Ong·nikako dakengama ma

Ruutgija somoina skangsa anga Sastroo namgija agangipa sagalo donggipa na·tokni gimin u·ie ra·aha. Ia marang gnanggipa na·tikara an·tangni an·gilko bilsio chang dok ba chang chet gilsreachim. Indakani a·sel uni bigil gitchamni ning·o gital bigil nakattaiachim. An·tangko ro·ongo natmrake ua an·tangni bigil gitchamko gale bigil gital ning·o donggipako ua man·taiahachim.  

Changprak gilsreon, maiaba dingtang uni be·enna maiba gital dingtangani dongachim. Skangni na·tikrang gitan ua u·iani donganichi an·tangni skoo dingtangmanchagipa bako an·cheng rongsako donatachim. Gilsrea changantian ia an·cheng bigil gitcham baksa tang·e katachim, aro uni palo an·cheng gitalko skoo simsakbee donatskaachim.  

Ia ro·ongrangni dingtangmancha kam ka·ani dongani gimin uarangko “mingsinggipa ro·ongrang” ine mingachim. Uaranga ua sagalni na·tokni tange donganina nangchongmotgiparang ong·achim. Iarang gride, na·tikrang jajae, skangni na·tik gita ong·gija dongkamaignokchim. Chipakore satbaon uamang man·pakako man·a aro bikpil bawil dakani ja·mano, uarang an·tangtangko bikpile dongengama name dongengama uko uamangni skoo jrimgipa ro·ongni dakchakanichisa u·ina man·aiachim.  

Uni dal·bea ka·saani aro u·ianichi, Isol ua chonbegipa aro niksenggijagipa na·tikkoba morekreka man·gipa biapo dongmitingo name dongatna dakchakaniko on·aha.  

Ia indaka obostarangko na·tik angna re·bae aganena man·jaoba maikai iarangko u·ia ine na·a chanchinaba donga. Adita bilsirang re·angaha, saksa janggi tanggiparangni gimin poraie skie ra·gipa bang·a na·tikrangko rim·e an·tang noko na·tok jilchakna chiko dal·e tarie donahachim. Chonchongipa ro·ongrangni palo ua scientist chonchongipa sil ronggrarangkosa chi ka·mao chimonge donskaahachim. Gilsreani somoi sokahaon, na·tik mangantian ro·ongni palo ua sil ronggrakosa an·tangtangni skoo gate donskaahachim.  

Unikode ua dake nienggipa mande bilakbegipa chumpukko ra·bae na·tokrangko jilna donenggipa chini nokkingni kosako donatskaaha, unon rang·sanan na·tikrang tang·dobae mitale jroskaaha. Chumpukni ua na·tikni skoo donggipa silrangko salania chio napsrimgnina bate bilakbatahachim, aro na·tikrangde indake bikpile jroanikon ong·rongbewal dake nikaiaha. Dake nianiko ga·subatatna gita, ua scientist manggipin na·tikko sagaloniko rim·bae ua na·tok jilgipa chio donatskaaha. Ua gital sokbagipa na·tikde ong·en, sronge chio jroe roskaengahachim.  

Ia jinma gita dakpagijagipa na·tikni sokbae jroenganiko nikon gipin na·tikrang maiko chanchienggenchim na·a chanchiatna man·ama? Haida uamangni gisepo indake agangrikani dongenggen, “Ia sokbagital na·tikara an·tangni gimin maiko chanchia, aro maiko dakmesokenga? Maidake nambate jrona nanga uko chingna skiengama? Maina indake bikpile ua jroe mesokenga?”

Na·a nikna man·a, silko skoo dongipa na·tikrangsa bikpile jroengachim, aro uarangde an·tangtangko bikpilenga ine u·iskajaengachim, indiba  ua sokbagital na·tiksa ong·e jroengachim. Gipinrangde an·tangtangsa ong·e jroenga ine nike, aro an·tangtangni chanchiakon ong·nike donaiengachim, aro jinma maiko dakenga ukosa ong·nikengachim. Uarangni skoo sil dongani giminsa uamangni nikani aro u·iani dingtangahachim, aro uakon uarangde ong·nike dongaiengahachim.  

