Ian ong∙nasienga ine na∙a ka∙dongchakna man∙gen – Kristoni re∙bapilani ja∙mano bebera∙na amsokpilgijagipa 1000 bilsirangona napegen. Aro diabol iani gimin nang∙ko uianiko nangnikja, chong∙motan uni hajalsa bilsirangna patoko donaniko maina ian uni chong∙motgipa cholonko mesokgen. Satan nang∙ko togina gita hajalsa bilsini gimin nama kattako banaiaha! Ian kenbegnigipa, gisiko nangatani poraiani ong∙a jean nang∙ko nang∙ni pilak knae ra∙giminkogisiko jingjengatna man∙gen. Indiba da∙o na∙a Sastroni aiaio inmangipa bebe ong∙anirangko bakbak re∙baenggipa 1000 bilsirangni gimin u∙ie ra∙na man∙a!
1.Maia obosta ia 1,000 bilsini somoiko a∙bachengata?
“Uamang bilsi hajalsana Jisu baksa tange raja ong∙aha” (Parape∙a 20:4).
(Siani gimin bang∙bate u∙ina, Poraiani Lesson 10ko nibo.)
Aganchakani: Chakatpilanian 1000 bilsi somoini a∙bachengani ong∙a.
2. Ia chakatpilaniko mai mingaha? Sawarang iano chakatatako man∙gen?
“Ian skanggipa chakatpilani. Skanggipa chakatpilanio bak man∙pagiparang kusi ong∙a, aro rongtala ong∙a” (Parapeani 20:5,6).
Aganchakani: Iakon skanggipa chakatpilani minga. Jokgiminrang – pilak chasongrangni pattigimin aro ronglatatgiminrang iano chakatpilatako man∙gen.
3. Sastro rokom gni chakatpilanirangni gimin agana. Basako gnigipa chakatpilani ong∙gen, aro sawarang iano chakatgen?
“Dongpitigipa sigminrang bilsi hajalsa matchotkujana kingking tangjaha” (Para. 20:5). “Maina jensalo gopramrango donggipa darangan uni ku∙rangko knagen, aro namarangko dakgipa janggini chakatpilaona, aro namgijarangko dakronggiparang bichalni chakatpilaona ong∙katgen” (Johan 5:28, 29).
Aganchakani: Gnigipa chakatpilani bilsi 1,000 matchoto onggen. Jokata manggijagiparang ia chakatpilanio chakatgen. Iako sao nangako man∙gimin chakatpilani mingaha.
Ka∙sapae u∙ibe ra∙bo: Jokatako man∙giparangni chakatpilani 1,000 bilsirangni a∙bachengani somoio ong∙gen. Jokata man∙gijagiparangni chakatpilani 1,000 bilsi bon∙ao ong∙gen.
4. Mia gipin obostarang 1,000 bilsirangni a∙bachengo ong∙gen?
“Nibo, ua aramrango rebaenga; aro pilak mikron, aro uko sugiparang uko nikgen’ (Para. 1:7).”Maina Gitel an∙tangan, inchroa, salgioni ong∙onbagen; unon Kristoo sigiparang skang chakatgen. Unikoa an∙ching tanggiparang, dongpitigiparang, bangbango Gitelko aramrango uamang baksa damsan rimdoako man∙gen” (1 Thess. 4:16,17). “Aro banggribea, manderang a∙ao ong∙chengaoni uandakgipa banggribea uandake ta∙raka…Aro manderangni kosako salgioni dal∙begipa, muanprakmang gita, stil onaha” (Para. 16:18,21). (Jeremia 4:23-26; Isa. 24:1,3,19,20; Isa. 2:21 koba nibo).Skia man∙gipa manderangni stilni jrimaniko toe niani gitade 58 oni 100 poundrangni gita ong∙a!
Aganchakani: Bilsi 1,000 a∙bachengo gipin ong∙nasienggipaobostarangara:Itihaso on∙gkkugijagipa banggribeani aro stilrang a∙ao ga∙akha; Jisu An∙tangni manderangona aramrango re∙bagen; aro pilak toromirang Jisuko bangbango grongna damsan rimdoako man∙gen. (Poraiani Lesson 8 o Kristoni gnigipa re∙bapilani gimin bang∙bate poraibo).
