Satanra Sawa? Uan agangrikrikbagipa mitesan ong·aia ine bang·an bebera·a, indiba Sastrode agana je uan chong·mot ong·a aro ua nang·ko tol·napna aro nang·ni janggiko gimaatna miksongaha. Beben, ian gisik seng·gipa, indiba ka·namgijagipa gisiko salna changgipa uni gimin maiko aganaha unabateba bata. Ua maderangko, nokdangrangko, mondolirangko, aro jatrang gimikkoba ja·ga chakenga jedakode duk aro saknaaniko ia a·gilsako bariatna man·gen. Iano andalgipa rajani gimin aro na·a uni kosako maikai chegen Sastroni aiao inmangipa bebe ong·anirang donga!
1. Sanbaksa pap a·bachengaha?
“Diabol chengonin pap ka·ronga.”(1 Johan 3:8).“Gitchamgipa chipu diabol aro Satan” (Parape·a 12:9).
Aganchakani: Satan, jekon diabol ineba mingaha, papko a·bachengatgipa ong·aha. Sastro gride, namgijani a·bachenganiko talatna amgijani dongaigenchim.
2.Pap kana skang Satanni bimungara maiachim? Ua bano dongachim?
“Na·a mairongpile salgioni ga·akaha, O ching·gipa, pringni depante!”(Isaia 14:12). “Unon ua uamangna aganaha, Anga salgioni mikka riprapa gita gaakgimin Satanko nikachim.”(Luk 10:18).”Na·a Isolni rongtalgipa abrio dongchina agan nangko donaha” (Ezekiel 28:14).
Aganchakani:Satanni bimungara Luciger ong·achim, aro ua salgio dongachim. Luciferko “Babylonni raja” ine Isaia 14 o aro “Tyreni raja” ine Ezekiel 28 o mesokaha.
3.Luciferni a·bachenganiara maidake ong·achim? Sastro maikai uni gimin talataniko dakaha?
“
“Nang·ko ong·ataha” (Ezekiel 28:15). “Na·a toaniko mohor su·gipa, gisik gnangani gapgipa, aro nitoao chu·soksranggipa….pilak gamchatgipa ro·ongrang nang·o pa·dapani ong·achim. Aro nang·ni sonako tekani, aro chatanirangko dakani nang·o gnangchim; nang·ko ong·atani salon uarangko tarisoahachim….nang·ko ong·atchengani saloni kakketgijako nang·o nikjaona kingking na·a an·tangni re·anirango chu·soksranggipa ong·achim. (Ezekiel 28:12,13,15). “Na·a to nonggimin pindapgipa cherub ong·achim. Aro na·a Isolni rongtalgipa a·brio dongchina anga nang·ko donaha. Wa·alni ro·ongrangni jatchio na·a re·ruraaha.” (Ezekiel 28:14).
Aganchakani: Pilak gipin sa·grerang baksana, Luciferko Isol ong·ataha (Eph. 3:8). Lucifer pindapgipa cherub ba sa·gre ong·achim. Saksa pindapgipa sa·gre Isolni singhasonni jakasio chadenga aro sakgipin jakrao chadenga. (Git. 99:1). Lucifer sa·grerang gisepo chuatako aro de·doako man·gipa saksa sa·gre ong·achim. Luciferni nitoaniara chu·soksranggipa ong·achim. Uni gisik seng·aniara chu·sokgipa ong·achim. Uni ching·aniara aiao inmane gisiko nangatani ong·achim. Ezekiel 28:13 dingtangmancha uko git dilna aro ringna ongataha ine mesokaniko daka. Mitam ki·tap segiparang bebera·aniko daka je ua sa·grerangni git ring·aniko dilgipa ong·aha.
4.Maiasa Luciferko Isolni kosako chakatna dingtangataha? Maidakgipa papko ua ka·aha?
“Nang·ni nitoaniko gimin nang·ni ka·tong de·doako man·aha, Na·a nang·ni ching·anini a·sel, an·tangni gisik gnanganiko ong·siataha.”(Ezekiel 28:17). “Nang·ni ka·tongo na·a agane inahachim…Isol askirangni kosakona angni singhasonko anga chuatgen…Chubatgipa gita anga an·tangko dakgen” (Isaia 14:13,14).
Aganchakani: Gaora de·ani, mikbuani, aro chu·onikgijani Luciferni ka·tongo nakataha. Ua ru·utgijan Isolni biapko ra·na skaha aro Uni palo sakantikon an·tangko olakkichina dabianiko dakaha.