 

Ong·nikako dakengama ma

Jinmani dakakosa ja·rikenga

 

Ia golponi gimin anga chanchion, ia a·gilsakni chio an·chingara jroe roenga ine anga nikata. Bilakgipa dakmajoani chumpukrang an·chingni samtangtangchin dongtoka aro an·chingni toromni janggi tanganikoba golmal ka·e bikpilatna jotton ka·tokgiparang donga. Jinmao aro an·tangtangni chanchianiko ja·rikgiparang a·palni salachi man·pakanganiko man·bata. Bang·batan indake daktokaienga ine ka·dimeataniko man·e, ruutgijaan uamang ong·gijaon dongkamrongaiaha. Saoba gipinni dingtanganiko nikode uamang uko ong·gija chane, pilak ong·arangkode bikpile nikskaa. Unikode uamang ong·akode ong·gija dake nike ong·gijakosa ong·a ine chanskaa. Uamangni nikanio saoba dingtange dakengahaon, ukode pagla ba golmal ka·gipa ine chanskaa.

Ian mingsa dal·a bebeko mesokani ong·a: Jinmani dakaniko nikari uan ong·aia ine aganna man·ja! Ong·bebeama uko u·ina an·ching saniba a·paloni u·iataniko nangenga. An·chingni chanchianirang an·chingko chumpuk gita salengnaba donga, indiba  uarang an·chingko dilsretani ong·skanaba donga. Bang·bea an·chingni ripengrang mandera·ako man·giparang aro toromi manderang ong·naba donga, indiba  uamangni gadangba bobilni gisik seng·e budhi dakanio ga·akgiparang ong·toknaba donga.  

Kristiannade mingsasanmangmang ka·dongchakna man·gipa ga·akna man·gijagipa dilgipa donga, aro uan Sastro ong·a. Ua Kattako an·chingni gisiko donon, ua an·chingna bebeko skia aro uan ka·dongchakna man·gipa ong·a. An·chingni u·ianirangko uchi toe nina nanga. Janggi tangani bewal, kattarangko man·chape, kamrang aro chanchianirangko pilakko nirokgipani ning·o donna nanga. Da·ororo Isolni nangnikaniko dakgijania manderangni an·tangtangni ong·nikani gita janggi tangani ba jinmako ja·rikani ine aganoba gualani dongjawa.   

Satanni jakkalenggipa ia ostro minggniko u·ie ra·ania an·chingna badita nangchongmotgipa ong·enga. Ia minggnian mandeni gisikni nangchongmotanio ja·dil su·egiparang ong·toka. An·chingni gisikni bobilde bilsi 6000 ong·nasipile mandeni gisikkode nirikite sandie dongenga ine an·ching u·ina gisik ra·ja—uan da·ororoni manderangni mandeni gisikko sandie poraianina bate ruutbate sandie ra·ani ong·engaha. Diabol maio an·chingni gisikni bilgrianirang donga uko u·ie uarango an·chingko ja·guatna skie ra·gimin ong⸱aha.  

Badita sak uni indake ja·guatanio ga·akaha? An·chingni songsalo janggi tanganio mingsa niksenggipa aganchakani donga. Ia bilakgipa salrikani sokbana skangan Jisude u·isoani gimin Uni sninggiparangna mikrakataniko on·somanahachim. Ua indine aganaha, “Janggichina dakanggipa cholguga apchona, ramaba apchangket, aro uko nikgipa bang·ja” (Mati 7:14).

Changgipin somoio Jisu mingsa ia sing·aniko indine sing·aha, “Mandeni Depanteni re·bao a·gilsako bebera·aniko man·egenma?” (Luk 18:8). Uandake apsanange Ua indine aganaha, “Noani somoio maikai ong·achim, Mandeni Depanteni salrangoba indaken ong·gen” (Luk 17:26).

Indake u·isona man·a je, a·gilsako donggipa bang·gija manderangsan bon·kamani somoirango ia togiako man·aoni jokaigen. Bang·gijagipa dongpitigipasan pangnan jinmani daka gita dakaigija, an·tangni namnika ba ong·nikako dakaigija ba saniba dakani gita ja·rikaigija ong·akosa dake dongaigen. Itihaso serikanio bang·gija manderangsan suk ong·e donggipa jinmako ja·rikjana seoke ra·aiaha. Bang·bata manderangan altuagipa ramana agre aro dongtogipa an·tangtang namnikako dakna man·gipa toromna agre bebeko sandiani dongrongja. Uamangnade, mondolini niamranga an·tangko jegalani aro niamko rake manianian ong·skaa, aro ian uamangnade namgijagipa kobor ong·aha.  

