Lesson 25
Na·ara Isolo ka·dongchakama – ka·dongchakbebeama? Bebeko agangenchimode, bang·a manderangan oe ka·dongchaka ine aganaba donga, indiba uamangni kamrangde indake ong·ja. Aro namjabatade, uamangni Uo ka·dongchakgijanichi, haida uamang Uoniko cha·ugiparang ong·skanaba donga! Na·a aganaba donga “Maidakesa! Darangba Isolonikode cha·ujawa.” Indiba Isolni An·tang manderangna jagokmanpilgipa kattara, “Na·simang Angoniko togie ra·aha!” (Malaki 3:8) ingipan ong·a. Chong·motgipa see rakkianirang indake sakkiko on·a je billionni billion manderang Isoloniko cha·ua, aro iako nikna aiao inmanpilani ong·naba donga, uamang an·tangtangni simsakgija jakkale uarangna gapatna ine ua cha·ugimin tangkarangko jakkala! Indiomangba bang·an an·tangtangni cha·uanirangko ma·sitokjaenga. Ia Study Guideo, maikai ia apsan dakgualaniko gelna gita man·gen aro maikai Isolo kakketgipa bebera·anichi silrorona gita man·gen uarangko chinga mesokgen.
1.Sastroni gita, an·chingni man·giminrangoni badita bak Isolni ong·a?
“A·ani pilak bak chikkungni bak sa …. Jihovanin ong·a” (Levirangni 27:30).
Aganchakani: Bak-chikkungni bak-sa ba tithe Isolni ong·a.
2.Maiko “bak-chikkungni bak-sa ba tithe” minga?
“Torom tambuna uamangni dangdike on·ani gimin, man·rikani ine, Anga Isrealo Levini dedrangna pilak bak chikkungni bak sa praprakko on·aha” (Chanani 18:21).
Aganchakani: Ia tithe ba bak-chikkungni bak-sara mande saksani man·giminoni bak-sa ong·a. “Tithe” ingipa kattani ortoa “chikkunggipa” ine ong·a. Ia tithe ba bak-chikkungni bak-sa Isolni ong·a. Uan Unin ong·a. An·ching uarangko rakkina mamung bil dongja. Jensalo an·ching ia bak chikkungni bak sako on·engon, an·ching uko indin on·ani ba gift gita on·jaenga; an·chingnide Uni man·gnikosa Una on·pilskaenga. An·chingni man·giminrangoniko bak chikkungni bak sako chu·gimik on·jagenchimode, an·ching tithe on·a ga·akjaenga.
3.Isol An·tang manderangko ia bak-chikkungni bak-sakoa banona ra·bachina agana?
“Na·simang bak chikkungni bak sani gimikko bandalona ra·babo” (Malaki 3:10).
Aganchakani: Bak chikkungni bak sako Uni bandalona ra·bachina Isol agana.
4. Maiko Isolni “bandal” minga?
“Unon Juda gimik mirangni bak chikkungni bakrangko, aro gital draka bitchiko, aro toko gam donchakramrangona ra·baaha” (Nehemia 13:12).
Aganchakani: Malaki 3:10 o, Isol ia bandalkoa “Angni Nok” ine agana, jeni miksonganian Uni nok ba gilja nok ong·a. Nehemia 13:12, 13 o, bak chikkungni bak sarangko gam donchakramrangona ra·babo ine rongtalbate agana, jean Isolni bandal ong·a. Minggipin podrang jerangan ia bandalko Isol nok, gam donchakram, ba Isolni nokdring ine agangiparangara 1 Serikani 9:26; 2 Serikani 31:11, 12; aro Nehemia 10:37, 38 rangan ong·a. Niam Gitchamni somoio, Isolni manderang uamangni pilak man·aoniko – me·su samjak aro batburungrangko man·chape – bak 10ko bandalona ra·batokachim.
5.Bak chikkungni bak sako on·ania Moseni somoio dakdilgipa dakbewalrang aro manianirangsa ine mitamrang chanchia, jean chisolo bon·atako man·aha. Iara ong·bebeama?
