skaniko cha·totgen (Gitrang 37:3, 4; Isaia 65:24).
  9. Sakantini dalbatsranggipa katcha ka·srokani ong·gen – Jisu gita ong·na man·anio, Un baksa songre songabatanio, aro Uko mikkangchongchong nikanio katchagen! (Parape·a 14:4; 22:4; 21:3; 1 Johan 3:2).

14. Salgini songnoko an·chingni dongchakgipani rongsongko mandeni ku·sikchi talatna amgenma?

“Jerangko mikron nikjaha, aro nachikol knajaha, aro mandeni ka·tongo napjaha, je jeko Isol An·tangna ka·sagiparangna daksoaha” (1 Korinthirangna 2:9).

Aganchakani: Ning·tubatsranggipa chanchianirangmangba mande jatni ka·tongo Isolni jringjrotni songnokni aiao inmananiko chu·gimik ma·siatna man·jawa. Je songnokkon Adam gimaatahachim ua ripiltaiako man·gen (Watatarang 3:20, 21).

15. Ia songnokkora nang·na dingtangmancha dake tarisamsoengama?

“Sikgipa indinari chijanggiko ra·china” (Parape·a 22:17). “Bon·kaman salo parape·na tarisogimin jokana bebera·achi Isolni bilo rakigimin na·simangna salgio rakisogimin, sogija” (1 Pitor 1:4). “Anga na·simangna biapko daksona re·nasia” (Johan 14:2).

Aganchakani: Oe! Uan dingtangmancha dake nang·na tarisamsoaha – ia somoion. Aro Isoloni okamanide nang·na dingtangmanchaan ong·a. Ka·sapae Uni on·aniko jegalpanabe!

16. How can you be assured of a place in this great and glorious kingdom?

“Behold, I stand at the door and knock. If anyone hears My voice and opens the door, I will come in” (Revelation 3:20).
“Not everyone who says to Me, ‘Lord, Lord,’ shall enter the kingdom of heaven, but he who does the will of My Father in heaven” (Matthew 7:21).
“Blessed are those who do His commandments, that they may have the right to the tree of life, and may enter through the gates into the city” (Revelation 22:14).
“As many as received Him, to them He gave the right to become children of God” (John 1:12).
“The blood of Jesus Christ His Son cleanses us from all sin” (1 John 1:7).

Aganchakani: Nang·ni janggi tanganiko Kristona on·kangbo aro Uo dongkambo jedakode Ua nang·ko paponiko aro pap ka·na skaoniko rongtalatna man·gen. Ian altugipa ong·jama! Jensalo na·a Uo dongkamon, ka·sae bamanio Uni skaniko dakna aro Uni ge·etanirangko rakkina Jisu nang·na bilko on·a. Iani miksongade Kristoni janggi tanga gita na·aba janggi tangna a·bachenggnok, jechin Ua pilak paprangko chena gita nang·ko dakchakgen. “Amgipa iarangko man·rikgen” (Parape·a 21:7). Jensalo mande an·tang ka·tongo salgiko dona unon uko salgina tarisamsoa.

17. Uni salgini songnoko jringjrotna Un baksa janggi tangkampana Jisuni rasongarigipa okamaniko na·ara ra·chakahama?

Nang·ni Aganchakani: ______________________________________________________________________________________________________________

Nang·ni Sing·anirangna Aganchakmanaha

  1. Jokgiminrang jensalo uamangni ka·sagipa, jemangan gimaahachim, uamangni gimin chanchiaton maikai salgiara kusi ong·gipa biap ong·gen?

Aganchakani: Isol “uamangni mikrononi pilak mikchiko u·sitgen” (Parape·a 21:4) ine Sastro rongtalen agana. Gital a·gilsakni nitoanichi aro ka·srokanichi duulako man·e, Isolni piokgimin manderang re·anggimin salrangni dukrangko aro saknaanirang gualgen. Isaia 65:17 o indake agana, “Skanggipa ong·anirangko gisik ra·jawa, aro gisiko najawa.”