 

Bebeko Skipraknara Altuaama?

 

Iani giminsa bang·a mondolirangon paksadingding nama kattakosan skiprakrongaia. Manderangni knana sikgipa aro namnikgiparangko skina nama. Bebera·ani aro ra·chakaniosan nangaigipa gamchatgipa bebeni kattarangko parakna Isolni katta ra·timgipade jajajawa. Minggipin nama kattani bakara nama kamrangni biterangni gimin ong·a. Uan janggi tangani bako manie janggi tangani aro Kristo gita cholonko mesokanini gimin agana. Uan bebera·anichi kakket ong·ani ingipa ong·a aro iani giminde da·ororoni gipin Kristianrangde agananian dongja. Iano manie janggi tangna dabiani donga.  

Mitam skiprakgiparanga an·tangtangko jerikitna ba jegalna kene mitam Sastroni kattarangko skiprakna kenengama? Gipin kakket ong·e skigiparangko jegalahani gimin uamang knae uamangba kenani dongengama? Uarangko nike na·a an·tangan uni giminde aganchakna man·aigen. Jonani golpoan bebeko skina altuaa ong·ja ine mesokani ong·a. Ua indakgipa ge·etaniko darangba dakna sikjawachim.  

Pap ka·enggiparangni mikkango chadenge, Jisuni agana gita, “Re·angbo, pap ka·tainabeaha,” ine aganna altua ong·ama? Isolni nokol ong·e, anga indake aganna man·a je, pekgipa samrangko jakkalgipa, chu watna man·gijagipa, aro noti dari dake cha·giparangna uandakgipa kattarangko na·a aganna pa·jawa, aro uamangko aganeba namatgen ine na·a ka·dongna man·jawa. Uamang baksa na·a name nangrime dongangkuna skenga. Uamangko na·a gisik saatna sikjawa, aro uamangni janggi tanganiko dingtangatna na·a aganna pa·jawa. Ba rang·sande na·a uko aganjawa. Indakako dakeba toromo dongaichina na·a uamangna aganna namnikbatgenchim.  

Sing·ani: Je papkoba ka·angkue donge mondolio dongangaichina agangipa badiaba torom dongama? Sastroo banoba je papkoba komiatgija ba gimaatgija dongaichina ku·patiani dongama? Kakketgipa gisik pil·gimin mande, Kristoni ka·saani gimin u·igipa u·ie pap ka·angkue donganggenma? Paul indine paraka, “Maina be·enni ska Gisikni bobil, Gisikniba be·en bobil ong·a: maina na·simangni skarangko na·simang dakjana gita, ia minggni champenggrika” (Galatirangna 5:17).

Ua aganani bilakgipa kattarang ine nikkujaode Romrangna 8:13 o seaoniko poraiangkubo, “Maina be·en gita na·simang janggi tangode, na·simang sina nanga; indiba  gisikchi na·simang be·enni dakanirangko so·otode, na·simang tanggen.” Ianon indake donga! An·ching mingsa ba minggipinko dakna man·a, indiba  apsan somoio minggnikode dakna man·dimja. An·ching be·en gita janggi tangna man·a ba Gisikni gita janggi tangna man·a. Paul indine agana, “Ia minggni champenggrika.” Ian chu·ongaha. Bil ge·gnini gisepo sualani gri. An·ching be·enni kamrangko gimaatna nanga, ba uarangko ra·bitna nanga. Bako na·a basegen? Minggnikode na·a ra·dimna man·jawa.

Jinmako ja·rikani ingipaona hai an·ching re·bapilna. Bang·bata somoion jinmani dakania ong·ja ine an·ching u·iaha, aro uamang an·tangtangni dakaniko ong·jaenga ine agananikoba nangnikja. Uamang ong·jaenga ine bebera·atnaba altuaa ong·ja. Ianon Jisuni agangipa kattako poraina nanga, “Na·simang manderangni nikanio an·tangtangko nama inatgiparang;  indiba  Isol na·simangni ka·tongrangko u·ia: maina manderangni chunikaniara Isolni nikanio mitchiani ong·a” (Luk 16:15).

