Tile li ye amulo ghimeshi li nga kumsu qa a. Ikemu kughou li no anga jukutojukeno tiye li nga kumove aghi. Li no pishi puwo aza lakhiu jukelo anga li mla lo khadape akeu ithulu. Tileno pama anga xu akeu kishisu akukau lau ighi eno pi “hino I ngake” aza lakhiuno moe, “ti thivekeu no onga ke” ipi.

Akukau ye tikuma dolo kiu kishi xathatsu nanikela? Pama tishi kutsala akeu lo akukau no pisu, eno pa w ghushimi pa phimpi kheu vilo, azuta kikihi pesu anga hipau amuta lono xapha kini shivelo ipikelo atughulo ye akukau no ghava shi Anikughashi kumsu-a, ikemu akukauno pai xaphavetsulo ipi. Tileno ghushimi huno asheshino pa zuta kikihi ikhiphe puzu wo anga xaphavenike kutove.Paikhavi anga pazano akukau zulo ikiqi qoqhunhe puzu akukau vilo, “anga ghiqhikeno pa tsuvelo” ipi. Ikemu aza lakhiu no akukau vilo, “I kujo khiu ngamo shimovenike xaphakijevetsu lo” ipi. Tileno akukau no khikhiuno anga paza kuchoukeno ithive.

Tungkuputsa lo totimi pesu akukuhou kiqitsukeu shicheni (Jeremiya 6:2). Ashekha tsala qolo tile akukuhou kutomo aghinani, tile ningu ye khikhiuno kuchou kukuhou ke ipi michiluni kya? Khikhiuno kuchou nu khape aghinanikya? Akukau Solomon toi ningu ye azuta kikihi Alhou tsa pe aghimayesa (Ibrimi 4:12).

PHIJUNIKEU

Hi aqhou Bible kiyeh tsupuakeqo phijuno hetha puakeu lo shepichhiluvelo.

1. Piyekusu lo Alhou kukuhou kuchou ghili kishi pipuanikya?

Piyekusu 12:1, 2, 5 A ___ hu no khetsunhe w, eno aqhi shou puthugho, eno ayepu chighikini pesu li kutsu khapu. Eno li ye anga ___ nike apunu kusu su a ... eno li ye anga kipitimi lakhi khiu ayikusu pesu shiyehqo shou ayehpenikeu ______.ikemu anga ye sasu Alhou lau Pa kukalakhu lo ikuve.

HI ITHILO: Bible tungkuputsa lo tsughukhui keu totimi pesu Alhou w kuchou kukuhou kiqitsu cheni (Jeremiya 6:2). Piyekusu 12 lo totimi hipauno khetsunhe w, aqhi shou nepe, eno li kutsu lo ayepu Chighikini pu akeu ithulu ani. Hipaqo ye Alhou no lhosupuakeu alhoayeh lono achekeu kuvu qoke. Jisu no akukuhou ghili hitoi pi; “Noye ayeghiqha kuvu ke” ipi. Mathi 5:14. Khetsunhe pesu Jisu kuvu kiqitsu (Leshe 84:11; Malaki 4:2). Li no aqhi nepe akeu pesu Old Testament lo axine ghenguno aghakishi kumlla gho pichepighi lhoxu ghiqhipe piti mlla chekeu yekukhu shitsu ani. Aqhi no khetsunhe kuvu yebidetsu chekeu toi ghiqhi mlla chekeu huno Messiah ighinikeu kuvu yebidetsu cheke (Colossiami 2:16, 17; Ibrimi 10:1). Li kutsu shou ayepu chighikini akeuno Old Testament lo Israel lagha chighikini kiqi, eno New Testament lo Apostles chighikini kiqitsu ani. Eno Khiu ayikusu pesu shiyehqo shou ayehpenikeu no Jisu kiqitsu ani (Leshe 2:7-9; Piyekusu 19:13-16).

2. Huchuikeu Dragon akijeu ye khiu, eno paye kiu shinike pukaputsaju kya?

Piyekusu 12:9 Eno dragon akijeu, khiu vilo aqau lo apighi eno ___ eno ___ ipi kuchekeu hu hapheve.