“Unon ua [Abram] pilak bostuni bak-chikkungni bak-sako una on·aha” (A·bachenga 14:20). Aro A·bachenga 28:22 o, Jakob indake agana, “Nang·ni on·gimin gimikoniko anga bak-chikkungni bak-sako Nang·na on·chongmotgen.”
Aganchakani: Ia kattarang Abraham aro Jakob, uamang sakgnian bak chikkungni bak sako uamangni man·giminrangoniko on·aha ine paraka, jemangan Moseni salrangna inditan skange janggi tangsoahachim. Uni gimin an·ching indake agana man·gen je ia Isolni dongimin bak chikkungni bak sara Moseni niamo bon·chongdikeja indiba pilak somoini pilak manderangnan ong·a.
6. Niam Gitchamni salrango bak chikkungni bak sakoa maina jakkala?
“Torom tambuna uamangni dangdike on·ani gimin, man·rikani ine, Anga Isrealo Levini dedrangna pilak bak chikkungni bak sa praprakko on·aha” (Chanani 18:21).
Aganchakani: Niam Gitchamo ia bak chikkungni bak sakoa kamalrangni man·gni dake jakkalaha. Levi ma·chong (jemangan kamalrang ong·achim) ge·na gama aro pala simaniko dakna gita mamung a·ani bakon man·pajachim, jen somoion gipin ma·chong chi·sade uarangko man·tokachim. Ia Levi ma·chonga torom nokdringo simsakna aro Isolni manderangna dangdike on·na gita chu·gimik kamrangko ka·achim. Uni gimin ia kamalrangko aro uamangni nokdangrangko bak chikkungni bak sachi aldu mitangna Isolni miksongania ong·achim.
7. Isol, bak chikkungni bak sani bidingo Uni miksonganirangko Niam Gitalni salrango dingtangatahama?
“Rongtalgipa bosturangni kam ka·giparang torom nokoniko cha·a, aro ganchio dangdike on·giparang ganchi baksa bak man·paa ine na·simang u·ijama? Uandake nama kattachi tangchina Gitel nama kattako aganprakgiparangna donaha” (1 Korinthirangna 9:13, 14).
Aganchakani: Dingtangatja. Ua uko dakangkua, aro jemangan nama kattana dangdike on·ani kamrangko ka·engachim uamangko bak chikkungni bak sachi dakchakna da·alo Isolni miksongani ong·a. Sakantian bak chikkungni bak sako on·tokgenchimode aro uarangko nama kattako gipatna kam ka·giparangko dakchakna namedake kimkime jakkalgenchimode, bon·kaman-somoini Isolni nama kattako a·gimikona ta·rake gipangatna gita agitchapile tangka paisarang donggenchim.
8.Indiba Jisu ia bak chikkungni bak sako on·anikora bon·atangjama?
“Aiao na·simang, Sastro skigiparang aro Pharisirang, cha∙chipilgiparang! maina na·simang podina aro guamori aro jirani bak chikungni bak sako on∙a, indiba niamni jrimbatarangko, chong·motan bichal, aro ka·sachaka, aro bebera·ako wataha; iarangko dakna nangachim, aro ukoba watna nangjachim” (Mati 23:23).
Aganchakani: Bon·atangja. Batesa, Jisu uko dakchina didia. Jihudirang bak chikkungni bak sako kakkete on·genchimomangba uamangni niamni nangchongmotbatgiparangko chong·motan – kakket bichal, ka·sachakani, bebera·anirangko – gimaatenganina Ua manengaha. Unikoa Ua uamangna rongtale agandapkuaha je uamang bak chikkungni bak sarangko kakketen on·angkuna nanga, aroba kakket bichalko dakgipa, ka·sachakgipa aro bebera·aniko watgalgijagipaba ong·na nanga.
9.Bak chikkungni bak sako on·anio jajagipa manderangna Isol maidakgipa aiao inmanpilgipa kattarangko agana?