 

“Chue  Mandera·ako  Man·giparango”  Kenbeani

 

Bon·kamgipa kattarang da·alo an·chingna gamchatbegipa skie on·ani ong·a. Ia kattarangko Jisu Pharisirangna aganaha, uamanga ong·gijakoba ong·enga ine ra·engachim, maina ua somoio uamangni dakbewalan uandake ong·engachim. Jinmani dakania gimikni bidingode ong·toka ong·ja ine ua rongtalen mesokengachim. Bang·a manderangan apalgipa nisiatani ramakosa re·gen ine aganmanahachim. Uamangni chanchiani aro nikaniranga gimagimin manderangni chanchiani aro nikanirangsa ong·aiachim. Indakgipa manderangan bang·batgenchim—bang·gijasan apchona ramakode nikaigenchim. Iano kenbegni kattara chue “mandera·ako man·gipa” manderangba Isolni nikaniode mitchianiko man·gipa manderangsa ong·aiachim.  

Da·alo manderangni janggi tanganiko niatode, ia kattaranga bebe ong·a ine nikgen. Manderangni gana chinani, cha·a ringani, kusinirangko dakani ba uamangni skie ra·aniranga Isolni nangnikaonide namen dingtanga. Basakobade an·chingba Israelrang gita  jinma baksa nangrimangaia, indiba  Isol an·chingna nambata aro chubata gadango janggi tangchina mesoke on·manaha.  

Sastro jol gimiko agangipa dingtang ong·e rongtale dongani gimin aganode bang·a manderangan ong·nikja, aro aiao inmana. Isolara maina skangni An·tangni manderangko songsarekrang baksa rorimna aro bia ka·brine dongna on·jahachim? Niam Gitalko segiparangba gisikni Israelko “ a·gilsakoni ” ong·katchina aro dingtang dongchina agana. Ua ong·katgimin manderangko “mondoli” ine mingaha, indake uamanga “a·gilsakni”  gitade pangnan bobil ong·skaaha. Mondoli ingipa kattara Greek ku·sikni minggni kattarangoni ong·kata: ek, inani ortoa “a·palona,” aro kalleo, ni orto “okamgimin”—eklesia: mondoli, dingtang ong·na okamako man·giminrang ine ong·a.

Isolara An·tangni “bang·gijagipa” manderangko ua apalgipa ramako “bang·gipa” re·giparang baksa maina rorimna on·ja? Aro jinmaranga maina gimaaniko seoke ra·a? Satanara uamangko maikai an·tangko ja·rikchina sala? Ia sing·anina aganchakanian, pilak kakketgipa katchinikgipa aro nama kattako segiparangni jinmani kamoni eke dongchina agananian talataniko on·gen.  

Ianosa namgijachi bang·a manderangan rim·gopako man·aha: uni chanchianian jerang baksa ua rorima  uamangni daka gita dakpaaina nanga ine chanchiani donga. Uamangni knaanirang, nika nianirang, jerangkon ua skangode jegalachim, uaranga jinma dakpaani gimin ra·chakna man·gipa gita nikangpaaijok. Indake uarang baksa dongdimao pilak ong·gijanirangkoba mamung gitan nikangjaha, indake uni kamranga papo janggi tanganio bakrimpaaiaha.  

Ia pilakan una kengni ong·engachim, maina pilak ong·a obostarangan nikrakgijasa chabaahachim. Ua mande an·tangni rorimenggiparangchi mikdipilataniko man·atenga ine ua ma·sijaengachim. Mamung kengnikoba nikchrakede mesokani dongjachim. Uni chanchianiranga gital chanchianichi mangrakatako man·baengahachim. Indake dingtang “ro·ongrangchi” ua dingtangatako man·engahachim. Sastroni niamrangoni ua manderangni dakbewalchi dingtangataniko ka·sne man·angaha, aro uni toromni u·iani gisik uni dongram biapni a·sel dimelroroangaha.   

Sandie niani ja·man sanditaie nianirango mandeska baksa rorimanirang manderangni kam cholonrangko dingtangata ine nikaha. Rongtalgijagipa manderang baksa rorimanio rongtale dongna man·ani raman dongja. Mitchignirangko nike mitchiatako man·gijanian dongja. Be·enni a·gilsakoni dingtang ong·china Isolni didianio mamung ong·gijako aganani ba gualani dongja. Paparigipa dakmajoaniko nike aro kattarangni gam·aniko knaengon, Isolo bi·ani aro Sastro poraianiko dakangkuna man·jaha. 

