Elisah in jong nupi nu koma chun adongin “Insunga ipi nanei em?” ati.

Amanun jong “Thao twi koina bel tilou insunga thil dang kaneitapoi,” tin aseiye. Insunga thil jouse chu khotona neilou sumbatna pa chun abonchakeiya anakichom thengsel sohkei ahitan, tua hi achapa teni toh thao bel bou chu um ahitai. Hiche laiya chu olive thao hi ngaichat jing thil khohpen khat anahie. Jan tengleh mei kivah naa dia kimang, meicho na dinga jong kimang, ann-hon naleh damdoi dia jong anakimang ji ahi.

Elisha in jong meithai nu leh acha teni henga aseitan chenlang na insah-inlhang teho henga thao bel ahomkeosa nachom khom thei chan gachom khom tan ati. Chutengleh kot kikha khum unlang, insunga thao twi naneikham kham chu bel homkeo jouse sunga chun lhailut uvin ati. Elisha thusei bangin agabol tauvin ahileh thil kidangtah khat asohdoh tai. Thao twi themkhat umsun chu kang theitalouvin alongin bel homkeo jouse adimsoh takahsen akisung sung jing theiye!

Amanun jong Elisha themgao pa henga “hiche hi ipia Kaman ding nati ham” tin adonge. Themgao pa’n jong aseipeh in, “thao twi sese chu kijoh inlang, nabat kisah doh inlang, chuleh nasum aval chengsea chun nacha teni hinkho kisem tan” ati. Hitia thil kidang tah amujeh uvin meithainu toh chateni chu Elisah angsunga konin kipahtah in apot tauve. Tunin nang jong mi khotona neilou satan angsunga akonin Pakaiyin jalenna nape nom e. Nangin jong nakhon hom keosa chu Pakai thao twi sundim sah in chutengle hiche thilkidang tah chu nachan ding ahi.

SIM DING

Bible hohi sim cheh inlang a onglai sudim in.

1. Bible a thao twi toh abel chu ipi vetsahna ahi kiti em?

A. Solchahte 9:15 Ahivangin Pakai chun ajah-a, “Chetan, chidang namdangho hengle lengho henga chule Israel chate henga kamin polutle dinga __________ __________, kamanchah lhen ahi.

B. 1 Samuel 16:13 Hijeh chun Samuel jong chun athaotwi saki thei chu alan asopite lah a ama chu thao anutai; hiche nikhoa patchun David chunga Pakai __________ thanei tah in ahung pangin aum jing tan ahi. Samuel jong akipatdoh pai paiyin akho lam Ramah lang achetai.

NOTE: Bible chun eiho leibel ihiuvin Pathen chu bel dengpa ahi ati (Jeremiah 18:1-6; Rome Mite 9:20, 21). Mijouse hi ajeh khat neiya kisemdoh sohkei ihiuve. Bible pumpia thao hi Pathen lhagao toh kitekah jing ahi. Lhagao Thengin lungsungu asalvahna jing ding vetsahna dia Hebrew teho houbuh a chu olive thao thengset kide-vah jingkei ahi. Pathenin alhagaova Ama mite jouse hi alodim sohkei nom e (Joel 2:28).

2. Lhagao theng kiti hi Pathen thilbol theina mai mai kiseina ham, ahilouleh Amatah hi Pathen ham?

Solchahte 5:3, 4 Ahinla Peterin, “Ananias ibola gam man chu alang kikoiya __________ __________ najoulhep dinga satanin nalung sung alodim hitam Aum laiya chu nanga tum hilouham? Chule najoh nunga jong chu nangma thuneinaa um hilouham? Ibola hitobang hi lunga vop nahim? Nangman mi najoulhep ahipoi, Pathen najoulhep ahibouve,” ati.

Ephesus Mite 4:30 Lhatdoh nikhoa dinga mohor nakinamnau Pathen Lhagao Theng chu __________ mosah hih un.