“Na·simang bak chikkungni bak sani gimikko bandalona ra·babo… da·o iachi Angko dake nibo ine Kotokrangni Jihova agana, Anga na·simangna salgini kelkirangko oe, na·simangna pattianiko chakjapile rudapgenma rudapjawa” (Malaki 3:10).
Aganchakani: Ua agana, “da·o iachi Angko dake nibo” aro Anga na·simangna indakgipa pattianiko on·gen jekon na·simang ra·chakna chakjapilgen! Iano mangmangsan Isol, Sastroo indakgipa agananiko daka. Ua indake aganenga, “Dake nibo. Ian ong·chongmota. Anga na·simangna ku·rachaka.” “Ia bak chikkungni bak sako on·anio Isolni kakketgipa ku·rachakaniko ritchani ritcha, hajalni hajal bak chikkungni bak sako on·giparang a·gimiko dake nigen. Uamang “Na·a Isolna on·changgalna man·ja” ingipa kattarangni bebe ong·aniko skie ra·manaha.
10. Jensalo an·ching bak chikkungni bak sako on·on, an·chingni tangkarangkoa sawamancha man·soenga?
“Ianode signi manderang bak chikkungni bakrangko ra·a; indiba uanode Ua [Jisu] uarangko ra·a” (Ibrirangna 7:8).
Aganchakani: Jisu, salgini an·chingni Dal·gipa Kamal, bak chikkungni bakrangko man·soa.
11. Maidakgipa dake nianio Adam aro Hoba chu·sokjaha – Uni songnoko bak man·pana gita je dake nianikon an·ching sakantian chu·sokgipa ong·na nangengachim?
Aganchakani: Isolni iade uamangni ong·ja ine agangipako uamang ra·sekaha. Isol, Adam aro Hobana bol pangsa – nama-namgijako u·iani bolni bitena agre – Barini pilak bolni biterangkon on·ahachim (A·bachenga 2:16, 17). Uko cha·na gita ua bolni bitede uamangni ong·jachim. Indiba uamang Isolo ka·dongchakjaha. Uamang ua biteko cha·aha aro ga·akaha – unikode ia bakrobegipa, namjabegipa, saknabegipa a·gilsakni pap a·bachengaha. Da·oni manderangna, Isol An·tangni man·e cha·aniko, gisik gnanganiko, aro salgini pilak pattianirangkon on·a. Isolni an·chingoniko am·anide an·chingni man·giminrangoni bak chikkungkosan ong·a (Levirangni 27:30), aro jedake Adam aro Hobana ong·achim, uandaken Ua drae ra·ja. Ua uko an·chingni jaksokaon dona indiba indake agana, “Uko ra·nabe. Uan rongtala. Uade Angnisa ong·a.” Jensalo an·ching ma·siteleba Isolni bak chikkungni bak sako ra·a aro uko an·tangna jakkalna kradraata, unon an·chingba Adam aro Hobani pap ka·gipa apsankon daktaigiparang ong·a, aro indake dakanichi an·chingko Piokgipao ka·dongchakgijaniko mesoka. Isol tangkako nangade ong·ja, indiba Ua an·chingni kakket dakaniko aro ka·dongchanganiko nangnika.
Isolko Nang·ni Ka·rimgipa Ripeng Dakbo
Jensalo na·a Isolna bak chikkungni bak sako on·pilon, nang·ni pilak kamko ka·anirangon na·a Uko ka·rimgipa ripeng dakmanaha. Aiao mairongpilgipa, pattiako man·gipa: Isol aro na·a – ka·rimgipa ripeng ong·ani! Unbaksa ka·rimgipa ripeng ong·anio, nang·na pilakon man·gnirarasa ong·aia aro uano gimaani dongja. Indioba, Isolni a·kanggipa tangkako ra·genchimode aro uko an·tangni nanganinasa jakkalna miksonggenchimode namen kenbegnigipa kam ong·skaa, jekon Ua janggirangko jokatna ine donmanahachim.