Piyekusu 12:4 dragon no totimi khiu anga pununike kutovekeu zulo puthugho pe ngokheluve, anga punuqhi kemtsa ___ nike ghenguno.

HI ITHILO: Dragon ye Satan ke, Satan no Jisu punu qhi kemtsa Rommian Empire qholo ayehkipeu Herod vechewono Jisu kutsavenike Bethlehem lo anga kipitimi kutsaleqhevetsu (Mathi 2:16)

3. Satan no Jisu kutsa mlaveke thiu kiu shikya?

Piyekusu 12:5 Eno li Nga ye ___ Alhou lau Pa kukalakhu lo ___.

HI ITHILO: Jisu no xuchileluveke thiu Pa sasu kungugha lo Alhou kuka lakhu lo ikuve (Apostolmi 1:9-11). Khile Satan no iku tokumlapu a lo sasu ikuve.

4. Jisu sasu kungugha lo ikuveke thiu Satan ye akukuhou shou kiu shikya?

Piyekusu 12:13 Kughou Satan no ayeghi lo pa hapiqivekeu ithivekeno, pano totimi khiu anga Kiptimi ___ keu hu shikighime thuve.

HI ITHILO: Satan ye pano mithichekeu Jisu kutsamlavekeu lono itehiye Pa kukuhou shikighimekeu lono Jisu ghuzanikeu muqu phuluve.

5. Kumsakimishipu ghime do aghuloki hipau lo sukusho ithulunike ghenguno li ye khilau wuvekya?

Piyekusu 12:6 Tileno totimi ye ___ khikhi Alhou no li ghenguno kutopuakeu lo pove, tile panonguno atsala qhethonhe lakhi aqhekini no lhotsugho li loji.

HI ITHILO: totimi (Alhou kukuhou) ye putosu yeghi lo pove, li ghumi launo ithsuuve. Hipa yeghi xu-lhe lono mutsumilei ithulu akeuno akuzu thiqhilukemiqo Alhou timiqo ye ilo asuki atuki lo eno aghasaqha yenguikeu a qolo ithsuche. Khileno pano chineh puthuno ililai Alhou mllalukepukeno tipau a phuuve. Pope yehkipe lono shikighime keu launo posu ilo America zushe lo sukusho a phuuve. Tilehi no atsala 1,260, momu aqhi 42, momu ampe kuthu tuxa Alhou timiqo shikighimekeu launo pojolu. Hipau ghulokilo Christo w puluthomi asale kutomo kuxu chuvetsu. Hipau do aghuloki lo Alhou kukuhou ye xu aghikemu pano juajeh ikhikiphe shi michiphe mla, momu aqoaho puthu mlano ighi.(Sukuphatsu keu lo “Shikighime keu do aghuloki” lo ghi julo).

6. Alhou kukuhou juajeh michiphetsukeu michipu kini akeu pama ye kiu kya?

Piyekusu 12:17 Eno dragon totimi shou agha ideve, eno li polo kughuko khunoqo ___ papecheni, eno Jisu Christo ___ pechekeqo sasu aghushinike wuve.

HI ITHILO: Alhou kukuhou achili, khiunoqo vilo Pa w timi ipi chekeqo ye Alhou zahkutsu chighi (Sabbath zahkutsu sukuqhano) pape chekemiqoye Jisu Christo shepe (testimony) khikhi tungkuputsa pitsukeu ghungu (Piyekusu 19:10) ghi pecheni. Alhou no ado aghuloki kishekhalau Pa kukuhou pesu “achili kukuhou” ipi. Tiye Apostles qono puthu keu kukuhou kukutsu eno ghushoghili phevemono pekishesu ighi akeu achili kukuhou ke.

7. Jisu ye ninguno Pa kimiye akeu kiu lono piyelo pikya?

Johan 14:15 Tsutsala nonguno I kimiye aghiaye I ___ papelo.

I Johan 5:3 Kughengu hino Alhou kimiye akeu piye anike, tiye ninguno Pa ____ papekeu lono.

HI ITHILO: atughulo ninguno Solomon ghili lono Philukeno, aza lakhino li nga kimiye keu lono aza kuchou michipheluke toi, ninguno Alhou zahkutsuqo gholu eno pape keu lono ningu ye Alhou kukuhou ke ipi michiphelu ani.