NOTE: Peter seidan chun Lhagao theng joulhep hi Pathen joulhepna ahie. Chunaban a, baptize ibol tenguleh Apa, Acha, chuleh Lhagao Theng minin bolun tia Jesun eihil u ahi (Matthew 28:19, 20), hiche chun Lhagao theng hi Patheng hing thum lah’a athum channa mi ahi tichu avetsah e. Ama chu Pa toh Chapa toh kibahna nei ahi. Chuleh Lhagao theng chu lungphamo thei ahidan jong Bible in aseiye, achutileh Amahi kipaji leh lhasetji hethei ahing ahi in, Pathen thilbol theina mai mai ahipoi. Lhagao Theng hi hi eiho kithopi ding ahin, thutah lhagao ahin, Pakai lhagao ahin, Pakaiya kona lhagao sagi, chuleh Ama chu lhagao ahi tihi Pathen lekhabu thengin aseijing e. Hiche ho jouse chu mi (Person) kiseina ahi.

3. Lhagao theng natoh thupipen (primary work) chu ipi ham?

John 16:13 Lhagao dihtah chu ahung teng vang le ama chun thutah lam jousea nang ho __________ dingu ahi; ijeh-inem itile aman achama asei lou ding, ajah chan asei ding bou ahi, chule khonung thusoh ding __________ dingu ahi.

John 14:26 Ahinla Pan kamin a ahinsol ding Lhamonsah Lhagao Theng chun imajouse __________ soh kei dingu, chule najah uva kathusei chengse hi nageldohsah dingu ahi.

NOTE: Jesu in kaumpi jing dingu nahi atin, chuleh lhagao thenga kona chu Aman eiumpiuva chuleh isunguva cheng jing ahi (John 14:17).

4. Ngaidam theilou chonset khat aume kiti chu ipi ham?

Matthew 12:32 Chule koi hijongle Mihem Chapa douna a thuseiya chu ki ngaidam ding ahi; Lhagao Theng douna a thuseiya vang chu tu hinlaiyin jong khonunga hinkho hung lhung dinga jong ngaidam __________ __________ ding ahi.

NOTE: Lhagao theng taitomna kiti hi khatvei thu ahipon, hijongleh thutah janomlouva um jingkei, ajo jonleh Pathen lama kihei theitalou miho umchan chu kiseina ahi (Hebrew Mite 10:26, 27). Mikhat chun lhagao theng thusei chu anan jingkeiya adou jingkeiya ahileh ajonaleh lhagao theng in ama akouna aw chu ajah thei talou ahi. Hijeh a chu mi abangloiyin “Ngaidam theilou chonsetna” kaboldoh tai atitengleh, ahetna lhahsam jeh ahin, hitobang chu moh um umthei thil ahipoi tihi ahet angaiye.

5. Mikhat in anei ding lhagao thilpeh phabep chu ipi ham?

1 Corinth Mite 12:8-10 Ijeh-inem itile mi khat chuche Lhagaova kona chu __________ thu kipea, khat __________ nei thu kipea ahi; hiche Lhagaomaa chu khat __________ kipea; chule chuche Lhagaomaa chu achom khat mi __________ theina thilpeh kipea; achom khat __________ __________ bol theina kipea; chule achom khat Lhago thu seidohna; chule achom khat lhagaoho __________ theina; chule achom dang khat paotin paotang tho theina; chule achom dang khat pao ledoh themna kipea ahi.

NOTE: Lhagao theng ihinkho sunga alut tengleh, thilpeh jat chom chom eihin pohlut peh jiu ahi. Mijouse thilpeh kibang achang theipoi (1 Corinth Mite 12:29-31). Lhagao thenga dim hi thil poimotah ahidan Pathen thu in aseijinge. John 3:5 naa Jesu in aseiyin “koihileh twiya leh lhagaova apenthah louva leh, Pathen gam lutheilou ding ahi” ati. Vangset umtah in, lhagao theng leh anatoh dan hi mitamtah in ahekhel uve. Mi abangloi chu lhagao theng hi Pathen thil boltheina mai mai dan in alaji un; abang loiyin nitin hinkhoa lhagao theng kikumna atahsan pon; chuleh abangloi chu lhagao thenga dim ho chun pao hetlou atho ding ahi tin akihil kit uve.