 

Gisiktango Ong·nikako Ja·rikanio Dilsretani  

 

Na·tikoniko skie ra·ania an·chingna maina nangchongmotgipa ong·a uko an·ching u·ibataha. Jinmani dakaniko dakpaanio naljokani dongja. Indiba hai da·ode ro·ong ong·gijako skoo gate donani kengniko niatskana. Na·tikni skoo dongenggipa ro·ongni bilakgipa salania na·tikko ma·sisretaniona sokataha. Uni nikani ba chanchianiranga ong·jachim, skoo gatgipa ro·ong ong·jahani gimin uni chanchiani ba nikaniranga ka·dongchakna man·gipa ong·jahachim.  

Iako name nibo: nang·ni ong·nikanichi jinmako ja·rikania naljokani dongja. Chumpukni salani a·sel uni dakanirangba ong·gijaona sokaiaha, aro uko jada ong·ataha. Uandake an·chingba apsan ong·tokaiode Satande namen kusi ong·begenchim. Isolni Kattana bate, uni ro·ongo ka·dongchakbatenggipa bang·ahaniko ua nikmanengaha. An·senggipa songni manderangko aro ching·chetgipa obostarangko nikatanichi Satande an·senganiko mesokatenga, indiba uan togianisa ong·aiachim. Millionni manderang tol·napgipa naljokanio ga·akaha aro ukon uamangde naljokbate nikskaenga. Uamang mikdipilataniko man·manaha, aro an·tangtang namako chanchiani palo sakgipinni gisikosa pangchakbate uamangkosa manibatengaha.

Agilsakni bang·bata  manderangan Satanni muni pianio ba mikdipilatanio ga·aktokengama? Pilak mandean maiba gam·ana ba maikoba nikatanina niatani ba knatimanide dongchongmotaia. Iako darangba jena man·jawa. Maiaba uamangko muni nangatgipade dongaigen. Uamang maikoba nikenga ba maikobade knaenga. Indakjaode darangba ua muni nangataniko man·jawachim.

Sakoba an·tangni sasonona man·atna gita Satanara maichiba an·tangona salani dongengama? Ua an·chingni maioba bilgrianiko u·ia aro uko jakkale dakmajoao ga·akatna kimala. An·chingni naljokanide uni mesokaniko nijana ba maikoba uni gam·atako knaon uko knatimjana skie ra·anian ong⸱a.

Bebeko u·ina an·tangni ong·nikako nianio maiaba beng·aniko knaja dakatani donga. Unode kakketbatgipa mandeba an·tangtangni chanchianikosa ong·nikaignok aro gipin ku·patianirangko nikoba uarangkode ong·ja gitasa nikaignok. An·tangtangni chanchianikon uamang ong·nike, aro uon dongtonike maiaba nambatako mesoke on·oba uamang uko bebera·jawaha.  

Indakgipa gisikara Kristianna kenbegni ong·ama? Chong·mot, uamangni ong·e chanchina changaniko Satan nosto ka·a. Chanchichipe na·a balwa jokrurana man·gijagipa chongipa kuturio dongenga ine chanchiatbo. Wal·sare chaenggipa chaki nang kuturini oxygenko bon·atgen. Ka·sne na·a tusidimuna sikgnok aro name chanchinaba changangjawajok. Na·a nang chokionin chakatnaba sikjawajok. Na·a chakate do·ga ba kelkikoba oe niatnan sikjawajok. Na·a ua kenbegnigipa biaponi rang·san chakate do·ga oatna nanggen, ong·jaode na·a pangnaba chakattaijawaha.  

Sastroko poraijana ba bi·gija dakna skanirang nang·o dongahachimma? Oe donga. Iako knatimbo, Be·en bimang oxygenko nangani gita bi·anian janggini rang·sitani ong·a. Bi·na aro Sastroko poraina gisiko nanggijanian an·chingni torom janggi tanganio kengniko ra·baengaha ine u·isoatani ong·a. ua somoion an·ching kuturi chongipaona nape ja·sku dipane toromna gisiko nanganiko nampilatchina bi·na nangani somoi ong·aha. Unode ruutgijaan bi·ani somoiko kusi ong·ani somoi ine nikbaskagnok, indiba  Satanni ja·gaoni an·ching jokkujaskalde an·ching torom janggi tangao kengnio ong·enga. Bebekosan an·ching dakna ba ja·rikna nanga.