1. Ashekha ghulokiu Alhou kukuhou ye kungumi kuthu tsape tsunaniepike tiye kiutoikeu tsape kya?

   1. Piyekusu 14:7 Alhou sumsa lo eno Pa jukuvu shitsu lo, kughengu Pa  do ye ighiveake. Eno khiuno kungugha, ayeghi, azughi, eno azupukiqo lhosutsu keno Pa  lo.

   2. Piyekusu 14:8 Eno kungumi kutauno pape ighikeno pi, aphughi akijeu  ye , ikiqivae, kughhengu lino li salha ghakighide ji pesu shiyehqo kumtsu piyeveke ghenguno.

   3. Piyekusu 14:9, 10 Kungumi akuthuuno panongu papesu ighi, eno asutsa kuloghi lono pi, “Tsutsala khiualano tughashi eno pa julho  napi aye, eno pa kishe lo momu pa w lo pa  ikhiluve aye pa pelo Alhou loghukighide ji shopeni.”

      HI ITHILO: Kungumi kuthu tsape hipau ye Jisu no ide ighimphi zuuno Alhou kukuhou no pesu itehi ayeghiqha lau pikulhatsu ani.

2. Alhou kukuhou ye atsape hipau pesu khiuno lau pikulhatsu aniepikya?

   Piyekusu 14:6 Ashekha kuhakeu tsakiviu pesu ayeghi lo kughuna kuami , alimi jeli, atsa jeli eno timi jeliqo lau pikulhatsu ani.

   HI ITHILO: Ado aghuloki kishekhalau Alhou kukuhou no ayeghi lo shiyeh jeli kumtsu lau hi akiqi kijeje kuthu pesu pikulhatsu ani.

3. Alhou ye ashekha ghulokiu Pa kukuhou michiphekulupu Pa tsa lo kiu tsupuanikya?

   1. AD. 1798 lono aghasaqha lono ipeghiveke thiu li kumla ithulu ghi pekipheshi mla thuve (Piyekusu 12:6, 13-17)

   2. Akukuhou hipauno Christo kukuhou hukuthu lo Apostles qono kuchou kiu kutsu eno pesu Christo chineh yeh boqhatsu keno tipau pape kutsu ani (Piyekusu 12:17)

   3. Hipauno Akutsunini Sabbath zahkutsu sukuqhano ahzakutsu chighi gholu eno pape acheni (Piyekusu 12:17)

   4. Hipau ye tungkuputsa pitsukeu ghungu ke (Piyekusu 12:17)

   5. Hipauno Alhou w ashekhau tsape kuthu pesu ayeghiqha lau asutsa kuloghi lono pikulhatsu ani (Piyekusu 14:6-14)

   6. Atsape hipau ye ayeghiqha kuchopu lo akughutha kije lono pikulhatsu ani (Piyekusu 14:6)

   7. Atsape hipau no ashekha kuhakeu tsakiviu pesu pikulhatsu tsape tsuani, atsape hipau ye Jisu Christo lau likhino xachilekulu ithulunani ipikeu tsape ke (Piyekusu 14:6)

      HI ITHILO: Hi kunguu akiqi tsuni pi ighivekeu lo akukuhouqo lo kimiye chekemi Christomi kutomono pape chemo. Tishi aghie pinamu ashekhau tiqheli lo Alhou w achili kukuhou ye li lau pichebetsukeu toi akiqi hipaqo pape eno pikulhatsu ani.

4. Jisu no akiqi tsuni pesu otsu puzu ovilo, “wulo eno I kukuhou phuphetsulo” ipi. Nono tipau phuukeu lo oghenguno kiu tushoqhi puatsu anikya?

   Luk 11:9 Phujulo eno nono .

5. Ayeghiqha lo akukuhou aqoaho khijehino akiqi tsuni hipaqo pape chenikya?

   Ephesiami 4:5 Ampeu lakhi,  , eno baptism lakhi.

   HI ITHILO: Ayeghiqha lo akukuhou lakhi likhino akukutsu akiqi tsuni hipaqo pape

   acheni-tiye Seventh day Adventists qo likhino, eno ishi panonguno atsape hipau olau sughitsu ani. Ishi panonguno kungumi kuthu tsape pesu ayeghiqha lau pikulhatsu ani (Piyekusu 14:6-12) Atsape hipau ayeghiqha lo timi asale asale no ikhilu ani.