  1. “Be·en aro an·chi Isolni songnokko man·rikna amja” (1 Korinthirangna 15:50) ine Sastro agana. Indide, maikai, piokgiminrang be·en aro greng gnanggiparang ong·gen?

Aganchakani: Iano watata Paul jekon ua pod 35-49 aganachim ukosa taldapataniko daka, je an·chingni chakatpilgipa bimangrang da·o an·chingo dongenggipa bimangrangoni dingtanggipa ong·gen. An·chingni bimangrangko aro kam cholon mingantikon pap dingtangataha. Uni gimin, jensalo an·ching nampilatgimin Edenni songnokona napeon, an·chingni bimangrang dingtangatako man·gen jedakode an·ching ua salgini chu·soksranganiko chu·gimik katcha ka·srokna gita man·gen. “Be·en aro an·chi” ara ia a·gilsakni mandeni bimangko toe mesoke agangipasan ong·aia (Mati 16:17; Galatirangna 1:16, 17; Ephesusrangna 6:12 iarangko nibo). Kristo, Uni chakatpilgipa bimango, Uo chong·motgipa “be·en aro greng” (Luk 24:39) donga ine parakaha. Philippirangna 3:21 ni gitade, Ugitan an·chingo bimangrang donggen.

  1. Watata Pitoran ua rongtalgipa songjinmani cholgugarangni nitimgipa ong·ama?

Aganchakani: Ong·ja. Parape·a 21:12 o Sastro indake agana je ua gital Jerusalem – Isolni rongtalgipa songjinma – ge 12 cholgugarang donggen, aro ua cholgugarango sak 12 sa·grerang donggen. Darang watatarangba cholgugarangni nitimgipa ong·gen ine pangchake aganani Sastroo dongja.

  1. Pilak bilsini jokgimin manderang dongchakna chakna gita rongtalgipa songjinmara chu·onga gita dal·bebeama?

Aganchakani: Sakantinan 100 square feet bangbanggipa a·ako sualatgenchimode, ua songjinmao sak 39 billion manderangna dongchakna chakgipa ong·gen, jean ia a·gilsakni da·o dong·enggipa mande jelanina baditaba chang batgipa ong·a. Iano janggi tanggipa pilak manderangan jokgenchimoba, ua rongtalgipa songjinmao bang·a biaprang uamangna donggenchim ine bang·a hisap ka·e nigiparangan bebera·a. Sastro iani bidingo talen agana, indioba, pilakande jokjawa (Mati 7:14). Uni gimin, ua dal·begipa songjinmao nangana batpilen biaprang donggen.

 

  1. Basakobade an·tangko on·kanganiara ua man·gnina gamchatgipa ong·genma ine anga chanchimana. Bang·a changon Satan angko sripatnasia gita nika. Sastroo maiba didiani gnangma?

Aganchakani: Oe! Watata Paul jensalo iako seengmitingo ua nang·ni giminba chanchiengnaba donga, “An·chingona parape·gni rasong baksa togrikna, da·oni dukrang kraja” (Romrangna 8:18). Jringjrotni songnoko nang·na sengsoenggipa salgini Paani teng·suani on·titian a·gilsakni namjabatsranggipa duknirangko aro chu·sokgijanirangko gamchatgijaniona gimaatgen!   

  1. Bi·sarang jemangan siahachim uamangba Isolni songnoko donggenma?

Aganchakani: Ia sing·anina dingtangmancha dake Sastroni gita aganchakani an·chingo dongja, indiba Mati 2:16-18 o pangchake chonchongipa bi·sarangba jokgen ine bang·an bebera·a, jeon Sastro, Herod Rajani Bethlehemo me·a bi·sarangko so·otaniko aganachim. Niam Gitchamo ia bilongbegipa dukni bidingo agansoaniko daka, indiba Isol ma·giparangko uamangni grapanirangko dondikchina agananiko daka maina salsaode uamangni bi·sarangko uamangona rimbapilgen. “Grapaoniko nang·ni ku·rangko, aro mikchirangoniko nang·ni mikronrangko rakibo; maina ….. nang·ni dedrang uamangni aritangona pil·bagen” (Jeremia 31:16, 17).