Chanchiatbo: Maina indakgipa olakkianiara nangchongmotgipa on·gaha? Ian Isolni aro Satanni gisepo nangtinggrikani japang ja·dil ong·aha. Manderangara kusi ong·nasa ong·atako man·aha aro Isolko olakkianichisan chu·sokatna ama. Salgini sa·grerangkomangba olakkina man·ja (Parape·a 22:8,9). Satan an·tangna mangmang chanchianichi indakgipa olakkianiko man·na am·aha jekon Isolkosa olakkina man·a. Ritcha bilsirangni ja·mano, jensalo ua Jisuko bakrao dakmajoaha, olakkianiara uni mongsonggipa skani aro mongsonggipa dake niani ong·kuenga (Mati 4:8-11). Da·o, ia bon·kamani salrango, Isol pilak manderangko An·tangko olakkina okamengon (Parape·a 14:6, 7), ian Satanko ka·o nangataha, je ua manderangko an·tangko olakkichina draatgen ba ong·jaode so·otako man·gen (Parap·ea 13:15).
Sakantian sakoba ba maikoba olakkian: bil, mingsing minggamani,cha·ani, katchaani, man·kamani, etc. Indiba Isol agana, “Angna agre nang·ni gipin isolrang dongjachina” (Reongkata 20:3). Lucifer gita, an·chingba sako olakkigen uko basee ra·ani donga. An·ching Ong·atgipana agre sakobasa ba maikobasa baseode, Ua an·chingni basee ra·aniko mandera·gen, indiba an·ching Uni kosako bobil dake chakatgiparang ine chanako man·skagen.(Mati 12:30). Isolna agre maikobasa ba sakobasa Onggan·chingni janggi tanganirango ra·chakode, Satanni ja·kurangko ja·rikaniosa an·chingde bon·egen. Isolko nang·ni janggi tanganio skanggipa donengama – ba Satannasa na·a dangdike on·enga? Ian dingchike sing·ani ong·enga, ong·jama?
5.Luciferni papni a·sel salgio mai ong·aha?
“Aro salgio dakgrikani ong·achim, Mikael aro uni sa·grerang ua drakon baksa dakgrika; aro ua drakon aro uni sa·grerang dakgrikaha, indiba amjaha; aro uamangni biapko salgio man·jaha. Aro ua dal·gipa drakonko, chong·motan gitchamgipa chipu Diabol aro Satan minggipa, a·gilsak gimikko brangatgipako galataha; a·aona galataha, aro uni sa·grerangkoba un baksa galataha.”(Parapea 12:7-9).
Aganchakani: Lucifer bakgitamni baksa sa·grerangko tol·napaha (Parape·a 12:3,4) aro salgio bobil dake chakatataha. Isolna gipin chol dongjaha indiba Lucifer aro gipin ga·akgimin sa·grerangko a·aona galataha, maina Lucifer Isolni singhasonko ra·sekna jotton ka·aha aro ian mande so·otani gitaba ong·aha (Johan 8:44). Uko salgioniko galatani ja·mano, Luciferko Satan ine mingsikaha, jeni miksonganian “bobil”, aro diabol, chongmotan “kakketgijagipa” ine miksongani ong·a. Satanko ja·rikgipa sagrerangko korerang ine mingsikaha.
6.Satannni kam ka·chakramara da·o bano ong·a? Ua manderangni gimin maiko chanchia?
“Unon Jihova Satanna aganaha, Na·a baoni re·baaha? Satan Jihovani aganchake inaha, a·ao re·jojoaoni, aro uano re·roroaoni” (Job 2:2). “A·ana aro sagalna duk; maina Diabol uni sal on·titisan ine u·ie, ka·onangbee na·simangona ong·onangaha”(Parape·a 12:12).“Na·simangni bobil Diabol, randinggipa singho gita sakoba minokna am·e re·roroa”(1 Pitor 5:8).
Aganchakani:Bebera·oni bikpile, Satanni kam ka·chakram biapara a·gilsakan ong·a, norok ongja. Isol Adam aro Hobako a·ani kosako pamong ong·china onaha (Aba. 1:26). Jensalo uamang pap ka·ahaon, uamang ia pamong ong·aniko Satanna gimaataha(Rom. 6:16), jean a·gilsakni sason ka·gipa, ba raja ong·skaha (Johan 12:31).Satan Isolni bimango ong·atgipa mandeni jatrangko chonnikaha. Ua Isolko saknaatna man·jahani gimin, ua an·tangni ka·onanganiko Isolni dedrangni kosako ia a·gilsako on·skaenga. Uan mande so·otrakgipa ong·a jeni miksonganian nang·ko gimaatna miksongani ong·a, indake Isolko saknaatskaenga.