5. Jisuni gnigipa re∙bapilanio jokgijagipa tange donggipa aro sigiminrangna mai ong∙gen?
“Uni ku∙chilrangni ku∙bibachi ua namgijako dakgiparangko so∙otgen” (Isaia 11:4). “Aro unon ua niam pe∙gipa parape∙ako man∙gen, aro uko Gitel Jisu uni ku∙sikni balwachi nisigen, aro uni re∙baani mikkang pa∙achi gimaatgen” (2 Thess. 2:8). “Uandake papirang Isolni mikkango gimachina” (Gitrang 68:2). “Dongpitgipa sigiminrang bilsi hajalsa matchotkujana kingking tangjaha” (Parape∙a 20:5).
Aganchakani: Jokgijagipa tanggiparang Kristoni gnigipa re∙bapilanio Uni mikkangon nisiatako man∙gen. Jensalo Jisuni gopramo sa∙gre mikkang pa∙ahaon, Romeni chu∙gimik sipairang ga∙akaha aro sia gita ong∙aha (Mati 28:2,4). Jensalo pilak sa∙grerangni, Pagipa Isol, aro Depante Isolniteng∙suani damsan ong∙on, jokna man∙gijagiparang mikka riprapachi nisiatako man∙gen. Sigimin denggu manderang Jisuni re∙bapilanio uamangni gopramrango bilsi halsa matchotkujana kingking donggen.
6. Bilsi hajalsani somoio jokna man∙gijagiparang gisik pil∙na cholko man∙gen ine bang∙an bebera∙a. Iani gimin Sastro maiko aganaha?
“Aro ua salo Jihovani so∙otgimin a∙ani ku∙chot saoni a∙ani ku∙chot gipinona donggen: (Jeremia 25:33). “Anga niaha, aro nibo, mande dongjaha” (Jeremia 4:25).
Aganchakani: Bilsi hajalsani somoio darang mandena gisik pil∙na man∙jawa maina uano darang mandeba agilsako dongjawa. Toromirang salgionsa onggnok. Pilak denggu manderang a∙aon sie donggen. Parapea 22:11, 12 rongtalbee talataniko daka je Jisuni re∙bapilna skangan sakanti mandeni gimi chanchianiko matchotatgnok.Jerangan bilsi hajalsa a∙bachengaona kingking Kristoko ra∙chakna senge donga ru∙utbeen senga dongaha.
7. Sastro agana Satanko bilsi hajalsani somoio, “tubeao” kae donaha. Ia a∙kolara maiko miksonga?
“Aro anga salgioni sa∙gre ong∙onbaako, nikaha, uo tu∙beani chabi, aro uni jako dal∙gipa sliting gnangchim. Aro ua dragon, chong∙motan gitchamgipa chipu, Diabol aro Satan ong∙gipako rim∙e bilsi hajalsana uko ka∙aha, aro tu∙beaona uko galataha…maikai ua bilsi hajalsa matchotkujana kingking” (Parape∙a 20:1-3).
Aganchakani: “Tu∙begipa akol” kattara Greek kata “abusso,” ba abyss” oni ong∙bara. Ia apsangipa kattako Abachenga 1:2 o Greek ku∙siko a∙gilsakko ong∙atanio Niam Gitchamo jakkalaha, indiba uano “chi tu∙ani” ine pe∙skaaha. A∙a porongrong aro bangbang ong∙engpitichim, aro andalani chi tu∙ani kosako dongachim.” “Chi tuani,” “tu∙begipa a∙kol aro abyss” ingipa kattarangara apsanko agana – Isolni ong∙atna skangde, a∙ara chu∙gimikan andalachim. Jeremia bilsi hajalsani somoiko talatanio Abachenga 1:2 gitan apsadake a∙ani gimin “porongrong aro bangbang” “mande dongjaha, gisim” (Jeremia 4:23, 25,28)ine talataha. Uni gimin bilsi hajalsani somoio, a∙ao andalani, mande donggijaniko “tu∙begipa a∙kol” ingipa kattachi talataha, ian a∙gilsakko Ong∙atna skang a∙bachengani somoio gitan ong∙aha. Aroba, bilsi hajalsani somoio, Isaia 24:22 o Satan aro uni sa∙grerangni gimin “koedirangko a∙kolo chimonga” gita chimonggen, aro “patoko chipchanggen” ineba aganaha.