6. Lhagao theng thilpeh holah’a hoiche pen chu Corinthian houbung miho akiboisah ham ham?

1 Corinth Mite 14:1, 2 Ngailut chu nungdelun; ahin lhagaolam thilpehho chengse chan ding ponpanun, lhagao thu naseidoh theina dingun. __________ dangkhat thoa thuseiya chu mi jah a seidoh hilouva, Pathen jah a seidoh ahi; ajeh chu koiman ahetpeh poi, ahinla aman lhagaova thugil chengse chu asei ahi.

NOTE: Masanlai houbung masa ho phatlai bangin, paochom thotheina lhagao thilpeh thudola hin tulai houbung ho jong kiboina tahkhat in aumdoh kittai. Hijeh a chu tuchung simmun hi hiche chungchang thudol seichetna ding tia mun lentah kikoi ahi.

7. Seijuite hon vannoiya kipana thupha aseiphongna diuva Jesu Chrita in itobanga akithopi em?

Mark 16:17 Chule atahsante chu melchihna hicheng hin ajui peh dingu ahi; keima min a thi lha anodoh dingu. __________ paothah a pao dingu.

NOTE: Bible a “pao (tongue)” kiti thuchang hi “Thu iseina pao (language)” kiseina hijeng ahi. Jesu seijuite chu apil nauve, hijongleh lekha simlou atamjo ahi. Vannoi leiset pumpia kipana thupha aseiphongna diuva, Jesu in kidangtah a pao thah tho theina lhagao thilpeh apeh ahin, hichu amahon anahet khahlou chuleh anasim ujong hilou ahi.

8. Seijuite chunga Lhagao theng akibohlha a chu ipity em?

Solchahte 2:1, 4 Chuin __________ ni ahung lhung tan ahile abonchauva mun khat’a umkhom ahiuvin; amaho Lhagao Theng adimset tauvin, Lhagaovin aseidohsah bangun __________ chom pao chomin thu asei pantauvin ahi.

NOTE: Pentecost kiti hi kalchuh kichai ni 50 jouva kinit jing juda te kutpi khat ahi. Hiche nikho tengle hin leiset pumpia juda kititaphot jouse Jerusalem a Pathen lhai dinga hungjiu ahi. Hiche muna miho henga ama ama pao cheh a thu seidohna dia Pathenin seijuite chu pao chom tho theina lhagao thilpeh anapeh ahi. Chuleh hiche kipana thupha ngaikha jouse, tahsan chan chun gamtin a aseichoile tauve.

9. Lhagao theng kibohlhah chu gamchom a cheng juda mi hon ipi amu uvem?

Solchahte 2:11 Chule Crete mi le Arab gam mi ihiuvin; ahivangin eima pao __________ Pathen thilbol loupi thu aseiyu thakhat jah-in __________,” atiuvin ahi.

NOTE: Abangkomle pao chom tho theina thilpeh hi “van paova tho theina” ahin, hettheina kipeh ho bouseh toh Pathen bouvin ahet ahi akitijie. Ahinlah seijui ten thu aseipet uchun akimvel a miho chun “Pathen natoh loupi” amu uvin chuleh thu kisei chu aja uvin, ahethei uve tin Bible in aseiye. Bible a pao chom thona hi chithum bou akiseiye. Amasapen chu ivetauvin; tua hi akichehjo cheh a ni teni chu inavet kit diu ahi.

10. Peter in Cornelius leh a-insung mite henga thu aseipet a ipity em?

Solchahte 10:44, 46 Chuin Peter-in thu chucheng asei pettah chun athu jaho jouse chunga chun Lhagao Theng ahung chutan ahi. Ijeh-inem itile pao chom choma thu aseiyuva Pathen __________ chu ajauvin ahi.

NOTE: Cornelius hi Italy mi seipai lamkai khat ahi (Solchahte 10:1), Peter vang chu Jews mi ahin Aramaic pao atho ahi. Rome insunga soh kikoi ding miho chu hoilai gama hung kon hijongleh hithei ahi akitie. Hichema bang chun, hilaiya phat amankhom nauva hin pao lama kihettona hahsatna aneitauve. Hijeng jongleh, Cornelius leh a-insung mite chunga thakhat tah a lhagao theng ahung chuhphat chun, hiche miho loiyin amaho pao tho louva, paochom a thu aseiyu chu Peter toh kilhon a hungpa chun ajatai. Hiche paova “Pathen avahchoiyu” awgin chu aman ajatai. Hiche thu umdan chu Jerusalem a hou lamkai ho henga Peter in aseiyin, “keiho chunga til’a lhagao theng achuh bangin, amaho chunga lhagao theng achue.” Solchahte 11:15. Penetcost nikhoa seijuite chan tobang chu hiche nikhoa chu Cornelius leh a-insung mite chunga chu ahitai. Pao thona chu hetthem thei dinga pao kitho ahibouve.