 

  1. Jokgiminrangni dongchakram biap ia a·gilsakon ong·gen ine angni ma∙sianiara kakket ong·ama?

Aganchakani: Oe! Ia rongtalgipa songjinma da·o Isolni dongram biapo ong·genchimoba, Ua uko ia a·gilsakonan ra·onbanasienga. Ia rongtalgipa songjinmaan gital a·gilsakni skotonggipa ong·gen, aro Isol An·tang singhasonko ianona ra·bagen (Parape·a 21:2, 3; 22:1, 3) aro jokgiminrang baksa jringna ia a·gilsakon songdonggen. Aro jeon Isol dongkama, uan salgi ong·a. Isolni miksonganide jekon Adam gimaatahachim uko an·chingna rikpiltaina ine ong·a: chu·soksranggipa a·gilsako chu·sranggipa rasongarigipa janggi tanganiko. Satan aro pap Isolni miksonganiko bilding bildangataha, indiba ua miksongani chu·sokgipa ong·gen. An·chingba ia gital songnoko bakko man·pana amgen – uko gimaatna ian bilongbeani ong·gnok! (Bang·bate ma·sie ra·na Study Guide 12ko nibo.)

  1. Jokgiminrangni dongram biapara me·mangrang gita ong·e aramrango balboe mamungkoba dakgija indiba knalrangko moe donganian gapgipa biap ong·a ine maina bang·a manderangan bebera·a?

Aganchakani: Ia skianirangde diabolonisa ong·a, jean tol·arangni pagipa ong·achim (Johan 8:44). Ua Isolni ka·sae dakgimin miksonganiko dilsretna aro salgiko kakketgija, “kenbegnigipa” biap dake mesokna namen krengbegipa ong·a jedakode manderang gisik nangani komigen ba pilak Isolni Kattako jajagen. Jensalo me·a aro me·chikrang ia jokgiminrangni songdongramni bidingo Sastroko chu·gimik ma·siahaode, uamangni kosako ong·gipa uni bil be·a ine Satan ma·sia, maina uamang ua songnoko napena miksonggiparang ong·gnokchim. Uni giminsa ua an·chingni salgini songnokni bidingo jajaaniko on·na aro tol·aniko gipatna namen kamko rake ka·a.

 

See Rakkianirang:  ___________________________________________________________________________________________________________

Nipiltaianiko Dakani

  1. Bangbangogipa rongtalgipa songjinmara (1)

____ Ong·chongmotgipa ong·ja indiba chanchichigipasan ong·aia.

____ Ong·chongmotgipa songjinma ong·a jekon Uni dongram biapo Isol da·o tarisamsoenga.

____ Mitam manderangni gisikona agre darangoba dongja.

  1. Rongtalgipa songjinma (1)

____ Nuclear bomb gopretanichi nisiatako man·gen.

____ Satan aro uni sa·grerangchi rim·gittangako man·gen.

____ Ia a·gilsakona ra·onbaako man·gen aro gital dakgimin a·gilsako skotonggipa ong·gen.

  1. Ka·mao sulsul segiminoniko, rongtalgipa songjinmani bidingo Sastroni gita kakket ong·giparangko tick (ü) ka·bo: (7)

____ Uko Gital Jerusalem ine minga.

____ Ua Lodonni dal·a gita ong·gen.

____ Uni guarerangara topazchi rikgiminrang ong·a.

____ Ua songjinmani bakroani uni apalni gitan ong·a.

____ Ramarang rongtalgipa sonachi angimin ong·a.

____ Ua songjinmao ge 14 pangchakanirang donga.

____ Watata Pitor uni cholgugarango chadengenga.

____ Ua ge 12 cholgugarang mukta dotprakchi rikgimin ong·a.

____ Uni rikingni ro·aniko toaniara mile 1,500 ong·a.

____ Uni pilak pangchakanirangko gamchatbegipa ro·ongrangchi rikaha.

____ Ua songjinma chu·soksranggipa ong·gen.

  1. Boljanggiara (1)

____ Ong·chongmotgipa ong·a jean Isolni manderangko pangnajolna an·sengbaljoke aro dambe ong·e rakkigipa ong·gen.

____ Toe agananisan ong·aia aro An·tangni manderangna Isolni bilko on·nasianikosa miksonga.

____ A·bachengode dongachim indiba gital songnokode dongjawaha.

  1. Ka·mao sulsul segiminoniko, Isolni gital songnoko manderangna ku·rachakanirangko Sastroni gita kakket ong·giparangko tick (ü) ka·bo: (5)