8. Satanko slitingchi ka∙a ingipara maia? Maini gimin uko kana nangaha?
“Aro salgioni sa∙gre…uni jako dal∙gipa sliting gnangchim…Satan ong∙gipako rim∙e bilsi hajalsana uko kaaha…aro uko chipe uni kosako mohor su∙aha, maikai ua bilsi hajalsa matchotkujana kingking jatrangko brangatjawa” (Parape∙a 20:1-3).
Aganchakani: Slitingara toatna gita chinsa ong∙a – ian obostarangchi kaako man∙ani sliting ong∙a. Kosakoni bil gnanggipako chong∙motgipa slitingchi kae chipchange donna man∙ja. Satanara “kae donako” man∙a gita ong∙aha maina ua darang mandekoba dakmajona man∙jaha. Jokgijagiparang pilakan sitokaha aro jokgimin pilakan salgio ong∙aha. Gitel diabolko ia a∙gilsako chipchange dona gita ong∙aha jedakode ia a∙gilsako darangkoba dakmajona ka∙donggenchimoba man∙jaha. Diabol, bilsi hajalsana, a∙gilsako darangkoba dakmajona man∙gija an∙tangni sa∙grerang baksa dongna draatako man∙aniara, slitingchi kae dona gita ong∙aha.
Bilsi hajalsa a∙bachengani somoini obostarang:
- Dal∙gipa banggriani aro stil (Parapea 16:18-21)
- An∙tangni toromirangna Kristoni gnigipa re∙bapilani (Mati 24:30,31).
- Jokgiminrang janggiona chakatpilani (1 Thess. 4:16).
- Jokgiminrangna jringjrotni sigijaniko on∙aha (1 Kor. 15:51-55).
- Jokgiminrangna Jisu gita bimangrangko on∙aha (1 Johan 3:2; Philip. 3:20,21).
- Pilak toromirang aramrangona rimdoako man∙a (1 Thess. 4:17).
- Tange donggipa denggurang Gitelni kusikni kubibachi nisiatako manaha (Isa. 11:4).
- Jokgijagipa sigiminrang bilsi hajalsa matchotjana kingking tangjaha (Para. 20:5).
- Jisu toromirangko salgiona rimdoanga (Johan 13:33, 36;14:2,3).
- Satan kaako man∙aha (Para. 20:1-3).
9. Parapea 20:4 o aganani gitade bilsi hajalsani somoio salgio bichal ka∙ani donggen. Maini gimin? Sawarang iano bak ra∙gen?
“Aro anga, singhasonrangko nikaha, aro uarango asonggiparangna bichal ka∙aniko on∙aha. Aro uamang bilsi hajalsana Jisu baksa tange raja ong∙aha” (Para. 20:4). “Ba rongtalgipa a∙gilsakko bichal ka∙gen ine na∙simang u∙ijama? ...An∙chinga sa∙grerangko bichal ka∙gen ine na∙simang u∙ijama? (1 Kor. 6:2,3).
Aganchakani: Chasong jolgimikni jokgiminrang (aro haida namgipa sa∙grerangba) bilsi hajalsani somoio bichal ka∙anio bakko ra∙gen. Pilakgimagiminni kamrang, diabol aro uni sa∙grerangni kamrangko nipiltaianiko dakgen. Ia bichal ka∙ani pilak gimagiminrangni gimin sing∙anirangko jokgiminrangna rongtalbee aganchakaniko dakgen. Bon∙kamao, Jisu gita janggi tangjaode ba Unbaksa ong∙jaode, salgioniko chipchangako man∙gen ine pilakan nikna man∙gen.
Bilsi 1, 000ni somoirango ong∙gipa obostarang:
- A∙gilsak stilrang ga∙akani aro banggriani a∙sel bnekatako manaha (Para. 16:18-21).
- A∙gilsak chu∙gimikan andalaha aro sikdikdikgipa ong∙aha (Jeremia 4:23,28).
- Satan a∙gilsako kaako aro dongna draatako man∙aha (Para. 20:1-3).
- Toromirang salgio ong∙e bichal ka∙anio bakko ra∙a (Para. 20:4).
- Denggurang pilakan siaha (Jeremia 4:25; Isaia 11:4).
Bilsi hajalsani somoio, a∙gilsako donggipa sakanti janggian biap damgnini damsao ong∙gen:
(1) A∙gilsako, sia aro gimaani, ba (2) salgio, bichal ka∙anio bak ra∙a. Gitel nang∙ko salgio ong∙china okamenga. Ka∙sapae Uni okamaniko ra∙chakbo!