12. Bak-chikkungni bak-sana agre, maiarang Isolni ong·a, An·tangni manderangoniko maiarangko Isolara bi·a?
“On·aniko ra·bae Uni sa·rarangona napbabo” (Gitrang 96:8).
Aganchakani: Uni kamna an·chingni Una ka·saaniko mesokpilna aro Uni pattianirangna mitelaniko dakna gita on·anirangko ra·bachina Isol an·chingoniko bi·a.
13.On·anirangkoa anga baitako Isolna on·na nanggen?
“Jajrenga gita, ba nanga gita ong·gija, sakanti ka·tongtangtango mangsonga gita on·china; maina Isol ka·sroke on∙gipana ka·sara” (2 Korinthirangna 9:7).
Aganchakani: On·anirangko dingtangmancha indita on·bo ine Sastroo janapa dongja. Badita on·na nanga, mande sakantian see ra·china aro unikode uko on·anio ka·srokchina, maina Isol indake dakanio katchara.
14. On·ani bidingo Sastroni gita maidakgipa niam ba dakna nanganirangko Isol an·ching baksa sualrima?
Aganchakani:
- Anchingni skanggipa dakna nanganiara an·tangtangko Isolna on·kanganian ong·a (2 Korinthirangna 8:5).
- Anching an·chingni nambatsranggiparangkosa Isolna on·na nanga (Toe Skianirang 3:9).
- Gisiko ske ongipana Isol pattia (Toe Skianirang 11:24, 25).
- Rachakana bate on·anio pattiani bang·bata (Watatarang 20:35).
- Jensalo alaksi daka, Isolni anchingna on·gimin pattianirangko an·ching tik ong·e jakkaljaenga (Luk 12:16-21).
- Anchingni on·anirangna bate Isol pattipilskaa (Luk 6:38).
- Jedake Isol anchingko silroroata aro an·chingna pattia ugitan an·chingba on·daprorona nanga (1 Korinthirangna 16:2).
- Anchingni man·a gita an·ching on·na nanga (Deuteronomy 16:17).
An·ching bak chikkungni bak sako Isolna on·pila, jean Unin ong·achim. An·ching on·anirangkoba Una on·a, jean skatang gita aro ka·sroke on·nani ong·a.
15. Maiarang Isolni ong·a?
Aganchakani:
- Agilsakni pilak rupa aro sona (Haggai 2:8).
- Agilsak aro uno donggipa pilak manderang (Gitrang 24:1).
- Agilsak aro uno donggipa pilakan (Gitrang 50:10-12).
Indiba Ua manderangko An·tangani namen mani cha·beanirangko jakkalchina bilko on·aha. Gamrangko chimongna aro man·dapaniko dakna gitaba Ua uamangna u·iani aro bilko on·aha (Deuteronomy 8:18). Pilak nanganirangko on·anina on·pilskaani gita Isolni an·chingoniko bi·anide, an·chingni nanganirangna an·chingni kam ka·anirango Uni dal·begipa dakchakaniko u·ina ine 10 percentko Una on·pilskachina Uni bi·anian ong·a – aroba, an·chingni Una ka·saaniko aro mandera·aniko mesokna ska gita on·anirangkoba apsandaken on·china bi·a.
16. Jemangan Uni 10 percent aro ska gita on·anirangko on·pilskagijagipa manderangkoa Isol badine ina?
“Mande Isoloniko togie ra·genma? Indiba na·simang Angoniko togie ra·aha. Indiba na·simang agana, Chinga Nang·oniko maikai togie ra·aha? Bak chikkungni bakrango aro on·anirango” (Malaki 3:8).
Aganchakani: Ua uamangko togie ra·gipa ine ina. Manderangni Isoloniko togie ra·aniko na·a chanchie niahama?
17. Jemangan bak chikkungni bak sarango aro on·anirango ma·sieba togie ra·angkugipa manderangna mai ong·gen ine Isol agana?
“Na·simang saochi sao on·ako man·aha; maina na·simang …. Angoniko togie ra·a” (Malaki 3:9). “Ba cha·ugiparang, ba mikbokgiparang, ba pekgiparang, ba saigiparang, ba cha·bokgiparang Isolni songnokko man·rikjawa” (1 Korinthirangna 6:10).