 

Dakani ba Daktaiani

 

Ian an·chingko indake u·iatani ong·enga je an·ching sakantian maikoba daka aro daktaitaia. An·ching maidake janggi tangenga uan an·chingni basee ra·ani giminsa ong·enga ong·jaode saoba an·chingni janggi tanganiko uandake tangchina didigipa dongenga. Saniba didianichisa janggi tangenga ong·ode, an·ching an·tangtangko sanaba pakwatenga aro an·tangtangko an·chingni janggi tanganiko uni skani gita janggi tangatna on·enga.  

An·chingni janggi tanganiko Satanni jako pakwate on·engani gimin an·chinga aganenga ine gisik ra·pakubo, indiba iade an·tangni skako sachiba dakatenganisa ong·aia. Darangba sachiba an·tangko sasono donatnade sikjawa, indiba bang·a manderangan uamangni gisepo maia ong·enga uarangchin dilako man·batenga. Bi·achi ba an·tangni u·ianiko jakkale janggi tangani pal gipinrang maidake janggi tangenga ukosa nibate uamang janggi tangrongbatenga.  

Dr. Hunter ara English mande, ka·tongko rate sangipa ong·achim, aro ua an·tangan ka·tongni sabisikon man·ahachim. Salsao ua an·tang baksa kam ka·rimgiparangna indine aganaha, “Angni janggide denggu mande angko ka·onangatna seoke ra·gipani jako ong·enga.” Uni agansoani gitan ong·bebeaha. Salsao saksa mande uko namen ka·onangataha, aro ua ka·tong sae ga·ake siaiaha. Ian a·gilsakni seng·ani ga·akgimin mandeni obostaoniko jokatna man·gijaniko mesokani ong·a! Uni pilak skia man·giminrang Dr. Hunter ko uni gisikko sason ka·na man·gijaoniko namatna man·jaha. Ua sakgipinchi sason ka·ako man·aha aro uan uko sia ba tanganiko baseatani ong·aha.  

 Indiba  doctorni dakgualania an·tangtangni signiko basesoe ra·e dakgualaniko dakani baksa tosusaatode mamungba ong·kuja. Salantion an·ching an·tangtangni sambao maiba kengniko kal·e roenganirangko nika aro bang·a mondolioni manderangba uno bakko ra·paenga. Uamang saniba an·tangtangko kragija dakanina a·jak sokpilna chanchigiparang ong·toka, aro uamangni namjabatgipa paprangko salgini serikanio serike donenga. Bang·a manderangan an·tangtangni basee ra·anichi an·tangtangni janggirangko gimaatenga. Uamang mamungkoba dakjaoba, uamangni gisikchi uamang a·jak sokpilani donga. An·ching indake aganna man·a je, je manderangan an·tangtangko sasonona ra·baatna man·gipa Isolni bilko man·ja, uamangko Satan sasono ra·skaa. Ua bilakgipa bilko saksaba an·tangoniko man·ja. Ripeng ba bobiltangni namgija dakaniko warachakna man·atgipa bilara Isolni ka·sae on·gipa bilonisa ong·aia.  

A·jak sokpilna skaoniko champengna gita Paulni Philippirangna ku·patiaoniko an·ching nika, “Kristo Jisuo ia je gisik gnangchim, uan na·simangoba ong·china” (Philippirangna 2:5). Jisuni chanchiani gisik dongode darangba sakgipinko dokpilna skani dongjawachim. Chisolo Jisu darangkoba dokpilna skani dongjaha. Ua ka·onangpilanikoba mesokjaha. Uni bi·ania indinesa ong·skaahachim, “Apa, uamangko kema ka·bo, maina maiko uamang daka uko uamang u·ija.”  

Indakgipa chanchiani mandeni kosakona sokbana amgenma? Oe, Jisuba pilak manderangni ga·akgimin mandeni janggi tanganio janggi tangpaahachim. Indioba Ua An·tangni kosako je namgijarangko dakaha, uarangna mamung namgijako dakpilani dongjahachim. Indakgipa gisik tom·tom ong·na man·aniko Isolni de bebera·gipa sakantina on·na ku·rachakani donga. Paul, 2 Korinthirangna 10:5 o indine paraka, “Chinga chanchiarangko aro Isolko u·ianina an·tangko de·gipa pilak chugipako pe·gala aro Kristoko manichina pilak mangsongako bamata.” Krengani aro bamani gride indakgipa Kristoni gisikko man·gen ine darangba chanchijachina. Gisik Rongtalgipani dilanichi minggni kamrang nangrimataniko man·a—mandeni skani aro mandeni kamrang. Ia minggnikode Isol an·chingna dake on·jawa. An·ching sakantisa paponi an·pilna seoke ra·na nanga, aro ua papko dakjana seoke ra·na nanga. Indaka kamranga Gisik Rongtalgipani bil donggijade an·chingna dakna amaniba ong·skaja. Darang mandeba an·tangna jekon saoba dakaha, una ka·onanga, indiba  a·jak sokpiljana ua seoke ra·na man·a. A·jak sokpiljana skani gisikko ua man·na ama. Ia minggni ja·kuranga cheaniko ra·baatgenma? Chong·mot, dakchakna ku·rachakaniko am·ode, bebera·ani biteko an·ching man·a. Aro bebera·anian, Isolni bilakgipa jakpongko an·chingona salbakate mamung pap ka·gnioniko an·chingko chelchakatani ong·skaa.  