7. Jensalo Isol Adam aro Hobako ongatahaon, maiko dakjachina Ua uamangko geetaha?Bamgijani biteara mai ong·genchim ine Ua aganaha?
“Indiba nama namgijako u·iani bolni biteko cha·na nangja; maina uni biteko cha·ani salon na·a sichongmotgen.”
Aganchakani: Adam aro Hobako nama aro namgijani bolni biteko chajachina aganahachim. Ua bolni biteko cha·anio sastiara sianian ong·genchim.
U·ie Ra·bo: Isol Adam aro Hobako Antangni jaktangchin dakaha ine gisik raatbo aro uamangko nitogipa bario donaha jeon uamang bol pangsana agre pilak rokom boloniko cha·na man·aha (Aba. 2:7-9). Ian Isolni ka·sachakanichi nama baseaniko dakna uamangna on·aha. Isolo ka·donganichi aro beng·gipa bolni biteko cha·gijanichi, uamang bario jringjrotna donggnokchim. Satanko knachakna baseanichi, uamang pilak janggi tangna Japangoni – Isoloni katna basee ra·aha, aro sina nangaha.
8. Maikai Satan Hobako dakmajoaha? Maidakgipa tol·napaniko ua una Aganaha?
“Jihova Isolni dakgimin darang matburungna bate chipu gisik cha·chipilbatachim. Aro ua ua me·chikko inaha, Ia barini mamung bolni bitekoba cha·nabe ine Isol inbebeahama? Unon chipu me·chikko inaha, Sichongmotjawa; maina Isol u·ia, na·simang uko cha·ani salon na·simangni mikron mikaogen, aro na·simang nama namgijako u·ie Isol gita ong·gen”(Aba. 3:1,4,5).
Aganchakani: Satan Hobako tol·napna chipuko jakkalaha jean matburungrangni gisepo gisik seng·batsranggipa ong·achim jekon Isol ong·ataha. Mitam ki·tap segiparang bebera·aniko daka je chipuo bilna manani grangrang donga (Isaia 14:29;30:6). Gisik ra·bo, ua Isolni sao on·kujana kingking ka·bakchi maljachim (Aba. 3:14). Satanni tol·napanirangara: (1) Na·a sichongmotjawa, aro (2) biteko cha·e na·a gisik seng·batgen. Satan, jean tol·ako a·bachengdilaha (Johan 8:44), uan bebeko tol·a baksa brine Hobana aganaha. Je tol·anirang bebe ong·ani baksa brina, iarangan bilakgipa tol·napanirang ong·a. Ian bebe ong·a je uamang pap ka·ani ja·mano “namgijako u·igen.” Isol, kasaanio uamangko namgijako u·iaoniko ra·rikaha, jean ka·tong saani, duk ong·ani, saknaani, aro siani ong·a. Satan namgijako u·ianiko name nikata, tole agananichi Isolni cholonko ong·gija dake mesoka maina ua u·ia je manderang Uni cholonko ma·sisretgenchimode uamang Isolna ka·saaoni bang·batan an·pilgen.
9.Maini gimin biteni on·tisako cha·aniara namgija ong·aha jean Adam aro Hobako barioniko rikgalataha?
“Uni gimin namako dakna u·ie uko dakgijagipana uan pap ong·a” (Jakob4:17).“Papko ka·gipa sakantian niamkoba pe·a, aro niamko pe·an pap ong·a” (1 Johan 3:4). “Aro Jihova Isol inaha, Nibo, mande nama-namgijako u·ina an·chingoni saksa gita ong·aha. Da·o, ua jak snile boljanggini bitekoba ake cha·e jringjrot tangnaba donga…Indake ua mandeko a·rikataha; aro boljanggini ramako dongtimchina Eden barini salaramchi cherubrangko, aro wilwilgipa rikrakrikrak ching·gipa tonualko donaha” (Aba. 3:22,24).
Aganchakani: Beng·gipa biteko cha·aniara pap ong·ahachim maina ian Isolni dakna nanganirangoni mingsako jegalaha. Ian Isolni niamko aro Uni nokgipa ong·aniko paraken bobil dake chakataha. Isolni ge·etaniko jegalanichi, Adam aro Hoba Satanko ja·rikna baseskaaha aro indake an·tangtangko Isolni giseponiko dingtangataniona ra·baaha (Isaia 59:2). Satan jikseko uamangni pap ka·ani ja·mano bol janggioniko cha·angkugen ine ka·dongengachim, aro sigijagipa papirang ong·na man·gen, indiba Isol uamangko iako champengna barioniko rikgalataha.