Aganchakani: Uamangni kosako sao sokbagen aro uamang salgini songnokko man·rikjawa.
18. Mikbokrakani kosako Isol mikrakataniko on·a. Maini gimin uara namen kenbegnigipa ong·a?
“Maina jeo nang·ni gam, unon nang·ni ka·tongba ong·gen” (Mati 6:21).
Aganchakani: Maina an·chingni ka·tongrang an·chingni gamrangko man·dapna rikaniko ja·rika. Bang·bata tangkarangko bate, bate man·daprorona chimonganio an·ching an·chingni gisikrangko dongenchimode, an·chingni ka·tongranga mikbokrakgipa, chu·ongnikgijagipa aro gangbo dakgipa ong·gen. Indioba an·ching an·chingni gisikrangko sakgipinrangna sualrimanio, dakchakanio aro Isolni kamo dongenchimode, an·chingni ka·tongrang simsakgipa, ka·sagipa aro sontolgipa ong·skagen. Mikbokrakaniara bon·kamman salrangni namjabegipa paprangoni mingsa ong·a jean manderangni salgichi doaniko bon·chongdikatgen (2 Timothyna 3:1-7).
19. Jensalo an·ching Uni rongtalgipa bak-chikkungni bak-sa aro on·anirango Uko togie ra·on, Jisu maiko chanchia?
“Uni gimin anga ia chasongko namnikjaha; aro aganaha, Iamang ka·tongo pangnang branganga” (Ibrirangna 3:10).
Aganchakani: Ma·a paani tangkako detangni cha·uao jedake ma·a paarang chanchia ba namnikja uandaken Uaba daka. Iano tangkani giminde dal·gipa neng·nikani ong·ja. Iano bi·sani kakketgijani, ka·saani griani aro ka·dongchakgijanisa ning·tue gisikko duk ong·ata.
Love caused God’s people in Macedonia to give liberally to the famine-stricken Christians in Jerusalem.
20. Makedoniao donggipa bebera·giparangni tangka ba gam jinrangko jakkalani bidingo, maidakgipa aiao inmanpile katchaani kattarangko Sastro gamchate mesoka?
Aganchakani: Watata Paul, Jerusalemo bakrobegipa akal karapchi neng·nikanirangko man·enggipa Isolni manderangna tangkarangko chamchina janape Makedoniao donggipa mondolirangna seataha. Jensalo ua uamangni songjinmarangona re·angtaion ia on·anirangko an·tangan ra·bajolgen ine Paul uamangna aganataha. Makedoniao donggipa mondolirangni aiao inmanpilgipa aganchakataniko, 2 Korinthirangna Odai 8 o talataniara ka·tongko moatpile didiani ong·a:
- Pod 5 – Skanggipao, uamang antangtangni janggi tanganiko Jisu Kristona on·kangpiltaiaha.
- Pod 2, 3 – Uamang antangtangan kangalgiparang ong·genchimoba, an·tangtangni bil amana batpile uamang on·aha.
- Pod 4 – Uamang uamangni onanirangko ra·echina Paulko mol·molaha.
- Pod 9 – Uamangni onanirango Jisuni on·kanggipa dakmesokaniko uamang ja·rika.
U·ie Ra·ani: An·ching Jisuna ka·sabebegenchimode, Uni kamna on·kange on·aniranga an·chingko neng·nikatgipa ong·jawachim indiba ua katchabegipa cholsa ong·skagenchim je an·ching uko namen kusi ong·bee dakgenchim.
Ka·saani, Makedoniao donggipa Isolni manderangko Jerusalemo ong·gipa akal karapchi Kristianrangni neng·nikanirangko man·enggiparangna jaksrame tangkarangko on·giparang ong·ataha.
21.Bak-chikkungni bak-sao aro on·anirango kakketgiparangna maidakgipa ku·rachakaniko Isol daka?