10. Bilsi hajalsa matchoto, rongtalgipa songjinma, Gital Jerusalemko salgioniko a∙aona ra∙onbagen. Sawarang ian baksa re∙bagen? Bano iako dongen?“Anga…rongtalgipa songjinma, Jerusalem gitalko, Isoloni salgioni ong∙onako nikaha…Aro anga ua singhasononi gam∙bee indina ku∙rangko knaaha, Nibo, manderang baksa Isolni dongchakani” (Parapea 21:2, 3). “Nibo, Jihovani sal re∙baa…Aro ua salo uni ja∙arang Jerusalemni mikkango salaramchipako donggipa Joitun a∙brini kosako chadenggen, aro Joitun a∙bri salaramchi aro saliramchi uni jatchio dal∙begipa a∙kongchi bak gni dake sualko man∙gen…Aro angni Isol Jihova, aro Un baksa rongtalgiparang re∙bagen…Pilak a∙song, Gebaoni, Jerusalemni salgipeng Rimmonona kingking a∙kawe pil∙gen” (Zekaria 14:1,4,5,10).
Aganchakani: Gital Jerusalemko jeon da∙o Joitun a∙bri dongenga uno songdimako man∙gen. A∙bri a∙kawe pil∙atako man∙gen, jeni kosakon songjinmako dongen. Chasing jolgimikni toromi manderang (Zekaria 14:5), salgini sagrerang (Mati 25:31), Pagipa Isol (Para. 21:2,3), aro Depante Isol (Mati 25:31) rongtalgipa songjinma baksa a∙gilsakona re∙bapilgen maina ian Jisuna dingtangmancha gittamgipa changna re∙baani ong∙gen. Gnigipa rebapilaniara An∙tangni rongtalgiparangna, gittamgipa changde An∙tangni rongtalgiparang baksa re∙bagen.
Jisuni Minggittam Re∙baanirang:
Skanggipa Re∙baani Bethlehem matchuni chikongona |
Gnigipa Re∙baani Bilsi 1,000 ni a∙bachego An∙tangni manderangko Salgichina rimdona aramrango re∙bagen. |
Gittamgipa Re∙baani Bilsi 1,000 matchoto rongtalgipa songjinma aro pilak toromi manderang baksa re∙bagen. |
11. Ia somoio sigimin denggurangna mai ong∙gen? Maikai ian Satanko neng∙nikatgen?
“Dongpitigipa sigiminrang bilsi hajalsa matchotkujana kingking tangjaha…Aro bilsi hajalsa matchotoa Satanko uni patokoniko enggen; aro ua a∙ani ki∙tik brini jatrangko Gog aro Magogko brangatna, aro uamangko dakgrikaniona chimongna ong∙katgen” (Para. 20:5,7,8).
Aganchakani: Bilsi 1,000 matchoto (jensalo Jisu gittamgipa changna rebapilon), papirang chakatatako mangen. Satan engako man∙gen, a∙gilsak manderangko tol∙napna gaptako (a∙gilsakni pilak jatrang) man∙gen.
12.Uni ja∙mano Satan maiko dakgen?
“Satan…ua a∙ani ki∙tik brini jatrangko… brangatna aro uamangko dakgrikaniona chimongna ong∙katgen, uamangni bang∙a sagalni an∙cheng gita ong∙a. Aro uamang a∙ani apalako doangaha. Aro rongtalgiparangni a∙tipko aro ka∙sara songjinmako duulaha” (Para. 20:7-9).
Aganchakani: Satan, an∙tangni bewal gita, bakan a∙gilsako watanggipa manderangko chong∙motan chasong jolgimikni papirangko tol∙napna a∙bachenggen. (Satanni a∙bachengani gimin bang∙bate u∙ina Poraiani Lesson 2ko nibo). Ua an∙tangnisa ong∙a ine a∙kange ra∙naba donga, ua kragija bichal ka∙ako man∙esa salgini songnokoni galonatako man∙aha, Isolara bilna okkrigipa aro mangnamgijagipa ong∙a ine uamangko bebera∙atgen, uamang ku∙cholsan ong∙ode, Isolde cholko man∙jawa. A∙gilsak gimik songjinmani kosako ong∙ode, cheani uamangni ong∙gen. Indake jatrang ku`cholsan ong∙gen aro an∙tangtangni sipairangko Gital Jerusalemko changdulna tarigen.
13.Maia Satanni songjinmako rim∙gittangna ba nisiatna miksonganiko dontongatgen?