Parape·a. 12:10; Johan8:4410. Satanni saknaatna, tol·napna, ka·beatna, aro manderangko nisiatna kam ka·anirangni gimin Sastroo maidake parape·aha?
Aganchakani: Sastro parakaniko daka je Satan pilak rokom to·lnapaniko jakkalronga aro manderangko nisiatronga. Uni korerang toromigipa manderang gita an·tangtangko mesokna man·a. Aro Satan salsaode seng·ani sa·gre dake mikkang pa·e bil gnangan baksa salgioniwa·alko ga·akatgen. Ua Jisuko dakjegen. Indiba na·a mikrakataniko man·aha, uni gimin an·tangko ga·akatnabe. Jensalo Jisu re·bapilon, pilak mikron Uko nikgen (Parape·a 1:7). Ua bangbango aramrango donggen aro a·ako ga· dapjawa (1 Thess. 4:17).
| Sastro Satanni gimin | |
|
Tol·napa/ a·riksanala Para. 12:9, 13 |
Sastroko pe·sreta Mati 4:5,6 |
|
Tol·e matnanga/mande so·ota Parape·a. 12:10; Johan8:44 |
Ja·ga chaka/cha·minoka 2 Tim. 2:26; 1 Pitor 5:8 |
|
Isolni manderangni kosako dakgrika Parape·a. 12:17 |
Pale cha·a Luk 13:16; Johan 13:2,21 |
|
Patoko dona Parapea 2:10 |
Champenganiko daka Luk 22:3-5; 1 Thess.2:18 |
|
Aiao inmanirangko ka·a/tol·anirangko agana Para. 16:13,14/Johan 8:44 |
Seng·ani sa·gre dake nikata 2 Kor. 11:13-15 |
|
Sabisirangko ra·bara/dukrangko ong·ata Job 2:7 |
Korengrang pamongrang gita dakjea 2 Kor. 11:13-15 |
|
Tol·e agana “Diabol”ni ortoara tol·gipa ine ong·a |
Salgioniko wa·alko ga·akata Para. 13:13 |
11. Satanni tol·napanirangara aro kamrangara baditana bilakgipa ong·a?
Satan bakgittamni baksa sa·grerangko (Para. 12:3-9); Adam aro Hobako (Aba, 3) bebera·ataha; indiba Noahni salo sakchet manderangsan jokaha (1 Pitor 3:20). Jisuni pal a·gilsak gimikan uko ja·rikaha (Para. 13:3). Uni tol·napanirangni a·sel bang·an jrinjrotna gimaatako man·gen (Mati.7:14;22:14).
Aganchakani: Satanni kamo chu·sokaniara aiao inmanpile dal·a, ian bebera·na amsokpilgijani ong·a. Ua Isolni bakgittamni baksa sa·grerangko tol·napaha. Noahni salo, a·gilsakni sakchet manderangna agre pilakan tol·napako man·tokaha. Jisuni gnigipa re·bana skang, Satan seng·ani sa·gre, Kristo gita an·tangko nikatgen. Uni tol·napani bilara inditan bilakgen je an·chingni naljokanide uko nina re·angna jechakanisan ong·gen (Mati 24:23-26).Naa kuko knachakna jechakode, Jisu nangko Satanni tolnapaoniko chelchakgen (Johan 10:29). (Jisuni gnigipa re·bapilani gimin bang·bate u·inade, Poraiani Bak 8 ko nibo).
12. Basako aro bano diabol an·tangni sastiko man·gen? Maidakgipa sastiko man·gen?
“Uni gimin maikai maranko chimonge wa·alo soa, uandake a·gilsak bon·kamao ong·gen. Mandeni Depante an·tangni sa·grerangko watatgen, aro uamang uni songnokoniko pilak ja·gitdotanirangko, aro namgija dakgiparangko chimonge wa·alni a·kolo uamangko galgen; unon grape aro wagam chikmijila ong·gen” (Mati 13: 40-42). “Aro uamangko brangatgipa Diabolko wa·alni aro gondokni wario galaha” (Para. 20:10). “O na·simang sao man·giparang, Diabol aro uni sa·grerangna dakso jringjrotni wa·alona angoni re·angbo (Mati 25:41). “Na·a an·tangni namgija dakani bang·beachi, an·tangni badingani kakketgijanio, an·tangni rongtalgipa biaprangko ong·siataha…Aro nang·ko nigipa pilakni nikanio a·ani kosako anga nang·ko tappra pil·ataha…Na·a…aro na·a dongjawaha.” (Ezekiel 28:18, 19).