“Na·simang bak chikkungni bak sani gimikko bandalona ra·babo, maikai Angni noko cha·ani donggen, da·o iachi Angko dake nibo ine Kotokrangni Jihova agana, Anga na·simangna salgini kelkirangko oe, na·simangna pattianiko chakjapile rudapgenma rudapjawa. Aro na·simangni a·sel Anga cha·minokgipako manenggen, aro ua na·simangni a·ani biterangko rurongatjawa ine kotokrangni Jihova agana. Aro pilak jatrang na·simangko kusi ong·gipa ine minggen; maina na·simang an·senggipa a·song ong·gen ine kotokrangni Jihova agana” (Malaki 3:10).
Aganchakani: Tangka jakkalanio kakketgipa An·tangni manderangko silroroatna Isol ku·rachaka, aro uamangni samtangtango donggiparangna uamang pattiani ong·skagen.
Isolni Pattiani Cholrangko Ka·mao Segiminrangko Chanchiate Nibo:
- Nangni chu·gimik man·anina bate nang·ni bak-chikkungni bak-sku Uni pattian baksa jakkalanio chu·ongbatgipa ong·gen. Na·a iako jajaengode, bak-chikkungni bak-sako kakkete on·gipa mandeo sing·bo!
- Pattianirang pangnande tangka paisao ongja. Uarang haida an·seng baljokanio, gisikni tom·tomanio, bi·aniko aganchakanio, chelchakanio, nokdango meli-nangrimanio aro ka·sagrikanio, be·en bimangni gita bilak mangrakanio, gisik seng·e basena changanio, mitelpilna skani gisiko, Jisu baksa chapchap nangrimanio, janggirangko ambaanio, gitchamgipa garini namkuenganio, aro uandakgiparango ong·skanaba donga.
- Pilakon Ua nang baksa kam karimgipa ripeng ong·gen. Isolna agre darangba chu·soksranggipa, aiao imanpile namgipa miksonganirangko dakna man·jawa.
22. Nang·ni ka·saani aro mitelpilaniko kamchi mesokna ine bak-chikkungni bak-sa aro on·anirangko on·na a·bachengna gita na·ara skengama?
Nang·ni Aganchakani: ____________________
Nang·ni Sing·anirangna Aganchakmanaha:
- Angni bak-chikkungni bak-sako angni mondolio jakkalani bewalko anga namnikjaora, anga uko on·anikoa dontongboma?
Aganchakani: Bak-chikkungni bak-sako on·china ge·etaniara Isolonisa ong·a. Bak-chikkungni bak-sara rongtalgipa tangkarang ong·a jean Isolnisa ong·a (Levirangni 27:30). Jensalo na·a bak-chikkungni bak-sako on·a, na·a Unasa on·enga. Uni mondolina nang·ni on·gipa tangkarangna simsakna gita Isolara chu·soksranggipa ong·a. Nang·ni dakna nanggnide uko on·anisan ong·aia. Jemangan Una on·gipa tangka paisarangko jakkalsretengachim, uamangko jeba dakchina Isolna pakwataibo.
- Anga namen gisiko suk ong·ja maina anga tangka paisana neng·nikani a·sel bak-chikkungni bak-sani nalsao bang·gija tangkarangkosan on·pana gita man·paia. Angara maiko dakna man·gen?
Aganchakani: Na·a nang·ni dakna ama gimikchi dakenga ong·ode nang·ni on·enggipa tangkarang bang·a ba bang·gijani gamchatgipa ong·ja. Mark 12:41-44 ni bang·gijakosan (pun kapgni) on·gipa, kangal segri me·chikni gimin Jisu indake agana, “Tangka donchakanio pilak dongiparangna bate, ia kangal segri bang·bate donaha.” Maina gipinrang “an·tangtangni agitchaaoniko donaha, indiba ua an·tangni chu·onggijaoniko uni pilakkon….donaha.” Isol an·chingni on·anirangko, an·ching baditana kingking on·kanga aro maiko chanchie on·enga uarangchisa toa. Jisu nang·ni on·anirangko dal·en chana. Ka·sroka gnang on·bo aro Jisu katchaen chu·ongnika ine u·ie ra·bo. 2 Korinthirangna 8:12 ko didianiko man·a poraibo.