“Unon wa∙al salgioni ong∙onbae uamangko minokaha. Aro uamang brangatgipa Diabolko wa∙alni aro gondokni wario galaha, uan gnigipa siani ong∙a” (Para 20:9,10; 21: 8). “Aro na∙simang denggugiparangko ga∙bekgen; maina angni dongimin salo uamang na∙simangni ja∙pani ning∙o tappra ong∙gen ine Kotokrangni Jihova agana” (Malaki 4:3).
Aganchakani: Wa∙al bakan salgioni papirangni kosakona ong∙onbagen (bang∙arangni bebera∙ani gita, norokoni ong∙ja) aro diabol aro uni sa∙grerangko man∙gope, pilakkon tappra ong∙e kamgen (Mati 25:41). Ia wa∙al jean papko aro papirangko nisiatgen, ukon gnigipa siani mingaha. Siaoni chakatpilani dongjawaha. Ian bon∙kamani ong∙a. Iako u∙ie ra∙bo, bebera∙rongbewal gita, diabol wa∙alko champengna man∙jawaha. Ua uno ong∙gen, and uko bon∙kimitatsranggen. (Wa∙al ba Norokni gimin chu∙gimik ma∙sina Poraiani Lesson 11ko nibo. Siani gimin bang∙bate u∙ina, Poraiani Lesson 10 nibo).
14.Jensalo papirangko kamtokahaon aro wa∙al kimitako man∙ahaon, maia rasongni, aro gisiko nangatani uni ja∙mano ong∙gen?
“Maina, nibo, anga salgi gital, aro aha gitalko ong∙ata” (Isaia 65:17). “Anching gital salgirang ro gitl aako nichaksoenga, jeo torom dongkama” (2 Pitor 3:13). “Aro singhasono asonggipa inaha, “Nibo, anga pilakkon gita daka” (Para. 21:5). “Manderang baksa Isolni dongchakani, aro ua uamang baksa donggen, aro uamang uni manderang ong∙gen” (Para. 21:3).
Aganchakani: Isol gital salgirangko aro gital a∙ako ong∙atgen, aro Gital Jerusalem gital a∙ani skotong songjinma ong∙gen. Pap aro uni ong∙siani pangnajolna re∙anggnok. Isolni manderang bon∙kame uamangna ku∙rachakgipa songnokko man∙rikgen. “Uamang katchaaniko aro ka∙srokaniko man∙gen, aro kalimani aro skimani katanggen” (Isaia 35:10). Iako talatna bebera∙na amsokgija ong∙a aro rasongko gimaatna gualbeani ong∙gen! Isol uano nang∙na biapko tarisoaha (Johan 14:1-3). Uno dongna miksonganiko dakbo. Jisu nang∙ni namnikpaanina sengtime dongenga. (Salgini gimin chu∙gimik ma∙sie ra∙na, Poraiani Lesson 4 ko nibo).
Bilsi 1,000 matchoto Ong∙gni Obostarang:
- Jisuni toromirang baksa gittamgipa re∙baani (Zekaria 14:5)
- Rongtalgipa Songjinma Joitun A∙brio dongkamgen, jekon a∙kawe pil∙atgen (Zekaria 14:4,10).
- Pagipa, Uni sa∙grerang, aro pilak toromirang Jisu baksa re∙bagen (Para. 21:1-3; Mati 25:31; Zek. 14:5).
- Denggu sigiminrang chakatatako man∙gen; Satanko engako man∙gen (Para. 20:5,7).
- Satana∙gilsak gimikko tol∙napgen (Para. 20:8).
- Papirang rongtalgipa songjinmako changdulgen (Para. 20:8).
- Papirang wa∙alchi nisiatako man∙gen (Para. 20:9).
- Gital salgirang aro a∙gilsakko ong∙atgen (Isa. 65:17; 2 Pitor 3:13; Para. 21:1).
- Isolni manderang Isol baksa jringjrotna gital a∙gilsako kusi ong∙e donggen (Para. 21:2-4).
15.Baditana bakbake ia obostarang ong∙genchim an∙ching u∙ina man∙genma?