Aganchakani: A·gilsakni chon·kamao diabol papko nisiatgipa wa·alo ia a·gilsakon galatakoman·gen. Isol uni papni gimin,sakgipinrangko papo ong·atahani gimin, aroIsolni ka·sagipa manderangkosaknaataniaro nisiani gimin bichal ka·gen.
U·ie Rabo: Jensalo Satan, wa·alo galatako man·on, Isol An·tangni dakgiminna baditan duk man·gen. Ia saknaaniara wa·alo galatako man·giparangsan ong·aijawa, indiba a·bachengo ka·saanio Ong·atgipanaba ong·gen. (Norokni gimin talbatna, Poraiani 11 ko nibo).
13. Papni namjabegipa neng·nikaniko maidake bon·chotao namataniko dakgen? Uan ong·taigenma?
“Gitel agana, Anga tanga, angna pilak ja·sku dipangen, aro pilak sre Isolna ku·rachakgen” (Para. 14:11; Philipi. 2:10, 11; Isaia 45:23rangkoba nibo). “Duk changgni chakatjawa” (Nahum 1:9).
Aganchakani: Papko namatna minggni nangchongmotgipa obostarang ong·gen:
Skanggipa, pilak salgisako aro a·gilsako janggi gnanggiparang, diabol aro uni sa·grerangkoba man·gope Isolni mikkango ja·sku dipangen aro Uan kakketgipa, kakket bichal ka·gipa, aro toromigipa onge ine kurachakgen. Mamung sing·anirangan aganchakgija dongjawa. Pilak papirang Isolni ka·saani aro janggi jokataniko ra·chakna jegalahani gimin uamang gimana nangaha ine ku·rachakgen. Uamang pilakan jringjrotna sina krara ine ku·rachakgen.
Gnigipa, pap, aro papko basee ra·gipa, diabol, korerang, aro uamangko ja·rikgipa pilak manderangko chu·gimikan nisiatanichi papko a·gilsakoniko rongtalatgen. Iani bidingo Isol kattao namen rongtalbea; Uni dakgiminrangko ba Uni manderangko saknaatna pap mamungdakeba chakataijawaha.
14. Sawa papko bon·chote, chu·gimikan a·gilsakoniko nisiatsranggen?
“Iani giminan Isolni Depanteko parapeataha, chongmotan Diabolni kamrangko gimaatna ine”(1 Johan 3:8).“Uni gimin, dedrang an·chi aro be·enko bak man·paani gimin, ua an·tangba ugitan apsanoniko bak man·paachim; maikai ua siachi siani bil gnanggipako, chong·motan Diabolko, gimaatna amgen” (Ibrirangna 2:14).
Aganchakani:Uni janggi, sia, aro chakatpilachi, Jisu papko gimaatsrangaha.
15. Maikai Isol manderangni gimin chanchimanchaa
“Uni gimin Pagipa an·tangan na·simangna ka·sara”(Johan 16:27; Johan 3:16; 17:22,23 rangkoba nibo).
Aganchakani: Pagipa Isol Jisuni ka·saani gitan manderangna ka·sara. Jisuni janggi tangao mongsonggipa miksonganide An·tangni Pagipani cholonko mesokanian ong·achim jedakode baditana chong·mot ong·e Pagipara ka·sara, aro simsakaniko on·a uko manderang u·ina man·gen.
Satan Pagipako Mesoksreta
Satan Isolko chanchina changgijagipa, a·te donggipa, tiktak dakgipa, ka·sachakani grigipa, aro sepangona re·baako nangnikgijagipa ine mesoksretaniko daka. Daibol an·tangni nitogijagipa, bobil dake a·sel ong·atani kamrangko “Isolni kamrang” ong·a ine matnanganiko daka. Jisu Pagipani bimungko tol·e matnange agananiko ipake galna re·baaha jedakode ma·gipani ka·saanina bateba salgini Pagipa ka·sara ine mesokna man·gen (Isaia 49:15).Isolni chakchikani, rinok rinok dakani, aro ka·sachakanian, Jisuni namnikbatgipa japang kata ong·a.
Pagipa Sengchae donga
Nang·ko kusi ong·atna miksongani gimin, an·chingni salgini Pagipa jringjrotni namgipa nokko nang·na tarisoaha. Nangni agilsako jumang nikanide Uni nang·na donsoenggipa baksade mamungdakeba toatna amja! Ua nang·ko rimchaksona sengchana sikjaenga. Hai an·ching manderangna u·iatna! Aro hai an·ching tarie dongna, maina uan da·o ru·utjawaha!