- Angni tangka paisarangko namedake jakkalana agre nokkol pamongni kamranga gipinrango bak dongjama?
Aganchakani: Donga. Nokkol pamongni dakna nanggniranga, an·chingna pilakkon on·gipa Isoloniko (Watatarang 17:41-44) an·chingni man·gimin changa sapani aro pilak pattianirangko namedake jakkalanirangoba bak donga. An·chingni janggi tanganion ua bak donga! Isolni an·chingna on·gipa gamrangni kakketgipa nokkol pamongni dakna nanggniara an·chingni somoirangko jakkalanikoba man·chapa:
- Isolni anchingna on·gipa kamrangko ka·ani (Mark 13:34).
- Bimchipe Kristona sakkiko onani (Watatarang 1:8).
- Sastroko poraiani (2 Timothyna 2:15).
- Isolo biani (1 Thessalonikrangna 5:17).
- Nanggiparangna dakchakani (Mati 25:31-46).
- Anchingni gital dake janggi tanganiko Jisuna salantio on·kangani (Romrangna 12:1, 2; 1 Korinthirangna 15:31).
- Mitam skiprakgiparangnara bang·a tangkarangko on·jama?
Aganchakani: Oe. Pilak toromo dilgiparangni man·gnirangkon mitam toromko dilgiparangchi ia somoiode komiatengaha. Ian Jisuni bimungni kosako ra·chakgijaniko ra·baa. Iako dakanichi, mondoli aro uni kam ka·anirangoni hajal manderangko namen namnikgija ong·ate ong·katatanga. Uandakgipa dilgiparang bichalni somoio batanggimin salrango uamangni namgijako dakanina namen saknabegipa salko mikkangchakna nanggen.
Bon·kaman Somoini Isolni Dongpitigipa Mondolini Dilgiparang
Indioba, bon·kaman-somoini Isolni dongpitigipa mondolio, darang dilgiparangan dugaa bang·e tangka paisarangko man·ja. Adita somoirangna kamrangko ka·ani ja·mano, uamangni kam ka·ani gadang ba uamangni mondolini dal·a ba chonani kri apsan apsan dake tangka paisarangko man·a (ja anti bang·gija tangkarangkosan man·aia). Bang·a changrangon, pamongrangni man·gnina chu·ongdapatna ine uamangni jikgiparang bajar antidamrango kamrangko ka·toka.
- Bak-chikkungni bak-sako anga on·na man·jaora mai ong·gen?
Aganchakani: Isol indake agana, an·ching Uko skang dongenchimode an·chingni nanganirangko an·ching man·ahama man·kujaenga uarangko Ua nigen (Mati 6:33). Uni hisapanirang manderangni chanchianirang baksa pangnan dingtanga. Uni miksongani ning·o, bak-chikkungni bak-sako on·ani ja·mano dongrikgipa tangkarang Uni pattiani gri chu·gimikgipa tangkarangna bate jakkalanio chu·ongbatgipa ong·gen!
Nipiltaianiko Dakani
- “Tithe” ingipa kattani ortoara “chikkunggipa” ine ong·a. (1)
______ Ong·a.
______ Ong·ja.
- Tithe ba bak-chikkungni bak-sara a·bachengaonin Isolnin ong·a. (1)
______ Ong·a.
______ Ong·ja.
- Angni man·giminoniko bak-chikkungni bak-sa gimikko anga Isolna on·pilkuja skal ang uko on·kujaenga. (1)
______ Ong·a.
______ Ong·ja.
- Jisu bak-chikkungni bak-sako on·pilchina didia. (1)
______ Ong·a.
______ Ong·ja.
- Ka·mao sulsul segiminrangoni an·tangni ska gita on·a bidingo Sastroni gita badiarang ong·a? (5)
Nang·o je gitchae donggipako on·bo.