6. Ayehkulumuqo kutomono panongu ghi Christomi ke ipi acheni. Tipauno Alhou kuchou kukuhou ke ipilunani keshya?

   Isaya 4:1 Tipau tsala lo totimi tsuni no wo timi lakhi ki lo ngonani, eno “ni likhi ni  chunani, eno nilikhi ni  pepunani, ikemu timi pelo ningu sakiyipemonike ghenguno ninguno ojeh likhi kuni.

   HI ITHILO: Bible lo asho ipikeu ye Alhou tsa kiqitsu ani (Johan 6:35, 51, 52, 63) eno aphimini ipi akeu ye Christo mikucho kumla kiqi tsu ani (Piyekusu 19:8) ikemu Tungkuputsa hipau lo totimi tsuni no pano likhi pano sho chuni ipi keu kiqi ye pano likhi pano pesu kuchou shi, eno pano likhi pano phimini pepuni ipikeu kiqiye pano ye tukutiye kuhakeu Christo mikucho ye lunishimokeu kiqike. Panongu ye Jisu ye lunishi ani, kughengu Bible no pikeuno tilehi kungugha qholo timiqo dolo ningu xakulupu ajeh kutau kuha” (Apostolmi 4:12) ipikeu ghengu likhino Jisu jeh lunishi anike thono Pa ghushoghili ye papenishimo.

7. Ghuthu lakhi timi lakhino ashekhau tiqhelilo Alhou w kuchou kukuhou phulu kithishi paye akukuho tipau lo ilo kihimpi lakhi shivemayesakepu avehu shinani keshya?

   Apostolmi 2:47 Eno Ampeu no  xaluvekemiqo pesu  lo sukuphatsu.

   HI ITHILO: Iye, ashekhau tiqheli lo Alhou w achili kukuhou lo ilo kihimpi lakhi shiluvekepu avehushi ani. Hi ithi lo, inijuakeu hipau lo Alhou no mutsumilei khochile tsu akeuno,

   • Ningu ye aphimpi lakhi lo kusupuani. (Colossiami 3:15).
   • Aphimpi tipau ye Christo kukuhou ke (Colossiami 1:18).
   • Baptiz shikeu vechewono aphimpi tipau lo ilo kihimpi lakhi shilunani (I Corinthiami 12:13).

   Noah tsala lo akupulumiqo likhino ashuka lo Iloluke toi, ishi ghi akupulumiqo ye Alhou kukuhou lo iloghivemayesa. Ampeu no pi, “No eno okibolomiqo ashuka lo iloghivelo” ipi. Bothu 7:1.

8. Noah tsala lo pojoluve kulupu laghi khijehi akya?

   Ibrimi 11:7 Noah no akupulu lono, ... pa kibolomiqo xalunike ghenguno  lakhi kutope qhi.

   HI ITHILO: Ampeu Jisu no pikeuno Pano ide ighinike ghulokilo ayeghi hipauye Noah tsala lo tho shi aghinani (Luk 17:26) eno tile ijopekulupu laghi lakhi likhi aghinani, Noah tsala lo azukucho lono ijopevekulupu laghi lakhi likhi,tiye Noah shuka. Titoi ashekha tsala lo xakulupu laghi lakhi likhi akeu ye Christo kukuhou lo iloghilukemi likhi ani.

9. Akukuhou kutauqo lo pulubekulumi kutomo ani, ikemu tile Alhou w kuchou kukuhou lakhi likhi aniepi ani, tishi aye ti amulokutsushi puluchekemiqo ye kiu shivenani kya?

Johan 10:16 Ni ye amuqo hipau lo kuhakemi bheri kutauqo ghi ani, Niye tipaqo ghi , eno panongu ; eno tile  loji lakhi likhi shivenani, eno bherikheu ghi lakhi likhi shivenani.

Piyekusu 18:2, 4 Babylon akijeu ye ikiqivae, ikiqivae, ...  li qhiveno  I w , tishimaye nongu ye li xine lo ilo kusajeve nosa, eno li shou pusa ikughiniye akeu lo ilo kitimevenosake.