16. Jisuni ka·saa gitan Pagipa Isolba nang·na ka·saniara namgipa kobor ine na·a chanchiama?
Nang·ni Aganchakani:_____________________________________________________________________________________________________________
Nang·ni Sing·anirangna Aganchakaha
1.Adam aro Hobani chagipa biteara applema?
Aganchakani: An·chingde u·ija. Sastroo janapa dongja.
- Diabolara gitchakgipa, adha mande aro adha matburung, grongrang aro ki·me donggipa bimang ong·a ine agananiara banoni a·bachengbara?
Aganchakani: Ian songsarek aganritingbaoni ong·a, aro ian diabolko namnikatna chanchisretataniko dakani ong·a. Ua chanchibewalna man·gipa manderangni ong·ronggijagipa matburungrangko tol·e banaigipa golporang ine jegalgen aro uni donganiko ra·chakna man·jawa ine u·ia. Jerangan diabolko bebera·ja uamangan altubate uni tol·napanirangchi rim·gittangako man·rongbata.
- Isol Adamna aro Hobana aganaha, “Uni biteko cha·ani salon na·a sichongmotgen.” (Aba. 2:17). Maini gimin uamang ua salo sijaha?
Aganchakani: Abachenga 2:17 o man·gipa “sia” ingipa kata chong·motde, “sichongmotgen” ine ong·a jean bang·bata Sastrorango janapaniko dakaha, jeni ortoan Adam aro Hoba sianiona re·anggen ine miksongani ong·a. Pap ka·na skangde, jora pap gri sigijaniko man·ahachim. Ia pap gri ong·ani bewalko bol janggini biteko cha·anichiripingako man·ahachim. Pap ka·ani ja·mano, uamangni bewalrangara sianiona dingtangatako man·skaha, maina papni bewalrango ong·aha. Iakosa ong·gen ine Isol uamangna aganaha. Boljanggini biteko cha·oniko champengani giminsa, soani aro ong·siroroangani – bon·chotao ta·raken siani a·bachengaha. Gopram uamangna ong·aha. Ja·mano Gitel iani gimin indine aganaha, “Naa aa piljaskal, mikkang gramchie chaaniko chagen; maina unoniko nangko raaha; naa adimu, aro adimuan pilgen” (Aba. 3:19).
Isol Luciferko ong·atahani gimin, Uan uni papna daitoko ra·na nangjachimma?
Aganchakani:Mamungdakeba nangja. Isol Luciferko pap grigipa sa·gre ong·e chu·soken ong·ataha. Lucifersa an·tangko diabol dakataha. Jakgitele basee ra·anian Isolni sorkarini niam ong·a. Isol Luciferko ong·atahaon pap ka·gen ine ma·siachim. Ua somoio, Isol Luciferko ong·atna jechakgenchimode, Ua An·tangni ka·saani gnanggipa cholonko,chong·motan, jakgitele basee ra·aniko jechaka gita ong·gnokchim.
Jakgitele basee ra·ani Isolni ong·a
Lucifer maiko dakgen uko name daken ma·sioba, Isol uko ong·atkuaha. Ua apsandake Adam aro Hobana, aro nang·naba dakaha! Isol nang·ni atchina skangan, maikai na·a janggi tanggenchim uko u·iachim. Ua nang·na janggi tangna gita on·aha jedakode na·a Uko ba diabolko basee ra·na man·gen. Jakgitele mandena basee ra·aniko dakchina on·on, Isolko ong·gija dake aro tol·e matnangna nangnikaha.
Ka·sagipa Isolsa jakgitele basee ra·aniko pilaknan on·na daitoko ra·genchim.
Ia rasongan gapgipa aro nangchongmotgipa indin jakgitele on·aniara Isolonisan re·bana gita man·genchim. Indakgipa Ong·atgipa, Gitel, aro Ripengna dangdike on·nara baditan katchaani aro mandera·ani ong·a!
Isolna dangdike on·na basee ra·bo
Papni neng·nikani ru·utgijan bon·atako man·gnok. A·bachengode, pilakan “nambejokchim”(Aba. 1:31). Da·ode, “a·gilsak gimik namgijagipao dongenga ine an·ching u·ia” (1 Johan 5:19). Pilakchin manderang Isol ba Satanko basee ra·enga. Isolni nang·na on·gimin basee ra·aniko Gitelna dangdike on·na ka·sapae jakkalbo.