____ Salantian Gitel bia ka·anirangko dakgen.

____ Boljanggi rokom 20 biterangko nanggen.

____ Gitel An·tangan Uni manderang baksa janggi tangrimgen.

____ Bilsi million sa ja·manode, rongtalgipa manderang arataignok.

____ Uano siani ba kalimani dongjawaha.

____ Manderang pangnaba neng·jawaha.

____ An·ma goka ong·gipa manderangko sa·grerang de·e roramgen.

____ Sa·grerangan doctorrang ong·aignok aro uamang pilak operationrangko dakgen.

____ Mikgrirang nikgija ong·jawaha.

____ Mikbuani, kenani, mitchinikani, tol·napani, miknengani, aro rongtalgijani jringnan gimagnok.

____ Bi·sa chongiparang dal·rorojawa.

  1. Ka·mao sulsul segiminoniko, gital a·gilsakni bidingo kakket ong·e agangiparangko tick (ü) ka·bo: (6)

____ Da·o dongenggipa sagalrang dongjawaha.

____ A·gisirang dal·batgnok.

____ Matburungrangko salgini ka·sae chipe dona tarigimin kuturirango dongen.

____ Balmindurirang, banggrianirang, aro chi bana re·anirang dongjawaha.

____ Ramarangoni jabolrangko salantian sa·grerang simsakbee rongtalatronggen.

____ Pul bibalrang aro bolrang sikrepjawaha.

____ Ia a·gilsakon salgi ong·gnok.

____ Pap gnigipa changna dongtaijawaha.

____ Uni rasongan gapaniko chu·gimik talatsokna man·jawa.

  1. Salgini songnoko toromirang (1)

____ Me·mang pile knalrangko mogen aro aramrango balboe rogen.

____ Uanona sokanggipa sakgipin ka·sagiparangko aro ripengskarangko ma·sigrikjawa.

____ Be·en aro greng gnanggipa ong·gen aro saksa sakgipinko ma·sigrikgen.

  1. Salgio manderang mande chong·motgiparangan ong·gen aro chong·motgipa kamrangkon ka·gen ine an·ching ma·sia maina (1)

____ Bon·kamao scienceni gita sakkiko on·aha.

____ An·ching Kristo gitan ong·gen, jean Uni chakatpilani ja·mano be·en aro greng gnang ong·aha aro kam chong·motrangko ka·aha ine Sastro agana.

____ Bang·a skigiparangan indake ong·gen ine agana.

  1. Ua salgini songnoko angaba dongpagen ine namen ma·sina man·gen, anga (1)

____ Gitelna ka·saa ine salantian aganode.

____ Norokna chu·onga gita kengenchimode.

____ Kristoko ra·chake, Uo dongkamode aro Uni ge·etanirangko dakode.

  1. Salgini songnoko jokgiminrang maiko dakgen? Ka·mao Sastroni gita kakket ong·e sulsul segiminrangko tick (ü) ka·bo: (5)

____ Nokrangko rike uano donggen.

____ Draka barirangko dakgen.

____ Matburungrangko so·ote uarangko cha·gen.

____ Salgini sika moanirangko dakgen aro Isolko de·mitelgen.

____ Isolni singhason mikkango olakkigen.

____ Norokko bilpake gimagiminrangko kal·stekgen.

____ Boljanggioniko cha·gen.

  1. Uni songnoko Un baksa pangnajolna tangrimna Jisuni okamaniko anga ra·chaka.

____ Ra·chaka.

____ Ra·chakja.