Ka·sroke on·bo.
______ Bang·e bang·e on·bo.
______ On·bo jedakode na·a dongtogen.
______ Isolni nang·ko silroroata gitan ukoba on·bo.
______ Ra·chakanina bate on·anion bang·bate pattiani donga.
______ Nang·ni on·anirangna bate Isol nang·na bang·bate on·pilskagen.
______ Nang·ni on·na sko uko on·bo.
______ Manderang nang·ko alaksi ine chanchijana gita uko on·bo.
- Sastroni gita, Isolni nama kattana dangdikenggiparangni man·gnini ja·pangara badiagipa? (1)
______ Bingo games ba tangkana kal·anirangko kal·ani.
______ Cakerangko tarie palani.
______ On·anirangko boldolgrikgipa kal·ani.
______ Raffles ba rasongni ticketrangko breani ba kal·ani.
______ Bak-chikkungni bak-sa.
- Mosena skang bak-chikkungni bak-sako Isolna on·pilgipa Niam Gitchamni pagitchamrangko ia Study Guideo ja·napgiparangara sawarang? (2)
______ Adam
______ Isak
______ Jakob
______ Abraham
______ Noa
______ Methusela
- Malaki 3:8ni gita, bak-chikkungni bak-sako aro on·anirangko on·gijagipa manderangara badiagipa papko dakgipa dolo ga·aka? (1)
______ Mite olakkigipa
______ Sabbath ba Neng·takani Salko pe·gipa
______ Mande so·otgipa
______ Togie ba ra·seke ra·gipa
- Sastroni Ibri. ki·tapo seani gita, jensalo an·ching bak-chikkungni bak-sako on·engon, sawasa an·chingni tangkarangkoa man·soa? (1)
______ Pamong
______ Nanenggiparang
______ Jisu, an·chingni Dal·gipa Kamal
- 2 Timothyna 3:1-7ni gita, bon·kamgipa salrangni paprangoni pap mingsa jean manderangko Isolni songnokona doaniko champenggipara mikbokrakanian ong·a. (1)
______ Ong·a.
______ Ong·ja.
- Isolni bandalona bak-chikkungni bak-sako ra·baani miksonganiara (1)
______ Toromni ki·taprangko brena jakkalani ine ong·a.
______ Maiba torom janggi tanganiko namdapatna ine ong·a.
______ Isolni mondolini gam donchakramona ra·baani ine ong·a.
- Malaki 3:10 o bak-chikkungni bak-sako kakkete on·gipana Isol mai ku·rachakaniko daka? (1)
______ Ua mande pangnaba sajawa.
______ Ua mande pangnaba an·tangni kamko gimaatjawa.
______ Uni ra·chakna amana batpile ua pattianirangko man·gen.
- Isol dake nianiko, Adam aro Hobana biteko cha·anio donaha. Ia Study Guideo seani gita, maia apsan dakgipa dake nianiko ia somoio Ua An·tangni manderangna donaha? (1)
______ Salantio Sastroko poraianiko.
______ Bak-chikkungni bak-sako on·pilaniko.
______ Sakki on·aniko.
______ Isolo bi·aniko.
- Bak-chikkungni bak-sako on·ania Moseni niamni bak ong·a, jean chisolon bon·chongdikaha. (1)
______ Ong·a.
______ Ong·ja.
- Angni on·anirangko Isola maichi hisapa? (2)
______ Anga badita tangkarangko on·a uachi.
______ Anga baditana on·kanganiko daka uachi.
______ Jekon anga on·an baksana chanchianichi.
- Kakketgipa nokkol pamongni kamara tangka paisarangko name jakkalani mangmango bak dongaia ong·ja, indiba uan somoiko Isolo bi·anio, sakki on·anio, Sastroko poraianio, aro sakgipinrangko dakchakanio jakkalanioba bak donga. (1)
______ Ong·a.
______ Ong·ja.
- Anga bak-chikkungni bak-sa aro on·anirangko on·na a·bachengna skengaha.
______ Oe, skengaha.
______ Sikja.