“Uandake na∙simangba, jensalo ia pilakkon na∙simang nika, uan sepangaha, cholgugaona sokbaaha ine u∙ibo” (Mati 24:33). “Indiba iarang ong∙bachengon na∙simang nichaobo, sko de∙chaobo; maina na∙simangni piokani sepangjok” (Luk 21:28). “Maina uko matchote aro kan∙dikate Gitel a∙gilsako an∙tang katako chu∙sokatgen” (Rom. 9:28). “Maina jensalo Tom∙tomani aro name dongani ine manderang agana, unsalo uamangna ring∙gitik gimaani sokbagen” (1 Thess. 5:3).
Aganchakani: Jisu aganaha jensalo Uni rebaani chinrang mingsani jamano mingsa dake taraken chusokengahaon, an∙ching katchana aro u∙ina nanga maina ia papni a∙gilsakna ru∙utgijan bon∙ani sepangaha – cholgugaonaha. Jensalo a∙gilsako tom∙tomanina bilakgipa kam ka∙aniko dakon an∙ching a∙gilsakni chon∙kamaniona re∙baengaha ine u∙ina man∙a ine watata Paul aganaha. Bonkame, Sastro agana, Isol kamko kandikatgen (Rom. 9:28). Uni gimin mamungba kenchakani grian u∙ina man∙a je an∙chingara sro ra∙gipa somoiosa janggi tangengaha. Gitel chanchisogijani somoio rang∙gitik re∙bagen, je kontakon darangba u∙ina man∙ja indiba Isol Pagipasan u∙ia (Mati 24:36; Wat. 1:7). An∙chingni naljokna man∙anide da∙on tarina nangaha.
16. Jisu, jean nang∙na namen ka∙sara, Uni jringjrotni aiao inmangipa songnoko nang∙na biapko tariseongaha. Jisu An∙tangan nang∙na tarisoenggipa rasongni noko dongna na∙a tarisamsoengama?
Nang∙ni Aganchakani: _______________________________
Nang∙ni Sing∙anirangna Aganchakaha
- Rongtalgipa Songjinmako ra∙onbaani saloni, salgioni wa∙alchi denggurangko nisiataona kingking badita ru∙ute somoiko ra∙gen?
Aganchakani: Sastro agana, “dikdiksana” (Para. 20:3). Satan an∙tangni miksongako aro dakgrikani silchidareko tariemanderangko an∙tangko ja∙rikatna chu∙onga gitan somoiko nanggen. Tiktak somoiko jakkalani gimin Sastroo parape∙jaha.
- Maidakgipa bimangrangko manderang Isolni gitalgipa songnoko man∙gen?
Aganchakani: Pioka man∙giminrang Jisuni bimang gita ong∙gen ine Sastro agana (Phil. 3:20,21). Chakatpilani ja∙mano Jisuo chong∙motgipa be∙en bimang dongchongmota (Luk 24:36 – 43). Jokgiminrang memangrang ongjawa. Jedake Adam aro Hoba chong∙motgipa be∙en bimangrang donga apsandake, uamang chong∙motgipa manderang ong∙gen.
- Jisuni gnigipa re∙bapilanina maikai gimagiminrang aganchakgen?
Aganchakani: Sastro agana uamang “a∙brirangna aro ro∙ongrangna, aganaha, “Chingni kosako ga∙akbo, aro Mes Bi∙sani ka∙onangaoniko chingko donnubo, aro sawa chadengna ama?” (Para. 6:16,17). (pod 14 aro 15 koba nibo). Toromirang indine aganskagen, “Nibo, ian an∙chingni Isol; an∙chinga Una sengsoaha, aro Ua an∙chingko jokatgen; ian Jihova ong∙a; an∙chinga una sengsoaha, an∙chinga katchagen aro Uni jokatanio ka∙srokgen” (Isa. 25:9).
- Papirang Gital Jerusalemni ning∙o donggipa toromi manderangko nikatna man∙genma?
Aganchakani: An∙ching chong∙mot ong∙ede u∙ina man∙ja, indiba Sastro aganaha je songjinmani pakmarang krystal gita grikgipa, jasper ro∙ong gita (Para. 21:11, 18). Mitam bebera∙a je Gitrang 37:34 aro Luk 13:28 o pangchake jokgimin aro jokgijagiparang saksa sakgipinko nikna man∙gen.
- Sastro agana, Isol An∙tangni manderangni mikronrangni mikchirangko u∙sitgen aro uano siani, kalimani, ba saknaani dongjawaha. Iara basako ong∙gen?