- Jensalo Lucifer papko ka·ahaon, maina Isol uko nisiatjaha aro indake papni neng·nikaniko ta·raken bon·atjaha?
Aganchakani: Isolni a·gilsakko ong·atanio aro uno songdonggipa manderangna papara maiaba gitalgipa kata aro u·igijani ong·aha. A·bachengode Luciferba iani gimin chu·gimikde ma·sisokna man·jaha gita ong·aha. Lucifera gisik seng·gipa, mandera·ako man·gipa dilgipa sa·gre ong·achim.Uni aganani kata indake ong·engnaba dongachim: Salgide nama, indiba sa·grerangni bang·bate kam ka·anichi salgiara namdapataniko man·gnokchim.Pagipao donggipa jena man·gijagipa bil gnanganian dilgiparangko chong·motgipa janggi tanganiko tangna mikkandalata ong·aha.Isol angni ku·pattianirangko kakket ong·a ine ma·sia, indiba Ua ka·mikkenata gita chanchienga. An·ching an·chingni dilgipako, jean jaksokatna man·ja, an·chingni kusi ong·aniko aro salgio biapko duk ong·atna gita hukumko on·na nangchongmotja. An·ching kucholsan ong·e re·mikkangenchimode, Isol knachakgen. An·ching kam ka·chakatna nanga. Ong·jaode,an·ching pilakan an·chingni kamko namnikgijagipachi nisiataniko man·gen.”
Bakgittamni Baksa Sa·grerang Lucifer Baksa Bakrimaha (Para. 12:3, 4).
Luciferni jegrikani bang·a sa·grerangko bebera·ataha, aro bakgittamni baksa unbaksa bobil dakanio bak ra·aha. Isol Luciferko bakan nisiatgenchimode, mitam sa·grerang jerangan Isolni cholonko namedake ma·sikugijagiparangde ka·saani pal kena gnangsa Isolna bamgenchim, aro indake aganenchim, “Luciferan kakket ong·bebeama? Chinga da·o mamungdakeba u·ina man·jawa. Uni gimin simsakbo. Na·a Isolni sorkarini gimin sing·oba, nang·koba so·otainaba donga.” Ua Luciferko bakan so·ote galgenchimode Isolni ong·atgimin janggi gnanggiparangni gisikrango neng·nikaniko mamungdakeba namatna amjawachim.
Isolara Ka·sae, Jakgitele Dangdike On·anikosa Nangnika
Isolara chong·motgipa ka·saanichi didiatako man·e, kusi ong·e, jakgitele dangdike on·anikosan nangnika. Je bamanian kenatanichisan didiatako man·ode, chu·sokgipa ong·jawa aro ka·sinde paponasa dilangako man·aigen.
Isol An·tangni Chong·motgipa Niamrangko Mesokna Satanna Somoiko On·enga
A·gilsak salgisakna nambata miksongani donga ine Satan a·kange ra·enga. Isol Satanna an·tangni bebe ong·anirangko mesoke on·china somoiko on·enga. Gitel a·gilsako donggipa janggi sakantini bebeko u·iani ja·manosa papko nisiatgen – chong·motan Satanni sorkariara kakketja, mitchianian gapaia, ka·namja, tol·a aro nisiatgipa ong·a.
Salgi Ia A·gilsakko Nie Dongenga
Sastro agana, “Maina an·ching a·gilsakna, chong·motan sa·grerangna aro manderangnaba, niani ong·aha (1Kor. 4:9). Salgi gimikan an·ching sakantini Kristo aro Satnni gisepo dakgrikanio bakko ra·enga. Dakgrikani matchotengahaon, janggi sakantian songnok damgnini niamrangko chu·gimikan ma·sigen aro Kristo ba Satanko ja·rikna baseaniko dakgen. Jerangan Satan baksa bakrime kam ka·na basee ra·aniko daka salgi aro a·gilsakni naljokgnina unbaksa nisikimite galaniko man·gen, aro Isolni manderang bon·chotao salgio an·tangtangni noko jringjrotni janggi tanganio naljoke katchana man·gen.