 

Namgija Dakanirangko Man·o Maiko Dakgen

 

Bebera·an baksanaba an·chingko namgija dakgiparangni gisikkoba an·ching u·ie ra·na nanga. Ua mande maina indake dakenga uko u·ie ra·gijanio bang·bata neng·nikanirangko chagrongani dongbata.  

Indake mesokgimin donga je, an·chingna namgijako dakgipani kosako an·ching maidake chanchiani donga uni kri an·ching uamangna maikoba dakpilna skata. Maiba namgijako saoba an·chingni kosako aganahaode maina indine inaha uni gimin an·ching chanchiani dongpiljaha. An·ching rang·san ka·onangjolaiaha, aro namnikgijaniko mesokani gita an·ching uamangko dokpilaiaha. Dikdiksa donge an·ching chanchie nikuode, uamang maina indake daka uko an·ching u·ie ra·genchim. Haida ua u·igija dakama, ba saniba ong·gija aganaoniko knae ong·gijako dakmanahama uko u·ie ra·genchim. Unode uamangni kosako an·chingni chanchiani dingtanggenchim.  

Bilsirang re·angaha, golpo mingsako angni knaniko anga angni skiprakanio bang·a changrangnan aganaha. Bang·a changaon anga an·tangna angni neng·nikanirangko chagrongon ia golpoko an·tangnaba aganna nangaha. Ian Philip minggipa budepa Greek philosopherni gimin ong·achim. Salsao ua an·tangni ripeng baksa soroko rama re·engachim. Ua somoio Philipni bobil uamangko an·tangni kosak kelkioni nigamatengachim. Uamang sakgnini re·angmitingo ua bobil, budepa gisik seng·gipani kosako chiko pakdapataha. Mamung ka·onanganiko mesokgija, jeni giminan uamang golpo ka·engachim, mamungba ong·ja ingipa gita Philip golpo ka·angkuaha. Uni ripeng dontonge ua ka·saninggija chi pakdapatgipako sasti on·na am·skaaha. Darangba angna mamung namgijako dakkujaba ine  Philip ka·sne aganchakaha. Aiao inmane uni ripeng indine aganaha, “Indiba  ua mande nang·o chi pakdapataba, na·ade sositokjok.” “Ong·ja,” ine philosopher aganchakaha, “na·a gualenga”. Ua ango chi pakdapja, je mandekon ua anga maidake ong·a ine chanchia ua mandekosa ua chi pakdapa.” 

Maidakgipa gisik! Aro pilak mandean an·tangna chanchiaigija gipinrangko indake ma·sichaktokode ia a·gilsakara mairongpile dingtanggipa ong·genchim. Philipni u·ianiko daktokode an·tangni bobil dakani, jat baseani aro pilak a·gilsakni jegrikanirangara dikdiksanon nampilani ong·tokaigenchim.

Adita somoirang re·angaha, anga saksa dambe ma·gipako napbolatna tariengachim. Bon·kame mondolini bebera·anirangni gimin angni aganna uni nokchi re·angao ua mikchi gra ong·aha. “Angade napbolna man·jawa,” ine ua grapaha. “Mejal attamo angni ma·gipa angona re·bae, angni adatangko bobil daka gnangde napbolna man·jawa ine angna aganeaha.” Angni ka·sne didiana, ua bilsi jolgimikan maina uni adatangko bobil dakengachim uko ua angna aganaha. Uni gisik namgijaniko uni ma·gipaba rongtale u·ijachim. Uni bilsi sni ong·engmitingon uni adatangni an·tangko til·ekdrana jotton ka·aniko ua aganaha aro sanaba aganode maikai ka·mikkenatani dongahachim ukoba ua aganaha. Bilsi chetna ua adatang ka·namgijagipani ka·mikkenatanio donge gisik suk ong·gija bobil dake dongengahachim.   