HI ITHILO: Jisu no Pa kupulumi eno amikuchomiqo vilo Babylon qhiveno ipeghivelo pi ku akeu sutsa panonguno chilunani, eno khochilenani, eno Pa w kuchou loji khunoqo ashekha ghulokilo kukuhou gholo iloghivenani.

NONO KHOCHILENIKEU

Jisu ye opelo ado ashekhau lo Pa kukuhou akijeu lo iloghive penisbi ani.Pa ghenguno noye ighono akughupushi ani. Noye ishi Pano oku akeu khochilevemo Keshya?

Khokichile: 

SUKUPHATSUKEU

Opelo alau study shipenike ghenguno “ghichheghime mpeqo” ghili suku phatsu ani.

Bible lo ampe 1,260 ghichheghime tsukeu ghili kutomo piidetsukeu ani, kughengu ayeghiqha xu-lhe lo aghichhe aghime kushukuqha hitoikeu Alhou timiqo no pujupejukeu shi ighipuani (Mathi 24:21) Bible lo tsupuakeuno, atsala 1,260, aqhi 42, eno ampe kuthu no tuxa ipi tsupuani (Piyekusu 12:6, 14; 13:5; Danel 7:25). Judahmi tsalakikihi kiqi lono aqhi lakhi lo atsala 30 pesu hipaqo kughusuve aye atsala 1,260 ipeghi ani. Eno Bible tungkuputsa kiqi lono atsala lakhi ye ampe lakhi sasu aqhemi momu aphiphi ipi (Akikihi 14:34; Ezekel 4:6). Xu-lhe no pikeuno ado aghuloki hipau tiye ampe 1,260 dolo pope yehkipe kuka qholono Alhou timiqo shikighime keu pi ani. AD. 538 lo akukau Justinian no kukami yehza lono Rommie lo pope pelo akukuhouqo kumtsu shou akutsu shipeni ipi ahza tsuvekeu toi, Justinian zah kutsu hipau pesu Rommian Empire lo kukami zahkutsu shivekeu kiqi lono pope yehpe kuka qholono AD. 538 nguno Alhou timiqo shikighime iphi AD.

1798 lo French Revolution lo Napoleon w general Berthier no ilo Vatican lo pope Pius vi kughape akughulo suveke kutolo ampe 1,260 dolono Alhou timiqo panongu kupulu ghenguno Million 50 kutolo pithivetsu.

Hile akiqi akhoto kuthu tsuani.

Piyekusu 12:20-12 lono akiqi hipano kuthu ithuluani:

1. Ni thikuzumiqo akipimi tsuchekeu Satan hu Jisu no cross lono theqhive.

2. Ningu ghi Jisu jih vechewono eno ningu shepe (testimony) kusajekeu vechewono satan theqhilunani.

3. Satan ye pa do ikholhoivekeu ithiveno shishe agha ide ani. Paye thokha lo shitsami akighithimike ipi ninguye khilemu pa kihimonani, kughengu paye ningu kukhukimiji ghumi lakhi ke ghenguno.

Ninguno hile atsape tsu akeuye, Jisu no satan theqhivea, eno ningu peloghi theqhilu penike ghenguno pano kimighikumlapuh kuka agho lakhi toi pesu ningu tsupuani. Ningu Kuxu lo akuka tipau peitha chenapi aye ningu ye khilemu ikiqivemonani. Satan no kiutoi agha ide anamu tiye ningu shipusamla nani, kughengu pa ye theqhivekeu ghumi lakhi shiveake ghenguno. Pa ye kungugha lono theqhivekeu ghumi lakhi, eno hape ayeghi lo piqivekeu lakhi, Ayeghi hipau loghi Jisu no cross lono pa theqhivea, eno pa yehkipe hu ikhiuluvetsuake, eno ashekha lo amiyizu lono qhoi pa puhavenikeu xathaveake ghenguno ningu ye pa msa akepu vehu kiumu kuha. Kughengu Jisu no hitoi ningu shipusavenosakeu ghumi hu theqhivetsu ake. Ningu ye Jisu lau likhi lajupu qhipuani.

Tungkuputsa Lo Kuchou Thebei Ithulu Akeu, Akiphi16 ©2022 Amazing Facts International All Rights Reserved