Aganchakani: Parapea 21:1-4 aro Isaia 65:17 o aganani gitade, papko a∙gilsakoniko rongtalatani ja∙manosa ong∙gen dake nika. Bon∙kamgipa bichal ka∙aniko dakani aro papko wa∙alchi nisiatani somoio Isolni manderang duk ong∙na bang∙en a∙selrang donggen. Maina uamangni ma∙drang aro ripengskarangko gimaaha ine u∙igen aro je manderangna uamang ka∙saahachim uamangko wa∙alo nisiataha ine nikahaon ka∙beani mikchirang aro ka∙tongni sa∙dikanirangko kenchaka grianIsolni manderangona ra∙bagen. Indiba wa∙al kimitahaon, Gitel uamangni mikchirangko u∙sitgen. Ua gital salgirang aro gital a∙gilsakko An∙tangni manderangna daktaigen, jean uamangna aganna amsokpilgijagipa kusi ong∙ani aro chu∙sokaniko ra∙bagen. Aro kalimani, duk ong∙ani, grapani aro ka∙tong saani pangnajolnan re∙anggnok aro dongjawaha. (Isolni manderangna salgini nokni gimin bang∙bate u∙ina Poraiani Lesson 4 ko nibo).
- Maikai namgijagipa sa∙grerang aro denggu manderangko nisiataniara, Isol Pagipa aro Uni Depanteko duk ong∙atgen?
Aganchakani: Beben uamang nina nitogijagipa papni canceroni pangnajolna jakgitel ong∙ataniko man∙gnok aro katchaanio ong∙gen aro a∙gilsak aro salgisak pangnajolna naljokanio ong∙gnok. Indioba, uamang dukkoba chagrongna nanggen maina uamang an∙tangtagnni ka∙sagiminrangko gimaatna nanggnok, jerangna Jisu sichakaha, jerangan papo dongkamna basee ra∙aha aro janggi jokaniko jegalaha. Satan chang∙saode an∙tangan uamangni ripeng ong∙ahachim, aro wa∙alo gala man∙gimin banga manderangan uamangni ka∙sagimin dedrangrang ong∙ahachim. Bamgija dake Nang∙oni katanggipa dedrangrangni nisiataniko nikna namen duk ka∙beani ong∙gen. A∙bachengaoni papni a∙sel onjetgipa balara Pagipa aro Depanteni kosako onggen. Uamangni miksonganiara manderangna ka∙sana aro ka∙sine uamangko janggi jokaniona rimbanasa ong∙achim. Uamangni chanchianiko Hosea 11:8 talataniko dakaha, jeon indake agana, “Anga nang∙ko maikai watgen, O Ephraim? Anga nang∙ko maikai watgalgen, O Israel?... Angni ka∙tong ang ning∙o pil∙aha, angni ka∙sachakanirang ding∙baaha” (Hosea 11:8).
- Maidakgipa be∙en bikap Jisuo dongaha?
Aganchakani: Uo be∙enni bimang aro grengrang gnang. Uni chakapilani ja∙mano, Jisu An∙tangni sninggiparangna mikkang pa∙aha (Luk 24:36-43) aro An∙tango be∙en aro grengrang donga ine uamangko An∙tangni be∙enko dangtapna on∙anichi aro na∙tok aro bija bitchiko cha∙anichi mesokaha.
Jisu Salgichina Gadoanga
Uni jamano Ua uamang baksa Bethanyona jaachi reangaha, aro Ua uamang baksa agangrikaniko dakani jamano, salgichi doangaha (Luk 24: 50, 51). Jisuni salgichina doangmitingo sagre jean sninggiparangna mikkang paaha indine talataniko dacha, “Ia Jisuan, jeko na∙simangoniko salgiona rimdoangaha, jekai na∙simang uko salgiona re∙angako nikaha, uandake re∙bagen” (Wat. 1:11).
Ia Apsan Jisuan Re∙bapilgen
Sa∙greni talatani gita ia apsan Jisuan (be∙eno aro grengrango) re∙bapilgen. Uan chong∙mot ong∙gen, me∙mang ongjawa, aro chakatpilako man∙gipa toromirang Ugitan bimang donggen (Philip. 3:20, 21; 1 Johan 3:2). Rongtalgiparangni gitalgipa bimangarang sogijagipa aro jringjrotna sigijagipaba ong∙gnok (1 Kor. 15:51-55).