11. Paul in ephesus mi 12 ho henga thu aseiya chu ipity em?

Solchahte 19:6 Chuin Paulin achunguvah akhut angamin ahile Lhagao Theng achunguva achutai; chuti chun paotin pao tangin thu aseiyun, __________ thu jong aseidoh tauvin ahi.

NOTE: Solchah Paul, seijuite lah a dinga lekhathem pen leh gam vah hatpen pa hin pao tamtah atho thei ahi (1 Corinth Mite 14:18). Hiche Ephesus mi 12 ho chunga lhagao theng ahung chuhpet in, amahon pao chom atho uva lhagao thu aseidoh jouseu solchah Paul leh Dr.Luke in ahethei sohkei lhon e, ahinlah hiche pao chu masanga anahetsa jong ahidehpoi.

12. Pao hetlouva thu kiseidoh thudol hi Bible in ipi aseiyem?

1 Corinth Mite 14:9 Chutobangma chun nanghon mihet __________ dinga naleiyuva nasei louvule, ipi naseiyu ahi iti kihet dingham? Nangho gohhoma thu sei tobang nahiu ahi.

1 Corinth Mite 14:19 Ahivangin Houbunga paochoma thucheng sang soma kasei sangin hetna lungthima thu nga __________ kadeijoi.

NOTE: Pao tho theina kipe hi thutah hilna dingleh seidohna dinga kipe ahibouve tihi Paul in avel vela aseidoh nom ahi. Greek paova “Hetlou (unknown)” kiti thuchang hi Bible kijihdoh masatna (original manuscript) a umlou ahi, apao hi gamdang pao hetlou kitho ahi ti vetsahna dinga pao ledoh hon ahin koilutbeu ahibouve. Corinthian houbung sunga miho hi nam jatchom chom umkhomna ahin, kikhop tengleh athusei houleh, ataonau chu midang hoa dingin het hahsatna anaum jing jie. Hijeh a chu Paul in na thusei chu mi atamjo dia hetthei dia pao ledoh ding aumlouva leh thipchet a um aphajoi anati ahi (1 Corinth Mite 14:28). Hichea aseidoh nompen chu ahileh midang in ahettheilou ding paova thusei lasah leh taona hohi ibollou diu ahi.

13. Malai Babylon hi ahina khat chu ipi ham?

Semtilbu 11:7, 9 “Hunguvin, kum lhau hitin apaovu gasuh khen peh uhite, chuti le khat le khat athusei __________ __________ umtauvinte,” ati.” Hijeh a chu hiche khopi chu amin Babel kisah ahi, Ijeh-inem itile hikom muna chu Pakaiyin leiset mite pao asuh __________ ahin, chule hikoma kona chu Pakaiyin abonchauva leiset chung chansoh a ahinthe thangsoh kei ahitai.

NOTE: Babel insang kisahna mun hi leiset chunga dinga pao hung kikhen masatna pen ahi. Hebrew paova Bable leh Babylon hi “Babel” ahin hichu “Boina” kiti ahi. Thuphon 18 a hi, Pathenin amite hohi lhagao Babylon gam sung dalha dinga akou ahi. Babylon ahina pipen khat chu ham leh pao boina ahin ahi.

14. Pathen thupeh henasasa a suhkeh ho chunga lhagao theng chuthei hinam?

John 14:15-17 Keima nei ngailut’u le kathupeh ho nanit dingu ahi. Keima Pa henga tao ving ting chule aman nang ho umpi jing ding Lhamonsah achom dang khat napeh dingu ahi. Hichu __________ __________ ahi; vannoiyin hiche chu asang theipoi; ijeh-inem itile ama chu mu jong amupouvin, he jong ahepouve; nang hon vang naheuve, ajeh chu ama nang ho sunga chenga ahi, um jong hung um ding ahi.