See Ra·ani: ___________________________________________________________________________________________________________________
Nipiltaianiko Dakani
1.San baksa pap a·bachengaha (1)
_____ Maikel
_____ Lucifer
_____ Gabriel
-
Skanggipa papko ka·chengo Lucifer bano dongachim?(1)
_____ A·gilsako
_____ Salgio
_____ North Staro
-
Luciferni gimin changsao talatgiparangko sandibo (6)
_____ Ong·atako man·gipa sa·gre
_____ U·ianian gapgipa
_____ Salgini gipok gureo gakataha
_____ An·tangni re·anirango chu·sokgipa ong·aha.
_____ Salgini dogao nitimgipa
_____ Sika moanio changbatgipa
_____ Nitoanio chu·sokgipa
_____ Pindapgipa Kerub
-
Luciferni bobil dake chakatanio bebe ong·ani gimin agananirangko chin dakbo: (5)
_____ Uko salgioni galataha
_____ Ua gisik pil·e salgion dongkamaha
󠄅_____ Ua singhasono donuaha
_____ Uni bimung Satan ong`baaha
_____ Uan skanggipa pap ka·chenggipa ong·ahachim
_____ Jisu uko galatako nikaha
_____ Bak gittam baksa sa·grerang unbaksa ga·akaha.
-
Lucifer maiko nangnikaha? (2)
_____ An·tangko olakkianiko nangnikaha
_____ Isolni singhasonko ra·sekna aro Uni biapko ra·skana.
_____ A·gilsak salgisak gimikchin bilrorona.
-
Diabol, Satanni bebe onganirangni gimin sandie nibo: (4)
_____ Uan gitchakgipa grong gnanggipa aro ja·a dakopgipa
_____ Uni nokde norokosa ong·a.
_____ Ua manderangko nangnika
_____ Ua seng·ani sa·gre dake mikkang pa·na man·a.
_____ Ua aiao inmanani kamrangko dakna man·ja
_____ Ua tol·gipa aro mande so·otgipa.
_____ Ua salgioniko wa·al ga·akatna man·a.
_____ Bang·a manderangan uko ja·rikgen aro gimaaniona sokgen.
-
Adam aro Hobani ga·akani gimin ka·mao mesokatgiparangoni badiarang kakket onga? (3)
_____ Satan an·tangko sa·gre gita dakjeaha
_____ Satan Isolko tol·gipa ine aganaha.
_____ Satan uamangna applerangko on·aha an·ching u·ia.
_____ Satan sknggipa Adamona re·bachengaha.
_____ Satan uamangko sigijagipa papirang ong·gnokchim ine ka·dongaha.
_____ Uamangko tol·napanio, Satan tol·a aro bebe ong·anirangko brinaha.
-
Satanni bon·kamgipa sastini gimin maia kakket ong·ani donga? (4)
_____ Ua waalo galako mangen.
_____ Uni sa·grerang joke katgen
_____ Salgio wa·al donggen.
_____ Papirang wa·alni gondoko galako man·gen.
_____ Satan Isolni kakket ong·e bichal ka·aniko ku·rachakgen.
-
Jensalo Lucifer papko ka·ahaon, maina Isolara uko so·otjaha? (4)
_____ Sa·grerang ma·sisretnaba donga
_____ Haida mitamrang Isolna kennaba donga
_____ Lucifer Isolna bate bilakbatachim.
_____ Namgipa sa·grerangde Uko on·jawachim.
_____ Luciferni miksonganiko mesokna somoiko nangaha.
_____ Isolni miksonganiko kakket ong·a ine agana somoiko nangaha.
-
Bon·kamao maia mingsamangmang Isolni sorkariko kakket ong·a ine mesokgen? (1)
_____ Mitam aiao inmanani kamrangko Isol dakgen.
_____ A·gilsakni Pilak janggian Isolni ka·saaniko, aro kakket bichal ka·aniko ja·sku dem·e ku·rachakgen.
_____ Salgini sa·grerang sakantikon Isolna dangdike onchina agangen.
-
Ka·mao on·sogipa maia bebe ong·anirang papni chong·mot ong·aniko mesoka?(5)
_____ Jisu papko nisiatchong·motgen.
_____ Papara Isolni niamko pe·enga.
_____ Pap an·chingko Isoloniko dingtangataha.
_____ Papara chena altuabegipa ong·a.
_____ Satan tol·ani papko tariaha.
_____ Papko changsa nisiatahaode, dongtaijawaha.
-
Ka·mao badiarang bebe ong·a? (5)
_____ Satan an·tangni cholonrangko Isol baksa apsan ong·a ine agana.
_____ Isol an·chingni ma·a paarangna bate an·chingna ka·sabata.
_____ “Isolni kamrangara” “Satanni kamrang” ong·a.
_____ Jisuni janggi tangani Isolni cholonko mesokaha.
_____ Pagipa Isolara ka·sachakani gripa ong·a.
_____ Bang·a manderangan Isolko ma·sisreta.
-
Jisuni ka·saaha gita Pagipaba angna ka·sara ine u·ina anga namnikaha.
_____ Oe.
_____ Ong·ja.