See Rakkianirang: _________________________________________________________________________
Nipiltaianiko Dakani
- Parape∙a 20 ni bilsi 1,000 ni a∙bachengo ong∙gnigipa obostarangko chin dakbo (10)
_______ Jisuni gnigipa re∙bapilani
_______ Banggria aro stil ona
_______ Toromirang gopramoni chakatatako man∙gen.
_______ Satanko kagen.
_______ Tange donggipa papirang so∙otako man∙gen.
_______ Toromirang jringjrotna sigijaniko on∙gen.
_______ Rongtalgipa Songjinmako ra∙onbagen.
_______ Toromirangko salgichina rimdoanggen.
_______ Papirang gopramrango sie donggen.
_______ Totomirangna Jisu gita bimangrangko on∙aha.
_______ Toromirangko aramrango rimdoanga.
_______ Mitam jokgiminrang a∙ao dongrikgen.
(2) A∙gilsako pilak tange donggiparang Jisuko gnigipa re∙bapilanio nikgen (1)
_______ Bebe
_______ Tol∙a
(3) Salgio toromirang me∙mang gita bimangrang donggen. (1)
_______ Bebe
_______ Tol∙a
(4) Ka∙mao on∙sogipa badiarang bilsi 1,000 somoini ni gimin bebe ong∙a? (2)
_______ Bang∙a papirang gisik pil∙gen.
_______ Satan aro uni sa∙grerang a∙gilsako dongna draatako man∙gen.
_______ Satan obostachi kaako man∙gen je uano televisionko nina man∙jawa.
_______ Bilsi 1,000 mitingo a∙gilsako salni teng∙suani aro seng∙ani donggen.
_______Satan sigimin denggurangko unbaksa dongna janggiona chakatatgen.
_______ Toromirang salgio ong∙gen, aro bichal ka∙anio bak ra∙gen.
(5) Bilsi 1,000 ni matchoto ka∙mao on∙gipa badia obostarang bebe ong∙a? (4)
_______ Kristo bongagipa changna rebapilgen.
_______ Rongtalgipa songjinmako Washington, D.C ni jolona ra∙onbagen.
_______ Namgipa sa∙grerang, Pagipa Isol, aro toromirang Jisu baksa re∙bagen.
_______ Denggurang chakatatako man∙gen.
_______ Jisu An∙tangni toromirang baksa re∙bagen.
_______ Isol denggurangko chakatpilatna jedakeba chanchijawa.
_______ Denggurang ka∙onanggipa namgijagipa sa∙grerangchi nisiatako man∙gen.
_______ Isol gital salgisak aro gital a∙gilsakko daktaigen.
_______ Isol Satanko agilsak aro salgisakni pil∙sachi watatgen.
_______ Diabol rongtalgipa songjinmako bilakgipa gitalgipa missilechi gimaataniko dakgen.
(6) Satanko kagipa slitingara (3)
_______ Chinsa ong∙a – obostarangchi kaani.
_______ A∙gilsako dongna uko draatgen.
_______ Gitalgipa, gitalgipa siloniko tarigen.
_______ Konta 24 ni gisepo uko diabolchi be∙atgen.
_______ Isolni manderangko jerangan salgio naljoke donggen majoaonirangko dakjana uko rakkigen.
(7) Tugipa akolni gimin badia aganirang kakket onga (2)
_______ Ian aani ningo apalgipa akol tugipa onga.
_______ Iani orto “abyss” ine miksonga.
_______ Ian a∙gilsakni gimin agana – andalani, bangbang aro mamungba griani
_______ Ia norokni minggipin bimung ong∙a.
(8) Badiarang skanggipa, gnigipa, aro gitamgipa Jisuni re∙bapilani gimin bebe ong∙a? (3)
_______ Skanggipa re∙baaniara bi∙sa ong∙e Bethlehemona re∙baani ong∙achim.
_______ Skanggipa rebaaniara Noahni salo onga.
_______ Gnigipa re∙baaniara Martin Lutherni salo ong∙a.
_______Gnigipa rebapilanide bilsi 1,000ni abachengo ong∙gen.
_______ Gitamgipa re∙bapilanide bilsi 1,000 matchoto ong∙gen.
_______ Gitamgipa re∙bapilani gitalgipa a∙ako ong∙atani ja∙manosa ong∙gen.
(9) Wa∙alni gondoko sigigipa papirangan gnigipa siani ong∙a.
_______ Bebe
_______ To∙a.
(10) Jisuni angna tarisoenggipa aiao inmangipa noko anga dongna miksongenga.
_______ Oe
_______ Ong∙ja