Solchahte 5:32 Chule hiti thuho hi ahetoh-a keiho __________; chule athua nungho dinga Pathenin apeh Lhagao Theng jong chu ahi,” atiuve.

NOTE: Lhagao theng thilbol theina thahat tah chu Pathen thupeh nit lou miho chunga acheng thei poi.

15. Lhagao thilpeh hoichepen chu hatah a gelkhoh ding tia Paul in asei ham?

1 Corinth Mite 14:4, 5 Paochom dang khat thoa thuseiya vang chu ama changa khantouna a anei ahi; lhagao thu seidoh vang chun Houbung chu akhantousah ahi, Nanghon nabonchauvin paochomin thu seileu chun kalung ahi; ahivangin chu sang jong chun __________ thu seidohleu chun kalung ahijoi; chule paochom thoa thuseiya chun Houbung khantousahna dinga, athu aledoh louva ahile, chu sanga chu lhagao thu seidoh chu chung nungjo ahi.

1 Corinth Mite 14:12 Chuti chu ahin,nangho jong lhagao thilpeh chan chom chom nei naha lunggul tahtengun, __________ __________ aneina dingin aletset’a nanei theina dingun gut holun.

NOTE: Solchah Paul in pao hetlou tho sanga lhagao thu seidoh theina joh neileu chun kalung ahijoi tia aseilaiyin, mi abangloiyin lhagao theng ichan a ahileh pao hetlou tho tei tei ding ahi tin ahil kit uve. Bible a lhagao theng chang mi 25 muthei umho lah’a, thumvei bouseh hi pao hetlou thona akiseiye. Solchah Paul in kitepna thah lekhabu 14 ajihdoh lah a hin, pao (tongue) kiti hi khatvei bouseh aseiye – 1 Corinth Mite bou ahi. Kitepna thah bu 27 lah a hin, lekhabu thum bouvin pao hetlou tho thudol bou aseiye.

16. Pathen in mi lhagao achansah hi ajeh thupipen ipi ham?

Solchahte 1:8 Amavang Lhagao Theng nachunguva ahung lhun tengle nanghon __________ nanei dingu ahi; chule nangho Jerusalema jong, Judea gam sungsea le, Samaria, chule leiset chung gam jousea kolmong geiya kathu __________ a napan dingu ahi,” ati.

Solchahte 4:31 Hiti chun ataovun ahile akikhop nau chu ahung kilingin, __________ __________ Thengin adimun hakattah-in Pathen thu asei tauve.

NOTE: Pathenin Ama hettohsah a ipan theina diuva alhagao thenga thahat eipeh jiu ahi.

17. Mikhat chu lhagao theng achange tia seithei hiham hilou ham?

Matthew 7:20 Hijeh chun nang hon amaho chu __________ nahet dingu ahi.

NOTE: lhagao thenga baptise chang chu lhagao thilpeh akona kihedoh ahipon, ahinlah lhagao ga “ngailut, kipa, cham, thohhat. Nunnem, phatna, tahsan um, jalhai, ti-kitim” hiche hoa kona hi kihedohji ahie (Galatia Mite 5:22, 23).

18. Lhagao thenga baptisma chu iti kachan thei ding ham?

Luke 11:13 Hijeh chun nang ho bon migi-loutah hiuva nachateu thilpha pehje nahet’ule, hiche sanga chun gam chenga van a Pa chun ahenga __________ chu Lhagao Theng apeh lou ding ham?” ati.

NOTE: Jesu Christa in kivatlouhel a lhagao theng dimset aneibanga, eihon jong eima belsung homkeosa sungdim dia Pathen koma ithum diu ahi, ahinlah lungthim pumpi kiphaltheng a eileh ei ikisuh ong thei masat u angaiye.

NA KIGELHAHNA

Jesu Christa in nangma hinkhoa a Lhagao Theng thao twi mantam chu sundim ding anom ngeiye. Tunia hi nalungthim leh na ngaitona jouse lodim dinga Ama nakou lut nom em?

DONBUTNA: __________

Panorama of Prophecy, Lesson 21 ©2022 Amazing Facts International All Rights Reserved