Carolni adatangko ka·onangani aro bobil dakani a·selko anga ma·siatna man·aha. Mande minggija kragija kamna duk aro ka·onangani a·selko anga chanchiatna man·aha. Uni gisikni saaniko anga maikai namatna man·gen aro uni dukni dakko namatna anga maikai talatna man·genchim? Unon anga budepa Greek philosopherni golpoko gisik ra·ataha. Uko una aganani ja·mano, uni bobil dakenggipa adatangni gimin anga adita sing·dapanirangko dakaha. Uara Kristian ong·achimma? “Ong·ja,” ine Carol aganaha, “uade Kristianni bikpil. Iade diabolni ning·o donga aro indaken dongkuenga.”

Anga una indine aganaha, “Carol, iara namja je, nang adatangde Isolni ka·saani bilkode an·tangni janggi tanganio u·ikuja. Uni pilak kamrangan Satanni skanikosa dakenga. Isol gride uni janggi tanganio Satanni dilaniko warachakna amanian dongjawa. Ukode diabolsa dilenga. Ua Gitel Jisuko u·iode, ua pangnaba indake dakjawachim. Ua nang·ko ka·sae aro mandera·e jakkalgenchim. Da·oba na·a uko Kristian ong·ja inenga. Ua namgijako dakengkua aro namako dakna uo bil gri. Uaba Jisuko u·ie Uko ra·chakode dingtanggipa mande ong·genchim. Da·o nang·ni Kristoko u·ie katchaaniko man·enga gita uaba man·pagenchim. An·ching una bi·chakna nanggen, Carol, uaba maibakai uko jakkalenggipa bobilni jakoni jokna man·pachina.”

Angni una aganengmitingo uni mikrononi mikchirang ong·bataiaha, indiba  ia somoioa uni mikchia gimaenggipa uni adatangna duk man·chakani aro ka·sachakani mikchirangsa ong·skaahachim, aro uko bobil dakani pal bi·chakna skanisa uo dongbaskaengahachim. Un salo ja·sku dipane Carol adatangko Satanni biloniko jokatchina bi·chakskaaha. Uni bobil dakaniko uni mikchirangan su·srange galskaaha, aro salgipino Carolni chiningni gopramo gopaniko nikna anga katchaaha. Uni adatang an·tangni nogipani gimin mamungba ma·siani dongpaja—ine u·iahaon, uni janggi tangani dingtangaha. Ua nogipana simsakna u·iode ua indake namgija dakna miksongani dongjawachim. Uni u·ianikoa pap dongmitinahachim.  

Uandake manderang an·chingni janggi tangani gimin maiko agangen uko na·a chanchiatna man·ama? An·ching maiko dakenga uko u·iode uamang uandake apsan dakjawachimma? Uamang an·chingni gimin, an·chingni chanchiani aro an·chingni ong·a manchako rongtale u·ija ine an·chingba aganna man·genma? Uamangko u·ichake an·ching indine aganna man·odechim, “Angko uamang maidake nikenga uanasa uamang daka, angnamancha daka ong·ja.” Unode an·ching uamangna duk man·chakgen, maina uamang indakana agre mamungkoba u·idapani dongja. An·chingni uamangna nambate dakna man·anide uamangna bi·chakanian ong·aia. 

Da·o ua na·tikrangni skoo ro·ong gatani golpooniko minggni skie ra·aniona an·ching sokbataia. Mande jinma an·chingni gimin maiko chanchigen uano pangchakede jinmani dakaiana ong·gijakode an·ching dakna nangja. An·chingni chadengchakani ro·ongara Isolni Kattaan ong·na nanga. Jinmako niaigija, chanchiatango pangchakaigija, manderang angni gimin maiko chanchigen una jajrengaigija Isol angoniko maiko nangnika ukosa an·ching dakna nangaia. Paul baksa an·chingba indine aganpana man·a, “Kristo baksa anga datkapako man·aha; angade tanggipa ong·jaha, indiba  Kristoan ango tangenga. Aro da·o be·eno angni janggi tanga bebera·ao chong·motan angna ka·sae angni gimin an·tangko on·gipa Isolni Depanteko bebera·ao janggi tanga” (Galatirangna 2:20).